Umusozi wa Kigali wasabirwagaho kugira Umutima w’u Rwanda

Yanditswe na Gérard Nyirimanzi , Nyirishema Célestin
Kuya 27 Ugushyingo 2019 saa 09:43
Yasuwe :
0 0

Abanyarwanda ba kera bahoranye umuhango mwiza wo gusaba Imana kugira Umutima w’u Rwanda. Bakawusabira ku musozi wa Kigali bafataga nk’igicumbi cy’Umutima w’u Rwanda. Ese Abanyarwanda b’ubu bawusabira he? Cyangwa se ntawo bagikeneye? None se iyo Imbuto Foundation igarutse ku bidindiza “Ndi Umunyarwanda”, aho si ibyo iba ishaka kumenya? Reka twumve icyo Abacukumbuzi b’ireme ry’Umuco n’Amateka by’u Rwanda babivugaho mu bushakashatsi bwabo.

Umusozi wa Kigali n’Igenamigambi ry’ingoma inye (Ubu twagereranya na Vision 2020 cyangwa 2050).

Kumenya icyerekezo cy’u Rwanda mu myaka ijana ni byo bitwereka neza icyo ubusugire n’ubwigenge by’u Rwanda gakondo byari bisobanuye, bityo na none tukabasha no gusobanukirwa neza n’icyari ku mutima (Philosophie) w’abakurambere baremye u Rwanda bakarwubaka, bakarurwanira ndetse benshi bakanarupfira.

Aha tugiye kubona ko ubusugire n’imibereho myiza y’Abanyawanda ku ngoma eshatu bwategurwaga n’Abami bitwa Mutara na Cyilima mbereho nk’ imyaka ijana. Nk’uko musanzwe mubizi, mu mazina y’Abami atanu yasimburanaga mu bihe bine yakurikiranaga atya: Mutara, Kigeli, Mibambwe, Yuhi na Cyilima. Aha biragaragara neza ko hagati ya Mutara na Cyilima hacagamo Ingoma eshatu mbere y’uko Cyilima atangiza ikindi cyiciro cy’Abami.

Inshingano z’abami Kigeli na Mibambwe zabaga ari ukwagura u Rwanda kuko ku ngoma eshatu zabaga zarabanje Inka n’Abantu byabaga byaragwiriye bityo hakaba haragombaga kuboneka uruhumekero habayeho kwagura ubutaka bw’igihugu. Yuhi yari ashinzwe imihango y’i Bwami cyane cyane Umuriro waho utarazimaga ukaba wararangaga ubusugire bw’igihugu. Aha murumva ko Yuhi yari ashinzwe gutunganya ibijyanye n’ubusugire bw’igihugu n’ibijyanye n’imiyoborere myiza kimwe n’Iyobokamana kugira ngo abandi bami bane babone urufatiro rukomeye bazubakiraho. Ubwo hari aho bitaniye cyane n’ibikorwa ubu mu igenamigambi rirerire?

Yaba Yuhi, Kigeli na Mibambwe uko ari batatu babanzirizwaga kandi bagaherukwa na Mutara cyangwa na Cyilima. Musenyeri Kagame yaragaragaje ko mu Rwanda Ingoma eshatu zamaraga imyaka 100 kuko buri yose yari imyaka yegereye 33. Mbese ni ukuvugako kuva Mutara cyangwa Cyilima batanze kugera hongera kwima undi Mutara cyangwa undi Cyilima; muri rusange habaga hashize imyaka 100.

Umuhango wo kwaka Umutima w’Ingoma

Mutara na Cyilima bari Abami b’Inka kandi bagombaga kugira umuhango ukomeye wo mu Bwiru bakoraga ujyanye n’icyerekezo cy’u Rwanda mu ngoma eshatu zigiye gukurikiraho. Niwo mu Bwiru bita “Inzira y’Ishora”. Hari umuhango baheragaho wo kuvugurura Ingoma z’ibwami nka Kalinga, Cyimumugizi, Kiragutse na Mpatsibihugu. Barebaga niba mu myaka hafi ijana ishize nta kibazo izo ngoma zagize kugira ngo bibaye ngombwa babe basisazura cyangwa se ngo bazisimbuze izindi. Iyo basangaga izo ngoma zikiri nzima cyangwa bagasanga zigomba gusimbuzwa; byanze bikunze bagombaga kuziha icyo bitaga “kuziha imitima mishya”.

Iyo mihango yo kubonera Ingoma z’ingabe imitima, imwe bayikoreraga ahitwa i Karama ku murwa wa Kigali hariya ku musozi wa Mont Kigali aho bavuga ko mu mirwa yose y’Abami umurwa wa Kigali ari wo wari Imfura y’imirwa yose y’Abami.

Aho i Karama bahajyaga baje kuhatora imitima y’Ingoma z’ingabe arizo Cyiragutse, Cyimumugizi, Mpatsibihugu na Kalinga. Mu gihe ingoma Kalinga yari Ingabe y’ubwami bw’u Rwanda, ziriya zindi uko ari eshatu zo bigaragara ko zari ingabe za buri mwami muri bariya Bami batatu bari hagati ya Mutara na Cyilima.

Bishoboka ko Cyiragutse ari ingabe ya Mibambwe maze Mpatsibihugu ikaba iya Kigeli bitewe n’uko bose bari bashinzwe kwagura u Rwanda nk’uko amazina y’izo ngoma abigaragaza. Cyimumugizi ikaba ingabe ya Yuhi kuko ariwe wari ushinzwe imihango y’ubwami bw’u Rwanda nk’uko na none izina ryayo ribigaragaza.

Ibi rero ubona bimeze nka bya bindi by’Umwami Salomo wo muri Bibiliya igihe yajyaga gutambira ku musozi wa Gabaon nk’uko tubisoma mu 2 Abami 3:1-14. Ubwo Salomo yariho atamba Imana yaramubonekeye imubwira kuyisaba icyo ashaka maze Salomo ayisaba ubwenge kugira ngo agire ubushishozi bwo kuyobora ishyanga rya Israel. Uriya muhango wa Salomo wo gusaba Imana ubwenge (Umutima) bari ku musozi muremure nk’uwa Kigali urasa cyane n’ibyo Abiru b’i Rwanda bakoraga bafatanije n’Umwami nk’uko tugiye kubibona.

Iyo rero Abiru n’abandi banyamihango bageraga ku murwa wa Kigali babaga bazanye: Umutsobe w’isugi, Umukobwa w’isugi n’Umwenenyabirungu w’isugi, bakazana amata, inzoga n’imbuto bagatereka aho. Hanyuma rero bendaga ya mata na za nzoga bagakozamo icyuhagiro icyarimwe bakuhagira igiti cy’umurama (ngo gitere uburame) babaga bazanye maze Umutsobe mukuru agapfukama agasenga avuga aya magambo:

Gahorane Imana Kigali.
Tuje kwenda imitima y’ingoma
Ngo Umwami mu Rwanda agire umutima
Ingoma mu Rwanda zigire umutima
Abagabo mu Rwanda bagire umutima
Abagore mu Rwanda bagire umutima
Inka mu Rwanda zigire umutima
U Rwanda rwose rugire umutima.

Aha murabona ko niba Ingoma y’Ingabe y’u Rwanda ari yo Kalinga iyo ibonye Umutima ugereranya Ubwenge n’Ubushishozi, Umwami wayimye nawe aba abonye umutima. Na none Ingoma z’Abami ari zo Cyimumugizi, Kiragutse na Mpatsibihugu iyo zibonye umutima, ni ubutegetsi bw’imyaka ijana bw’Abami Kigeli, Mibambwe na Yuhi burangwa n’umutima. Uwo mutima rero ni wo ugera mu baturage no mu nka. Ibyo birangira ari u Rwanda rwose rubonye umutima kugira ngo rubone kuba umurame. Ibyo bimeze nk’uko Umwami Salomo yasabye ubwenge Imana ikamushima ikamubwira ko izamuha n’ibyo atasabye nko kurama, ubukire, amahoro no kunesha abanzi bitewe n’uko yahisemo neza. Ibyo Imana yamusezeranyije byose bimeze nk’ibyo Abanyarwanda bizeraga kubona bamaze kubona Umutima w’Ingoma.

Dore uko uduce tw’ubwiru dukurikira tubivuga:

Uri umurame umwami abe umurame
Ingoma mu Rwanda zibe umurame
Abagabo b’i Rwanda babe umurame
Abagore b’iRwanda babe umurame
Inka mu Rwanda zibe umurame
U Rwanda rwose rube umurame

Nyuma rero yo kubona umutima no kubona uburame; ibyo ntabwo byari bihagije kuko u Rwanda rwose rwagombaga kuzira ubusembwa, kuvogerwa no guhumana ari byo bishushanywa na ba bantu b’amasugi bazanye. Ubusanzwe umuntu w’isugi ni umuntu ugifite ababyeyi bombi cyangwa umukobwa utarasambanyijwe. Muri ya masengesho y’Umutsobe mukuru yakomezaga agira ati:

Aya ni amasugi umwami abe isugi
Ingoma i Rwanda zibe amasugi
Abagabo i Rwanda babe amasugi
Abagore mu Rwanda babe amasugi
Inka i Rwanda zibe amasugi
U Rwanda rwose ruhorane amasugi

Usibye imihango yo mu bwiru yo gusabira u Rwanda rwose umutima, uburame n’ubusugire, mu magambo amwe n’ayo tubonye hejuru, na none icyerekezo cyari ukugira ubuhoro (amahoro) mu Rwanda rw’Umwami.

Umwami w’i Rwanda agira ubuhoro
Ingoma z’i Rwanda zigira ubuhoro,
Abagabo b’i Rwanda bagira ubuhoro
Abagore b’i Rwanda bagira ubuhoro
Inka z’i Rwanda zigira ubuhoro
U Rwanda rwose rugira ubuhor
o

Nyuma y’ibyo byose u Rwanda rukagira uburumbuke bw’amata, ubuki n’inturire. Ibyo nabyo babivugaga mu mugambo ahwanye n’ayo hejuru bati

Ng’aya amata n’ubuki
Kugira ngo Umwami agire amata n’ubuki
Ingoma mu Rwanda zigire amata nubuki
Abagabo bagire amata n’ubuki
Abagore bagire amata n’ubuki
Inka mu Rwanda zigire amata n’ubuki.

Nyuma y’ibi, hazaga amasengesho yo gucyamura (gukebura) amahanga yose adatura umwami w’u Rwanda. Dore amagambo bavugaga muri ubwo Bwiru:

Twacyamura u Burundi ku ngoma
Twacyamura u Bushubi ku ngoma
Twacyamura u Bunyabungo ku ngoma
Amahanga yose adatura umwami w’u Rwanda
Twayacyamura

Ibi twabigereranya na diporomasi y’ubu iba igamije gutuma amahanga yandi ayoboka iby’igihugu cyawe.

Amahame remezo y’u Rwanda gakondo

Iyi mihango yakorwaga n’Abami bitwa Mutara na Cyilima hari ibintu idusobanurira neza bigatuma tumenya Ihame-ngengabitekerezo ryubatse u Rwanda rikaruha Indangagaciro. Ihame-ngengabitekerezo ni ryo soko y’ibikorwa n’imyitwarire by’umuntu cyangwa by’ikigo biturukamo. Ni yo mpamvu nta muntu, nta kigo, nta shyaka nta n’ishyanga byabaho bidafite Ihame-ngenga-bitekerezo ababigize bagenderaho.

Ku gihugu Ihame-ngengabitekerezo ni ryo rigena kandi rikagenga Indangagaciro na Kirazira by’igihugu! None abakurambere baturaze u Rwanda barwubatse babikuye ku rihe hame-ngengabitekerezo ukurikije ibyo tumaze kubona?

Ihame-ngengabitekerezo rya mbere ryagenaga kandi rikagenga ibyo mu Rwanda byose; ni iritumenyesha icyo u “Rwanda rwose” ari cyo: “u Rwanda rwose” ntabwo ari ubutaka bwose bw’aho twita mu Rwanda gusa; ahubwo ni ahantu hari: Ingoma-Umwami -Abagabo -Abagore-Inka. Ibi rero ni nabyo byerekana ibyo twabonye by’Ibanga ry’Umwami n’Ingoma, n’Ibanga ry’Inka n’Ingabo.

Aha icya mbere kigomba kumvikana mu Ihame ngenga-bitekerezo ry’abahanze u Rwanda, ni uko ahantu hose ku isi hari kuba haboneka Umwami wimye Ingoma-ngabe yahawe umutima, hakaboneka Abagabo n’Abagore ndetse n’Inka, habashaga kuboneka u “Rwanda rwose.”Kimwe n’uko ibyo byose uwari kubivana ku butaka bw’u Rwanda haba hatakaje kuba “u Rwanda rwose.” Impamvu ni ko ikihagira u Rwanda rwose ari izi ndangagaciro z’Abanyarwanda zihari tuzi ko izo ndangagaciro zari zubakiye ku Mana, Inka n’Ingoma.

Nk’uko Umwami yabaga ahatswe n’Ingoma maze Ingabo (Abaturage) nazo zikaba zihatswe n’Umwami; ni nako u Rwanda rwose rwabaga ruhatswe n’Imana bitewe n’uko Ingoma yimye u Rwanda ari Imana yayihaye umutima.

Nk’uko Inka ihaka isabwa kubyara icyo ihatse; ni nako Imana ihatse u Rwanda na yo isabwa guhora irubyara (irugoboka). Burya mu Kinyarwanda ijambo“gusenga” risobanuye gukesha byose uguhatse! Ni yo mpamvu usanga n’isengesho gakondo ryo gusabira u Rwanda na ryo ari ibyo ryabaga ryerekejeho. Nimwongere murebe amagambo arigize:

Seka seka gasani k’i Rwanda
Rusekere rugubwe neza
Rusenderezemo amahoro n’amahe
Rutsindire ubukenya n’ubugingo buke
Rutsindire ubusame n’ubusharire
Rutsindire icyago n’icyagane
Rutsindire nyamunsi n’intumwa yayo
Rutsindire umwanzi wo mu kirambi
N’umurozi uvuka ishyanga
Garika ibiganza utugabire
Rugaba, Rugabo, Rwagisha
Maze twishyuke mu Rwanda umu.

Ihame-ngengabitekerezo ry’abahanze u Rwanda ni ukugira Ishyanga aho Umwami yima Ingoma-ngabe yahawe umutima (ubushishozi) n’Imana, maze ingoma (reigns) zikagira umutima (ubushishozi) bigatuma Ingabo z’Umwami (Abagabo n’Abagore) nabo bagira umutima uzagera no ku nka na zo zikagira umutima (wo gukamwa no konsa izazo).

Murabona neza ko uru ari uruhererekane rw’Umutima uva ku MANA ukagera mu Mwami unyuze mu NGOMA-NGABE maze ukarangiriza mu NKA unyuze mu ngabo (Abagabo n’Abagore). Uru ruhererekane kandi ni rwo rwahoze rukoze “umutima w’u Rwanda rwose”. Byongeye kandi u Rwanda rwose iyo rwabaga rubonye umutima; ni byo na none byateraga igihugu kugira uburame, ubusugire, ubuhoro n’uburumbuke ndetse no kugarura amahanga adatura u Rwanda.

Ibi rero abakurambere bacu bakoraga kera ngo bahorane Umutima w’u Rwanda (w’Ubunyarwanda) n’ubu mpamya ko bikenewe. Kubura uwo umutima w’u Rwanda, w’ubunyarwanda ni byo byatumye abanyarwanda bishora mu mahano ya Jenoside yakorewe Abatutsi. Ngo na Ruganzu Ndoli amaze kubohora u Rwanda amacakubiri yatumye rugirwa ingaruzwamuheto imyaka irenga icumi, yatangiye yigisha umutima w’u Rwanda. Arwanya ba mutima-nda, mutima-rwana, mutima-muke, agakunda cyane mitimi-igwanye (ihuje). Ese ubu abo ba mutima-nda sibo batumye u Rwanda rutabohoka burundu? Imana tugira ni uko “imiyaga isubiza inyuma indege itwaye abanyarwanda itayibuza kugera iyo ijya” nk’uko Nyakubahwa Perezida wa Repubulika aherutse kubyibutsa Abanyarwanda bo mu Rwanda rutugendamo!

Naho ibidindiza Ndi Umunyarwanda byo ubanza dukwiye kubirebera mu mizi yabyo mikuru twitabaje amahame-remezo yagengaga ishyaka ry’u Rwanda n’Abanyarwanda.

Ibitekerezo bya Gérard Nyirimanzi na Nyirishema Célestin, Abacukumbuzi b’Ireme ry’Umuco n’Amateka by’u Rwanda. Babikuye mu Ubwiru, Inzira y’Ishora, vers 279-310.

Umusozi wa Kigali niwo wasabirwagaho kugira Umutima w’u Rwanda
Kugaba ibitero, gutsinsura umwanzi n'ibindi abanyarwanda bakoraga babanzaga gusaba Imana kubayobora ngo bagende ari umwe
Gufashanya muri byose mu banyarwanda bo hambere byose byavaga mu kugira mutima umwe
Kugaba ibitero, gutsinsura umwanzi n'ibindi abanyarwanda bakoraga babanzaga gusaba Imana kubayobora ngo bagende ari umwe
Umutima w'u Rwanda niwo wayoboraga abanyarwanda bo hambere, ukabafasha kugena ejo hazaza heza bari mu bumwe

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza