Minispoc yashyizeho itariki y’ibirori by’Umuganura nyuma yo kwimurwa kubera amatora

Yanditswe na IGIHE
Kuya 1 Kanama 2017 saa 04:28
Yasuwe :
0 0

Mu gihe Umunsi w’Umuganura usanzwe wizihizwa ku wa Gatanu wa mbere w’ukwezi kwa Kanama ariko uw’uyu mwaka ukaba warimuwe kubera guhurirana n’amatora y’umukuru w’igihugu, azaba ku itariki ya 4 Kanama, Minisiteri ya Siporo n’Umuco yatangaje itariki nshya uzaberaho.

Nk’uko tubikesha itangazo rya Minispoc, ibi birori bizaba ku itariki 27 Kanama 2017, mu Karere ka Nyanza mu Ntara y’Amajyepfo, bikazabimburirwa n’igitaramo ngarukamwaka ‘I Nyanza Twataramye’, kizaba ku itariki 26 Kanama.

Iyi Minisiteri itangaza ko ibikorwa byo kwizihiza umuganura wa 2017, bizatangira ku wa 20 Kanama ahazaba iserukiramuco ngarukamwaka rya ‘Kigali Up Festival’ mu Mujyi wa Kigali.

Usibye ibirori byo ku rwego rw’igihugu bizabera mu Karere ka Nyanza, uyu munsi uzizihizwa no ku rwego rw’Intara, Umudugudu, Umuryango ndetse no ku rwego rwa za ambasade ku Banyarwanda batuye mu mahanga, ku nsanganyamatsiko igira iti “ Umuganura ni isoko y’ubumwe n’ishingiro ryo kwigira”.

Icyo wamenya ku munsi w’Umuganura

Mu mateka y’u Rwanda, umunsi w’umuganura wari umunsi mukuru ukomeye haba i bwami no kuri rubanda, kuri uwo munsi umwami yamurikirwaga umusaruro w’Abanyarwanda bavuye impande zose z’igihugu, agasangira n’abaturage ndetse akishimana nabo.

Uyu muhango wari ufite akamaro ko gusangira no kwishimira umusaruro wabonetse, byakorwaga mu gitaramo cyiswe icy’umuganura. Uyu muganura ariko wagiraga n’undi mumaro wo kuzirikana umwami nka nyir’uburumbuke bakamutura urutete rw’imyaka yeze.

Uyu muhango wakomeje gukorwa no mu yindi myaka yakurikiye ubutegetsi bw’umwaduko w’abazungu, gusa ukaba waragiye uhindurirwa inyito n’uburyo bwo kuwizihiza. Usigaye ukorwa mu rwego rwo kwishimira umusaruro, Abanyarwanda bagahura bagasangira ibyo kurya bakanywa n’amayoga.

Ibirori by'umuganura i Nyanza mu 2016

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza