Minisiteri n’abafite umuco mu nshingano basabwe kwiga ku nama z’ubukwe zabaye umuyoboro wo gushaka amikoro

Yanditswe na Evariste Nsengimana
Kuya 15 Nzeri 2017 saa 12:31
Yasuwe :
0 0

Bimaze kugaragara ko abantu benshi muri iki gihe bategura inama z’ubukwe bagamije gushakira ubushobozi muri rubanda, aho kugira ngo zivugirwemo uko imihango n’imyiteguro by’ubukwe bizakorwa, ahubwo ugasanga uwabatumiye abitezeho impano n’ukwitanga ngo ubukwe bwe buzagende neza.

Ubushakashatsi buheruka gushyirwa ahagaragara n’Inteko Nyarwanda y’Umuco n’Ururimi, bwagaragaje ko inama z’ubukwe na zo zibazwaho kuko zitegurwa hagamijwe gushaka amafaranga hakaba hari abamara kuyabona ubukwe bakabureka.

Mu biganiro byateguwe n’umuryango urengera abana, Save the Children, ubinyujije mu mushinga ‘Mureke Dusome’ uterwa inkunga na USAID, hamwe na Minisiteri y’Umuco na Siporo, kuri uyu wa Kane, bikitabirwa n’urubyiruko rwo muri Kaminuza zitandukanye; ikijyanye n’ubukwe cyagarutsweho.

Umuyobozi ushinzwe ishami ry’Umuco mu Nteko Nyarwanda y’Ururimi n’Umuco, Dr Nzabonimpa Jacques, yavuze ko muri iki gihe usanga urubyiruko ruheza abakuru mu nama z’ubukwe kandi rufite ubumenyi buke ku misango y’ubukwe kandi ko mu by’ukuri zitaba zigamije gutegura imigendekere myiza y’ubukwe.

Yagize ati “Akenshi na kenshi urubyiruko rubikora rugamije kuvana amafaranga cyangwa ubushobozi mu batumiwe. Ikibazo cya mbere twabonyemo n’uko abatumirwa nta n’aho baba bahuriye n’abagiye kurongora. Ni ugutumira nimero zose afite muri telefone.”

“Icya kabiri, ni uburyo izo nama ziyoborwa. Nta kijyanye na gahunda y’ubukwe baganiraho ahubwo agira gutya akabereka ati ‘ubukwe bwanjye bufite ingengo y’imari ya miliyoni umunani, kandi kugeza ubu mfite ibihumbi bitageze kuri 200, none mumfashe, mutangire mwivanemo ubushobozi.”

Yakomeje avuga ko bahita bategura itsinda ry’abantu bazakora ubukangurambaga no gukusanya ayo mafaranga, ati “Ni icyo kibazo tubona, dukangurira urubyiruko kongera kugana umuryango, noneho inama z’u bukwe zikaba ari izo gutegura ubukwe atari izo kuvana ubushobozi mu bantu noneho umuryango n’ugaragara mu bukwe hazavaho ibibazo byinshi kuko ari bamwe basabira umusore batazi n’umuryango basabiri, ari n’ibibazo by’abatumira benshi bagamije kubashakamo indonke nabyo bizavaho usange ubukwe bwongeye kuba ubw’umuryango nkuko byahoze.”

Yakomeje avuga ko ibyo bigira ingaruka zikomeye, kuko abenshi batahuye ko ziba zigamije kubashakamo indonke, bituma ubutaha batumirwa ntibageyo, abandi bakitinya gutanga ibitekerezo n’imigendekere mibi y’ubukwe.

Umwanditsi w’ibitabo bitandukanye birmo icyamamaye cyane cyitwa Isiha Rusahuzi, yanditse mu 1987, Gasimba François Xavier Munezero, yatangaje ko ubu ingo z’iki gihe zubakiye ku kinyoma no ku mafaranga kandi ko ariyo mpamvu zitagikomera kuko ayo mafaranga abuze ntaho urugo ruba rusigaye.

Yavuze ko inzego zitandukanye zikwiye gushyiraho umurongo ngenderwaho ngo umuco nyarwanda ugarukemo icyanga, aho yagize ati “Byaratangiye n’inama nk’iyi iba ariyo kugira ngo abantu baganire barebere hamwe, bungurane ibitekerezo by’uko byakosoka. Kugena umurongo biroroshye, Minisiteri ishinzwe umuco, Inteko y’Ururimi n’Umuco zabikora no muri sosiyete sivile natwe abanditsi twese twafatanya uwo murongo tukawerekana.”

“Iyo ugeze mu bukwe ugasanga uko buri gukorwa nabi, abantu bacurikiranya ibintu, bagakoresha amagambo atariyo, n’ikinyarwanda kikahababarira […] Byaratangiye, Inteko y’Ururimi n’Umuco nizeye ko ibireba, nkuko minisiteri iba yaduhamagaje, nidufashe bya bitabo twandika bikubiyemo umuco nyarwanda bigere hirya no hino babisome, kuko abantu akenshi bica ibintu kuko batazi uko bikorwa.”

Umuyobozi ushinzwe ishami ry’Umuco mu Nteko Nyarwanda y’Ururimi n’Umuco, Dr Nzabonimpa Jacques
Abantu batandukanye bari bitabiriye ibi biganiro

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza