Kwamamaza

Umuhuro, gutinyisha, kwita izina,...imihango igenda ikendera mu Rwanda

Yanditswe kuya 1-10-2016 saa 07:49' na Emma-Marie Umurerwa


Bamwe mu banyarwanda cyane abakuze, bavuga ko imihango imwe n’imwe yakorwaga hambere igenda ikendera, abandi bakavuga ko uburyo yakorwagamo bwagiye buhinduka kubera iterambere igihugu kigezeho.

Mu muco Nyarwanda habamo urusobe rw’imihango abantu basigiwe na basekuruza. Aha ni ho usanga imigenzo imwe n’imwe ijyanye n’imibereho rusange, kuri ubu isigaye ikorwa na bake.

Muri iyo mihango twavuga Umuhuro, gutinyisha, kwita izina n’iyindi.

Ingeri zitandukanye z’abanyarwanda baganiriye na IGIHE, bamwe muri bo bemeza ko iyi mihango igenda ikendera.

Umuhuro

Bamwe mu basheshe akanguhe bemeza ko uyu muhango usa n’uwakendereye, aho bashingira ku kuba kuri ubu imihango y’ubukwe isigaye ibera umunsi umwe.

Ngaboyamahina Damien w’imyaka 78, utuye mu Murenge wa Jabana, mu Karere ka Gasabo yagize ati “Buri bucye umukobwa agashyingirwa, urungano rwe rwajyaga kurarayo bagatarama bakamusezeraho, ba Nyirasenge na ba Nyina wabo bakamuganiriza,bamugira inama z’uko azafata umugabo we, akamwubaha, akamukuyakuya ni byo bitaga kurara umuhuro."

Yakomeje agira ati "Ubukwe bw’ubu busigaye bubera umunsi umwe, ugasanga imihango imwe n’imwe iburijwemo.”

Gutinyisha

Murumuna w’umukobwa washyingiwe, cyangwa undi mwangavu wo mu muryango we, yaramuherekezaga agiye gushyingirwa, akajya amuganiriza, akamwakirira abashyitsi, akamukorera n’utundi turimo mu gihe runaka kubera ko we yabaga agifite amasoni.

Uyu muhango uracyakorwa?

Bamwe bemeza ko hari aho uyu muhango ukorwa, abandi bakavuga ko utagikorwa kubera impamvu zitandukanye zishingiye ku iterambere rigenda ryiyongera mu Rwanda bikaba ngombwa ko hari imwe mu migenzo ya Kinyarwanda itagihabwa agaciro.

Umwe mu bo twaganiriye utifuje ko dutangaza amazina ye yagize ati “Kuri ubu umuntu asigaye atinyishwa n’umukozi wo mu rugo, ikindi kandi amasoni y’aba kera ntakibaho kubera ko hari igihe umuntu ashyingirwa yari asanzwe amenyeranye n’umugabo we.”

Kwita izina

Nyuma y’iminsi umunani umwana avutse, ababyeyi be batumiraga abana bo mu baturanyi, inshuti, n’abavandimwe, bakabagaburira ibiryo bya Kinyarwanda birimo umutsima w’amasaka, hanyuma bakita umwana izina. Ku mugoroba cyangwa se mu rukerera Se w’umwana akamwita izina ry’ukuri.

Nyuma y’igihe gito umwana yiswe izina , ababyeyi, inshuti n’abavandimwe bazaga guhemba ababyeyi, ariko kandi ntibaziraga umunsi umwe.

Uyu muhango usa n’utangiye gukendera, nk’uko bamwe mu baganiriye na IGIHE babyemeza.

Umubyeyi utuye mu Karere ka Kicukiro yagize ati «Mfite abana batatu ariko nta n’umwe twari twakorera uwo muhango. Njye n’umugabo wanjye tujya kubyara twararangije kwita umwana izina. Sindahembwa na rimwe kubera ko umugabo wanjye nanjye nta babyeyi tugira. »

RALC iti’Abanyarwanda bakwiye kugaruka ku isoko’

Mu kiganiro yagiranye na IGIHE, Umunyamabanga Nshingwabikorwa w’Inteko Nyarwanda y’Ururimi n’Umuco (RALC), Dr Vuningoma James, yavuze ko abakiri bato bakwiye kwigishwa imihango y’imibereho y’abanyarwanda.

Yagize ati “Hari imihango imwe n’imwe igenda ihindura isura, ugereranyije n’uburyo yakorwaga mu gihe cyo hambere. Kwita umwana izina ntibikiri umuhango nka mbere basigaye bamubatirisha, ubona ko bigenda bihindura isura bijyana n’igihe tugezemo. Ariko niba mwarakurikiye Rwanda Day [y’uyu mwaka],abanyarwanda basobanuriwe byinshi ku mihango ndetse n’umuco. Ibi kandi bizakomeza no mu Rwanda, Itorero Urukerereza naryo hari umukino ryakinnye rigaragaza imihango imwe n’imwe ya Kinyarwanda.”

Dr Vuningoma akomeza avuga ko abanyarwanda bakwiye kugaruka ku isoko bagasigasira ibibaranga bibaha kuba abo bari bo.

Hari imigenzo ya Kinyarwanda isa n'iyacitse muri iki gihe cyangwa igahindurwa uko yakorwaga
Dr Vuningoma avuga ko abanyarwanda bakwiye kugaruka ku muco wabo gakondo

[email protected]


Kwamamaza

Kwamamaza
IZINDI NKURU WASOMA
Isengesho ry’umugore utwite
2016-11-03 13:24:00
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Tuesday 6 Ukuboza 2016
Copyright © 2009 -2014 - IGIHE Ltd - All Rights Reserved