Menya Amanda Gorman, umusizi ukiri muto waciye agahigo mu irahira rya Perezida

Yanditswe na Uwiduhaye Theos
Kuya 21 Mutarama 2021 saa 02:18
Yasuwe :
0 0

Umusizi w’imyaka 22 witwa Amanda Gorman yaciye agahigo ko kuba uwa mbere wavuze umuvugo akiri muto kandi w’umwana, mu birori byo kurahira kwa Perezida wa Leta Zunze Ubumwe za Amerika.

Uyu mukobwa yanditse amateka ku mugoroba wo kuri uyu wa Kabiri tariki 20 Mutarama 2021, ubwo yavugaga umuvugo mu muhango wo kurahira kwa Perezida mushya wa Leta Zunze Ubumwe z’Amerika, Joe Biden na Visi Perezida Kamala Harris.

Uyu mukobwa yavuze umuvugo yise “The Hill We Climb” cyangwa “Umusozi tuzamuka’’ mu rurimi rw’Ikinyarwanda.

Ni umuvugo yari amaze ibyumweru bibiri ari gukoraho, ugaruka ku bumwe n’ubwiyunge ku banyamerika.

Avuga ko guhimba uyu muvugo ari kimwe mu bintu by’ingirakamaro yakoze mu buzima bwe, ati “Nari mfite ibintu byinshi, ariko mu by’ukuri ni kimwe mu bintu by’ingenzi nakoze mu buzima bwanjye bujyanye no kuvuga imivugo. Naravugaga nti ningerageza kuzamuka uyu musozi rimwe, nzagera kure.”

Imwe mu mirongo igize uyu muvugo yayanditse ku wa 6 Mutarama 2021, ubwo ibihumbi by’abaturage bashyigikiye Donald Trump binjiraga mu Nteko Ishinga Amategeko ya Amerika ubwo abayigize bari bateranye ngo bemeze intsinzi ya Joe Biden, bakarwana inkundura na Polisi bigateza impagarara muri Amerika.

Uyu mukobwa w’umwiraburakazi ufite inkomoko ku bacakara yarezwe na nyina gusa. Afite inzozi zo kuzaba Perezida umunsi umwe. Yatangiye kugaragaza impano yo kuvuga imivugo akiri muto ndetse atangira kuzamura impano ye vuba cyane. Yakuriye mu Mujyi wa Los Angeles aho nyina yari umwarimu.

Ku myaka 16 yahize abandi mu mivugo mu marushanwa y’abakiri bato muri Los Angeles. Imyaka mike yakurikiyeho ubwo yigaga ibijyanye na ‘Sociologie’ muri Harvard yahize abasizi ku rwego rw’igihugu bakiri bato.

Nyuma yo kwigaragaza mu irahira rya Joe Biden, yashimwe na benshi barimo Barack Obama ndetse n’umugore we, Michelle Obama yagaragaje uburyo yakozwe ku mutima n’umuvugo wa Amanda Gorman.

Ati “ Hamwe n’amagambo ye akomeye kandi akora ku mutima, Amanda Gorman atwibukije imbaraga dufite mu gusigasira demokarasi. Komeza urabagirane Amanda mfite amatsiko y’ibyo uzakora mu bihe biri imbere.”

Abandi bantu bakomeye barimo Oprah Winfrey bose bagaragaje ko batewe ishema n’uyu mukobwa w’umwiraburakazi wanditse amateka akomeye.

Abari bari mu itsinda ryateguraga irahira rya Joe Biden bahamagaye uyu mukobwa mu mpera z’ukwezi gushize. Yavuze ko atari yahawe amabwiriza y’ibijyanye n’umuvugo we. Yahamagawe biturutse ku mugore wa Joe Biden, Jill Biden wabonye inyandiko ze mu isomero.

Yagize ati “Nta mabwiriza bari bambwiye ajyanye n’ibyo ngomba kwandika. Insanganyamatsiko y’irahira yari ‘ubumwe bwa Amerika’ rero ubwo numvaga ko ariyo nsanganyamatsiko yabo byaranyoroheye kuko nanjye ni cyo kintu nashakaga kwandikaho mu muvugo wanjye, ku bumwe bwa Amerika.”

Uyu mukobwa yabonye izuba mu 1998 avukira mu Mujyi wa Los Angeles, yakuranye n’impanga ye yitwa Gabriella na nyina w’umwarimukazi.

Mu 2015 yashyize hanze igitabo cye cya mbere cy’imivugo “The One for Whom Food is Not enough” gikubiyemo insanganyamatsiko zitandukanye zirimo izivuga ku burenganzira bw’abagore, ubwoko n’inkomoko n’abanyafurika baba muri Amerika.

Mu bantu afatiraho icyitegererezo harimo Winston Churchill wigeze kuba Minisitiri w’Intebe w’u Bwongereza, Martin Luther King Junior na Malala Yousafzai umukobwa w’umunya-Pakistan watsindiye igihembo cy’amahoro mu 2013.

Amanda afite inzozi zo kuziyamamariza kuzaba Perezida wa Leta Zunze Ubumwe za Amerika mu 2036 ubwo uzaba afite imyaka 38. Uretse kuvuga imivugo, ni n’impirimbanyi y’uburenganzira bwa muntu.

Uyu mukobwa w'imyaka 22 yubatse amateka yo kuba umuntu muto uvuze umuvugo ku irahira rya Perezida wa Amerika
Kamala Harris yashimiye uyu mukobwa ku bw'ubuhanga bwe

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .