Akiki Ruti Sylvie yamuritse igitabo kigaruka ku bizazane yanyuzemo mu buzima (Amafoto)

Yanditswe na Dusabimana Aimable
Kuya 7 Nzeri 2017 saa 03:51
Yasuwe :
0 0

Akiki Ruti Sylvie, umukirisitu wabayeho mu buzima bw’imihangayiko, yamuritse igitabo kibukomozaho ndetse n’ibyo yabwigiyemo byatumye agira icyizere cyo kubaho no gukorera Imana.

Iki gikorwa yagikoreye imbere y’inshuti n’imiryango ndetse n’abandi batandukanye bitabiriye umuhango wo kumurika igitabo yise “Seule face à moi-même, le Triomphe de la Foi”, wabereye mu nyubako ya Kigali Convention Center mu mpera z’icyumweru gishize.

Akiki ni umubyeyi w’abana batatu yabyaranye n’umugabo we witwaga Gratien Kanobayita waje kwitaba Imana muri 2016. Ibi byago n’ibindi yanyuzemo mu buzima yagiriyemo kwerekwa n’ubuntu bw’Imana, ni bimwe mu byatumye yandika icyo gitabo kivuga intsinzi yaheshejwe no kwizera nubwo ubuzima butigeze busiba kumugora.

Ku mugoroba wo ku wa Gatatu, tariki 30 Kanama, ubwo Akiki yamurikaga iki gitabo yasobanuriye abitabiriye iki gikorwa impamvu yacyo ndetse n’uburyo yari amaze imyaka igera ku munani agitegura. Ni igitabo yatuye Imana yamurinze muri byinshi byari bikomeye, umugabo we witabye Imana, abana be, umuryango we, aho yize n’itorero rya Evangelical Restoration Church asengeramo.

Muri uyu muhango yasobanuye ingingo ku yindi uko ubutumwa bugikubiyemo bwabera urugero benshi mu guhangana n’ibibazo mu buzima, ibyo bakabikora bisunze Imana.

Akiki Ruti Sylvie wamuritse igitabo kivuga amasomo mu buzima busharira

Yari agaragiwe n’itsinda ryamufashije kugeza ubutumwa ku bitabiriye, ririmo Pasiteri Antoine Rutayisire wo mu Itorero ry’Abangilikani mu Rwanda, Professor Deo Mbonyinkebe, umwarimu muri Kaminuza y’u Rwanda na Mbundu Faustin, umushoramari ukomeye mu Rwanda.

Akiki yagarutse ku buhamya butandukanye bw’akababaro yasigiwe na se umubyara witabye Imana, ishavu yasigiwe n’urupfu rw’umugabo we yamaze imyaka itandatu arwaje, uburyo yafunzwe mu 1999 n’ibindi bitandukanye.

Yavuze ko yishimiye kuba yatanze ubuhamya bw’ibigoranye yanyuzemo ariko muri iki gihe Imana ikaba yaramuhinduriye amateka.

Yagize ati "Ndishimye cyane kuba ntanze ubu buhamya, kubera ubu amateka yanjye yahindutse. Ubusanzwe ubu nagombaga kuba mfite igikomere ku mutima, ariko ubu igikomeye ni uko mbasha kuba nahagarara nemye nkavuga ibyambayeho bitandukanye n’intsinzi ikomeye naboneye mu kwizera amasezerano y’Imana."

Abo mu muryango we bamushyikirije impano ndetse baramushimira ku bw'icyo gikorwa yatekereje

Pasteri Antoine Rutayisire yabwirije ubutumwa bwo gusaba abantu kwimenya no gusobanukirwa iby’ubuzima bwabo bwite bihuje intego n’igitabo Akiki yagaragarijemo uko yicaye agatekereza byinshi byamubayeho byatumye ashimira agakiza k’Imana.

Yagize ati "Ntituri malayika, ntituri dayimoni, ntituri n’Imana, ahubwo turi abana b’Imana, kandi ikizadukomeza, nidufata urwo rugendo duherekejwe n’Imana bizatworohera; ariko nitugerageza kurugendamo twenyine bizatunanira. Ibyo ukora byose udashyigikiwe n’Imana ntushobora kugera ku byo wifuje ndetse ntushobora no gukomera kandi icyo gihe ibyo ufite ntiwabinezererwamo nk’umuntu ufite Imana."

Pasiteri Antoine Rutayisire yakomeje atanga ubuhamya bw’uko na we yanyuze mu byaha akiri umusore, uko yanyoye inzoga, iby’abagore, ariko avuga n’uko yakijijwe no gutekereza kuri we ubwe bikamugeza ku mukiro wo kumenya Imana no gusoma Bibiliya yahawe nk’impano n’umukobwa wigaga ku kigo yizeho mu mashuri yisumbuye. Yasabye abitabiriye iki gikorwa nabo gushaka akanya bakazikoraho ubushakashatsi ku buzima bwabo.

Ibi n’ubundi buhamya butandukanye bwagiye butangwa n’inshuti za Akiki ku mibereho ye, byavuyemo isomo rikomeye ryo gusaba abitabiriye bose kurushaho gushyigikira ubuzima buyobowe n’Imana.

Igitabo Akiki yamuritse cy’ibyo yanyuzemo n’urugamba yatsinze yisunze Imana, cyagurishijwe ku bihumbi icumi ariko benshi mu bitabiriye baritanze ndetse habonekamo abatanga amafaranga menshi kugeza no ku watanze ibihumbi magana atanu by’amafaranga y’u Rwanda mu kumushyigikira.

Iki gitabo kiri no mu Cyongereza cyitwa “Alone, facing myself, the Triumph of Faith”, kiboneka muri Librairie IKIREZI, Librairie Caritas no kuri Books & Convenience iherereye mu igorofa rya mbere muri Ubumwe Grande Hotel, bikaba biteganyijwe ko n’ahandi kizahagera vuba.

Akiki wamuritse iki gitabo, yavutse ku itariki 30 Kanama 1971, byatumye icyo gikorwa kinahurirana n’ibirori byo kumwifuriza isabukuru nziza agatungurwa n’abitabiriye bakamuririmbira bamwifuriza umunsi mwiza w’amavuko.

Yavukiye i Kinshasa muri Repubulika Iharanira Demokarasi ya Congo, aho yabaye imyaka itandatu, nyuma se akaza koherezwa ahitwa Likasi mu Ntara ya Katanga. Uyu mubyeyi we waje kwitaba Imana, akaba na we yari umunyempano mu kwandika ibitabo, byatumye bamwe bahamya ko Akiki yakurikije imwe mu migenzereze ye yashimwaga n’abamumenye.

Akiki wavutse ari uwa kabiri mu muryango we, yarangije amashuri yisumbuye mu 1991, yakomereje muri Kaminuza Nkuru y’u Rwanda (UNR) aho yize imyaka ine kuva mu 1995 kugeza mu 1998.

Akiki mu kumurika igitabo cye yari agaragiwe n'akanama kamufashije kukinonosora
Abana ba Akiki wamuritse igitabo cy'ibizazane yanyuzemo mu buzima
Abitabiriye bahawe umwanya wo kubaza ibibazo ku gitabo cyamuritswe
Abitabiriye iki gikorwa batanze ubuhamya bemeza ko hari isomo rikomeye bigiye kuri Akiki
Akiki yakatanye umutsima w'isabukuru n'abana
Gaby Kamanzi ari mu bitabiriye iki gikorwa ndetse akanaririmba
Igitabo Akiki yamuritse cyitwa 'Seule face moi-même, le Triomphe de la Foi'
Inshuti n'imiryango yitabiriye iki gikorwa cyamurikiwemo igitabo cya Akiki
Mbundu Faustin, umushoramari ukomeye mu Rwanda witabiriye iki gikorwa yashimye cyane amasomo Akiki yanyujije mu gitabo cye
Nyuma yo kumurikirwa igitabo cya Akiki, benshi baritanze mu kumushyigikira
Pasiteri Antoine Rutayisire wo mu Itorero ry'Abangilikani mu Rwanda, yabwirije ubutumwa muri iki gikorwa
Professor Deo Mbonyinkebe, umwarimu muri Kaminuza y'u Rwanda, ari mu bafashije Akiki kunonosora iki gitabo
Umuhango wo kumurika igitabo cya Akiki wabereye muri Kigali Convention Centre
Umutsima wateguriwe Akiki wo gukata ku isabukuru ye wari ufite ishusho y'igitabo yamuritse

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza