Menya byinshi ku bakurambere biziritse ku Rwanda bakanga kururekura

Yanditswe na Muhonzire Sylvine
Kuya 1 Gashyantare 2021 saa 09:30
Yasuwe :
0 0

Muri iki gihe twizihiza umunsi w’intwari, ni ngombwa ko tuzirikana ubutwari bwaranze abanyarwanda bo hambere, barwaniriye u Rwanda, bakazwirikaho bakanga kururekura ngo rutajya mu maboko y’abanzi, ubu tukaba tukirufite.

Birashoboka ko u Rwanda rwari kuba rungana nka Seychelles, agahugu gato kaba muri Afurika, ariko kubera abami barurwaniriye bakagenda barwagura, bakarwizirakaho bamwe bagahara n’ubuzima bwabo, rwabaye u Rwanda rugari, nubwo abakoloni batarurebeye izuba bakarugabagabanya mu nama yabereye i Berilini.

Mu kiganiro RBA yagiranye n’abanyamateka batandukanye barimo Kalisa Rugano impuguke mu muco n’amateka; Umuraza Landrada, komiseri mu itorero ry’igihugu ndetse n’umwanditsi w’amateka, Nizeyimana Innocent, bagarutse cyane ku butwari bukomeye bwaranze abanyarwanda kuva kera, harimo n’abami b’u Rwanda Ruganzu Bwimba ndetse na Ruganzu II Ndoli.

Ruganzu Bwimba niwe mwami wenyine w’u Rwanda wameneye igihugu amaraso

Mu bami barurwaniriye bakarwizirakaho, harimo Ruganzu Bwimba wategetse u Rwanda mu wa 1312-1345, akarumenera amaraso, akemera kuba umutabazi w’umucengeri ari umwami, kugira ngo u Rwanda rwigarurire i Gisaka.

Umutabazi w’umucengeri ni umuntu wiyemezaga kuba igitambo akemera kumena amaraso mu gihugu cy’amahanga agamije kurinda u Rwanda no kurwagura.

Kalisa Rugano yavuze ko ibi byabaye ubwo i Gisaka cyashakaga kwigarurira u Rwanda bikabananira, niko kwiga umutwe wo gushaka mushiki wa Bwimba, Robwa Nyiramateke, kugira ngo azahabyarire umwana w’umuhungu maze agire u Rwanda ingaruzwamuheto, kuko yari kuba ari umunyarwanda akaba n’umunyagisaka.

Kugira ngo baramire u Rwanda byasabye ko Robwa apfa umwana ntavuke, ariko mu muco wa kera byari ngombwa ko hagira n’undi bapfana maze bikitwa ko batabaye u Rwanda.

Bararaguje ngo barebe uwo indagu zifata, maze zemeza ko ari Nkurukumbe nyirarume wa Ruganzu Bwimba ugomba kuba umutabazi w’umucengeri. Abyumvise ahimba amayeri atuma atajya gupfira u Rwanda, nuko birakaza umwami Ruganzu maze ubwe yiyemeza kwitabarira bucengeli.

Aba abaye umwami wa mbere n’uwa nyuma mu mateka y’u Rwanda umeneye igihugu amaraso.

Ruganzu II Ndoli yategetse u Rwanda nyuma y’imyaka 11 rwarigaruriwe n’abanyamahanga

Undi mwami wamenyekanye cyane, wagaragaje ubutwari bukomeye ni Ruganzu Ndoli, wategetse u Rwanda akiri muto ku myaka 33, akarukura mu maboko y’abanyabungo nyuma y’imyaka 11 bararwigaruriye.

Nizeyimana Innocent agaruka ku butwari bwe, yavuze ko hambere havutse amakimbirane hagati ya se Ndahiro II Cyamatare n’abavandimwe be aribo Byinshi na Bamara maze bagambanira u Rwanda, bituma rwigarurirwa n’abanyabungo.

Akomeza avuga ukuntu barugabagabanye, bakarutobanga aho bamaze imyaka 11 bari mu Rwanda.

Abahanuzi b’umwami babonye ko ibintu biri gufata indi ntera ni ko guterana babwira umwami ko yashaka ukuntu yohereza Ruganzu Ndoli kwa nyirasenge Nyabunyana wari warashatswe n’umwami w’i Karagwe (Tanzania y’ubu).

Yagiye kwa nyirasenge mu buryo bwo kumuhungisha kugira ngo atazapfa, arindwe neza, yigishwe ategurwe kuzaba umwami, azaze aje gutabara u Rwanda.

Ni ko byagenze koko, arategurwa agaruka mu Rwanda. Yagiye mu Rwanda se na nyina na nyirakuru barishwe, aza afite agahinda ariko ntiyihorera, aza aje gutabara abanyarwanda.

Ntabwo yagiye arwituramo kuko nta bantu bari bamuzi uretse abiru n’abatware b’i Bwami, yagiye arurwanirira yica mwene se Byinshi wari waragambaniye u Rwanda, aramunyaga igihugu agisigaramo wenyine ari umwami w’u Rwanda.

Ruganzu Ndoli yamenyekanye ku bintu byinshi, birimo ko yari azi ubwenge bwinshi cyane, yiswe Cyambarantama ndetse n’ingabo ze zitwaga ibisumizi.

Hari n’abandi bami benshi bagaragaje ubutwari barimo na Mutara III Rudahigwa, bimanye u Rwanda bakanarurwanira ishyaka.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .