Utagira icyo arengera, ararengeera- Bamporiki ahanura abasizi b’u Rwanda

Yanditswe na Dufitumukiza Salathiel , Ferdinand Maniraguha
Kuya 19 Werurwe 2021 saa 09:26
Yasuwe :
0 0

Umunyamabanga wa Leta muri Minisiteri y’Urubyiruko n’Umuco, Bamporiki Edouard yasabye abasizi b’u Rwanda gusiga bazirikana indangagaciro n’umuco by’u Rwanda, kuko utagira icyo arengera ateshuka akarengeera.

Yabitangaje kuri uyu wa Gatanu mu nama nyunguranabitekerezo ku busizi n’indangagaciro z’umuco w’u Rwanda. Ni inama itegura Umunsi Mpuzamahanga w’Ubusizi uzizihizwa tariki 21 Werurwe 2021.

Iyo nama yabaye hifashishijwe ikoranabuhanga yitabiriwe n’abasizi batandukanye, abayobozi mu nzego zifite ubusizi n’umuco mu nshingano n’abandi bafatanyabikorwa.

Umunyamabanga wa Leta muri Minisiteri y’Urubyiruko n’Umuco, Bamporiki Edouard yashimiye Inteko y’Umuco ku bwo gutegura inama yahurije hamwe abasizi, na bo abashimira kwitabira.

Yavuze ko ubusizi ari umurimo w’agaciro kandi ufite amateka akomeye mu muco nyarwanda.

Yongeyeho ko isi iri mu bibazo bikomeye byatewe n’icyorezo cya Covid-19 byashegeshe ubuzima burimo n’ubw’abasizi, gusa abumvisha ko batagomba gucika intege ahubwo ari umwanya mwiza wo kugaragaza impano zabo.

Icyakora, Bamporiki yavuze ko abasizi bakwiriye kugira kirazira, bagakora ibijyanye n’umuco n’indangaciro nyarwanda kugira ngo ubusizi bwabo butaba ubusenya aho kubaka.

Ati “Utagira icyo arengera ararengera [kurêengeera], kandi utagira ikimubuza gutana aratana. Ubusizi iyo bwayobye burayobya. Ni yo mpamvu mpamagarira abasizi bose bitabiriye iyi nama kwirengagiza ingorane zose ubusizi mu Rwanda bumazemo iminsi, ahubwo tugatanga umusanzu mu guhanura no guhwitura abacu bari kwica umurongo.”

Bamporiki yavuze ko guteza imbere inganda ndangamuco zirimo n’ubusizi biri mu ntego za Guverinoma.

Ati “Minisiteri ishishikajwe cyane n’iki gice cy’ubusizi kuko tuzi ko kizakemura, kizarema, kizubaka u Rwanda kirujyane ku cyerekezo 2050, aho tuvuga ko ruzaba ruteza imbere n’uruganda ndangamuco, ubusizi buzabe buri imbere mu bitanga umurongo wo kudatana kandi butunga ababukora.”

Umusizi akaba n’umunyamakuru, Muhirwa Terence yasabye ko urwego rw’abasizi rwongerwamo ingufu, abasizi bakazirikanwa mu bikorwa bitandukanye by’ubukangurambaga bitegurwa na Leta n’abafatanyabikorwa bayo nk’amarushanwa n’ibindi.

Muhirwa yavuze ko u Rwanda rukeneye abasizi babasha kwitunga, bakava mu gukora ubusizi byo kwishimisha.

Ati “Ni gute ubusizi bwaba umwuga wamutunga? Ndabizi ntibyoroshye ariko biranashoboka. Amahirwe dufite ni uko hari ubushake bwa Leta. Mugomba kubitekereza ku buryo ubusizi bwacu buva ku kuba ubwo kwishimisha bukaba ubw’umwuga.”

Umusizi Kampire Marie Chantal yasabye inzego zishinzwe umuco gushyira ingufu mu guhuriza hamwe abasizi nyarwanda harimo nko kugira urugaga. Na we yavuze ko hakenewe imbaraga kugira ngo abasizi nyarwanda umwuga wabo ubatunge kugira ngo n’abakiri bato bakure babikunze.

Murenzi Sixbert, umwe mu basizi bitabiriye we yasabye ko hajyaho icapiro ryihariye rishyigikira abasizi n’abanditsi ku buryo ibikorwa byabo birushaho gusakara muri rubanda ariko nako bibinjiriza.

Ati “Umusizi mu nda haramutse harimo ubusa, guhanga byaba ibibazo. Wasanga ahimba ibimuhimbaza kugira ngo abone benshi bamukurikira, abone ya maramuko. Mwakadufashije hakabaho ibyo bintu byafasha abasizi b’Abanyarwanda kugira icyo bageraho.”

Nikuze Ishimwe Adeline, umusizi, umukinnyi w’amakinamico n’umubyinnyi gakondo yavuze ko abasizi bakwiriye kumenya neza sosiyete bahimbiramo, bakamenya kirazira n’indangagaciro.

Ati “Umusizi mwiza ni umenya igihe agomba guhimbira ariko aba agomba guhimbira umuryango arimo akumva ko ibyo bihangano bye bigomba kuba iby’umuryango.”

Yavuze ko kandi abasizi bakwiriye kujyana n’ibihe, bakamenya kubyaza umusaruro ikoranabuhanga.

Ati “Twese turabizi ko bitagenze neza muri ibi bihe bya Covid-19, akazi karahagaze bamwe bava no mu busizi, ariko siko byari bikwiriye. Kuki abandi nk’abaririmbyi bakomeje, twe twashyizemo imbaraga? Umusizi yagombye kujyana n’ibigezweho. Hari igihe ushobora guhanga uvuga uti haje YouTube , reka nanjye nshyireho ibihangano byanjye, maze mbone ayo mafaranga aho guheranwa n’ibi bihe bya Covid-19.”

Umukozi mu Nteko y’Umuco, Nsanzabaganwa Modeste, watanze kiganiro ku ndangagaciro z’umuco w’u Rwanda, yavuze ko hari ibikorwa byatangiye gukorwa byo guhuriza hamwe abasizi kugira ngo bashakire ibisubizo ibibazo byabo.

Yavuze ko ubu ikiri gukorwa ari ugushaka uko bongererwa ubumenyi, kugira ngo bakore ibihangano bifite ireme ari nako bibagirira akamaro.

Ati “Uri ikantarange biragoye gufashwa no gukora ariko iyo wegereye abandi, ni ibintu byoroshye cyane ari ukubafasha, ubuvugizi n’ibindi abantu bagatera imbere. Umuti ni ugutsimbarara kuri za ndangagaciro zacu z’ubunyarwanda. Iyo wiyambuye indangagaciro yawe, ntuba ukiri Umunyarwanda, uba wabaye undi.”

Nyilimanzi Gérard yavuze ko kuva na kera na kare, ubusizi bwahoze ari ikigega cy’umuco n’amateka y’u Rwanda.

Ati “Iyo tutagira ubusizi ntituba twaramenye amateka y’ukuri. Abayavuze mbere bayavuze uko bishakiye bagamije kuducamo ibice. Abasizi n’abandi bahanzi bakwiye kongera imbaraga mu guteza imbere umuco.”

Bamporiki yijeje abasizi ko ibibazo bagaragaje bizashakirwa ibisubizo babigizemo uruhare.

Ati “U Rwanda ruhagaze neza ku buryo rushobora gushyira mu ngiro ibyifuzo by’abasizi kandi rutavunitse. Icyo abasizi basaba ni ikibatera imbaraga kugira ngo umusanzu basabwa bawutange batavunitse.”

Yaboneyeho gusaba Inteko y’Umuco kwemerera abasizi bakajya bayigezaho ibisigo biteguriye ku nsanganyamatsiko bashaka igihe barushanwa, cyane ko “bitazananirana kumenya ngo umuhanga ni nde, umuganda aduhaye tuzawumaza iki?”.

Hafashwe imyanzuro itandukanye igomba kunozwa irimo kuba abasizi bagomba gusiga badateshuka ku ndangagaciro z’umuco nyarwanda, kongera amarushanwa mu basizi haba abato n’abakuru, gusaba ko inzego zikora ubukangurambaga kwifashisha abasizi, gufasha abasizi kubona icapiro, kurushaho kwigisha no guteza imbere ubusizi mu mashuri, gushishikariza abasizi guhora biga no kuba abarimu beza ba rubanda n’ibindi.

Bamporiki yavuze ko umusizi akwiriye kumenya gusigasira indangagaciro z'umuco ngo atagira ibyo yangiza

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .