Kwagura Urukari no kubaka Umudugudu Ndangamuco: Umushinga wihariye mu Karere ka Nyanza

Yanditswe na Prudence Kwizera
Kuya 8 Gashyantare 2021 saa 07:36
Yasuwe :
0 0

Mu Karere ka Nyanza hatangiye umushinga wo kubaka umudugudu Ndangamuco (Nyanza Cultural Village) no kwagura Urukari kugira ngo ako karere kabe izingiro ry’ubukerarugendo bushingiye ku muco n’amateka.

Ni umushinga watangiye ku bufatanye bw’Akarere ka Nyanza n’Inteko y’Umuco, ukaba uzakorerwa ahitwa mu Rukari ahari Ingoro y’Abami b’u Rwanda no mu nkengero zaho ndetse no hafi y’Icyuzi cya Nyamagana.

Umuyobozi w’Akarere ka Nyanza, Ntazinda Erasme, yabwiye IGIHE ko batangiye uwo mushinga ari umwihariko bafite nk’icyerekezo cy’Akarere.

Ati “Icyerekezo cy’akarere ni ukuba izingiro ry’ubukerarugendo bushingiye ku muco n’amateka. Icyakozwe ni uko twagerageje gushaka uburyo bwo kwagura Urukari dufatanyije n’Ikigo cy’Igihugu cy’Ingoro z’Umurage w’u Rwanda.”

Yavuze ko abaturage batuye mu nkengero z’Urukari aho ruzagurirwa bamaze guhabwa ingurane hakaba hasigaye igikorwa cyo gushaka amafaranga kugira ngo kubaka bitangire.

Yakomeje avuga ko umushinga wo kwagura urukari uzajyana no kubaka Umudugudu Ndangamuco hafi y’icyuzi cya Nyamagana. Uwo mudugudu ubwawo uzakorerwa ku buso bwa hegitari icyenda, kandi ibikorwa byo kwimura abaturage byari byaratangiye ariko bidindizwa n’icyorezo cya Covid-19.

Mu bazimurwa ahazajya uwo mudugudu hose hamaze kwishyurwa ahangana na hegitari ebyiri, bikaba biteganyijwe ko abatarishyurwa bo bazongera kubarirwa kuko ibiciro byahindutse.
Ntanzida ati “Hari habazwe amafaranga agera muri Miliyoni 200 ariko tuzongera tubare kuko hashize hafi imyaka ibiri, ubwo tuzongera tubare tubihe agaciro bundi bushya.”

Akarere ka Nyanza kabumbatiye amateka menshi yiganjemo ayo hambere kuko Nyanza yabaye Umurwa Mukuru w’Ubwami kuva mu 1899 kugeza mu mu 1962.

I Nyanza hatuwe n’Abami bane ari bo Kigeli IV Rwabugiri wari utuye ku misozi ya Mwima na Mushirarungu; Yuhi IV Musinga watuye i Mwima na Gakenyeri; Mutara III Rudahigwa watuye mu Rukali ndetse n’Umwami Kigeli V Ndahindurwa watuye i Busasamana.

Hari ingoro y’Abami yo mu Rukari, Ingoro y’Umurage wo Kwigira, Umusezero w’Abami, Ibigabiro, Inzira Gakondo z’Ubukerarugendo; haboneka Amariba ya Mutende yafukuwe ku ngoma y’Umwami Mutara III Rudahigwa, aho Inyambo ze ndetse n’inka z’abaturage ziturutse imihanda yose zashokaga.

Hari kandi icyuzi cya Nyamagana cyafukujwe n’Umwami Mutara III Rudahigwa afatanyije na agoronome w’Umubiligi witwaga Dubois. I Nyanza kandi hafatwa nk’igicumbi cy’ubutabera kuko hahoze urukiko umwami yaciragamo imanza.

Inyubako ziri mu Mujyi wa Nyanza zose zatakishijwe imitako gakondo ifite ibisobanuro bijyanye n’umuco nyarwanda hagamijwe kuwurimbisha ugasa neza; kubungabunga amateka ndetse no kongera umubare w’abawusura kandi bakahatinda.

Hashyizweho kandi Inzira eshatu z’Ubukerarugendo gakondo za kinyarwanda zizwi na The Nyanza Cultural Trials, zitezweho kongera umubare w’abahasura.

Icyorezo cya Covid-19 kitaraza Akarere ka Nyanza kasurwaga na ba mukerarugendo basaga ibihumbi 70 ku mwaka.

Akarere ka Nyanza kabumbatiye amateka menshi yiganjemo ayo hambere kuko Nyanza yabaye Umurwa Mukuru w’Ubwami kuva mu 1899 kugeza mu mu 1962
I Mwima mu Karere ka Nyanza hari Umusezero w’Abami nka kimwe mu biranga amateka
I Nyanza hashyizweho inzira eshatu z’Ubukerarugendo gakondo za kinyarwanda zizwi na The Nyanza Cultural Trials.
I Nyanza mu Rukari hagaraga inka z’Inyambo
I Nyanza mu Rukari hagiye kwagurwa
I Nyanza mu Rukari mu Kagari ka Rwesero mu Murenge wa Busasamana niho hari Ingoro y’Abami, hahoze n'urugo rw’Umwami Mutara wa III Rugahigwa
Ingoro y’Umwami Mutara wa III Rudahigwa yubatswe n’Ababiligi mu mwaka wa 1932
Inyubako ziri mu Mujyi wa Nyanza zose zatakishijwe imitako gakondo ifite ibisobanuro bijyanye n’umuco nyarwanda hagamijwe kuwurimbisha
Inzira z’ubukerarugendo gakondo za kinyarwanda zitezweho kongera umubare w’abasura Akarere ka Nyanza.
Umuyobozi w’Akarere ka Nyanza, Ntazinda Erasme, yabwiye IGIHE ko batangiye uwo mushinga ari umwihariko bafite nk’icyerekezo cy’Akarere

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .