Kwamamaza

Intore z’Indatabigwi II zasabwe kwesa imihigo bitaba ibyo itorero rikavaho

Yanditswe kuya 13-10-2016 saa 10:58' na Niyonsenga Schadrack


Mu muhango wo kuvuga amacumu y’Itorero Indatabigwi II, Umutoza Mukuru Minisitiri w’Umuco na Siporo, Uwacu Julienne, yasabye umuhizi mukuru n’abandi bavuzi b’amacumu biganjemo abatoza n’intore bahagarariye abandi guharanira kwesa imihigo basinye bitaba ibyo Itorero ry’abo rigakurwaho.

Ibi Minisitiri Uwacu yabisabye Intore z’ Indatabigwi kuri uyu wa 12 Ukwakira 2016 mbere yo kuzemerera gusoma ku ntango y’abahizi ubwo zavugaga amacumu y’uko itorero zamazemo iminsi icumi mu Karere ka Burera ryagenze.

Itorero Indatabigwi n’Itorero rihurirwamo n’abahanzi b’ibihangano bitandukanye bo mu Rwanda, aho abaryitabira bigishwa guhanga ibihangano bya Kinyarwanda, guhanga ibihangano bigaragaza amateka nyayo y’u Rwanda n’ibindi bigaragaza umwimerere w’u Rwanda.

Muri iri torero harimo abahanzi b’abanyabugeni, abanyamideri, abakina ikinamico, abanyamuziki, abakina sinema, abanditsi ndetse n’abakozi ba MINISPOC n’ibigo biyishamikiyeho.

Mbere yo kwemera amacumu yari agejejweho, Minisitiri Uwacu yibukije izi ntore ko ibyo guhiga imihigo bigaherukira aho atari ubutwari. Yezemereye ubufasha bwose zizakenera kugira ngo zese imihigo.

Yagize ati “Nagira ngo mbasabe ntibirangirire aha uyu mugoroba. Njyewe ubutaha nitujya mu Itorero nzabasaba ko tubanza kuvuga amacumu dukora isuzuma rya ya mihigo twahize icyiciro cya mbere n’icya kabiri mbere y’uko tugera ku cya gatatu.”

Akomeza agira ati “Niba ntacyo byatumariye byarabaye umuhango cyangwa umugenzo, twigaye kuko tuzaba tutarashoboye gukora ibyo twiyemeje, ariko tunahagarikire aho ngaho kwangiza umwanya n’umutungo w’igihugu turebe ikindi tuwukoresha.”

Umuhizi Mukuru w’Itorero Indangamirwa II, yari Umunyamabanga Nshingwabikorwa w’Inteko Nyarwanda y’Ururimi n’Umuco, Dr Vuningoma James, wabanje gusobanurira Minisitiri Uwacu ibyo inzego zitandukanye zemereye Intore birimo kubarinda abiba ibihangano n’ababyigana, kubagira inama no gukomeza kuziba hafi kugira ngo zibashe kwesa imihigo.

Imihigo izi ntore zahize harimo guhanga indirimbo eshanu zirata umuco nyarwanda, abakina sinema biyemeje kwihesha agaciro mu byo bakora kandi bakabikora kinyamwuga, abanditsi biyemeje ko bazandika igitabo kiranga umurage wa Gihanga (inzira z’ubwiru) bakazajya banategura imurikabitabo (salon de livre) ngarukamwaka, abanyabugeni biyemeje kuzakorera hamwe ishusho ya Ruganzu na Nyirarumaga naho abanyamideri biyemeza kujya bategura imurika mideri.

Umutahira Mukuru w’Itorero ry’Igihugu, Boniface Rucagu, yemereye umutoza mukuru ko iyi mihigo izeswa, avuga ko kuba abahanzi baremeye kujya mu itorero ari ikimenyetso ko bazesa imihigo.

Ati “Nta kintu dukwiye gushima kitari ubushake bagize, abantu ntabwo ari abakozi ba leta ni abantu bikorera, abantu biha gahunda ariko bemeye guhagarika ibyo bikoreraga byose bamara iriya minsi yose mu itorero.”

Iki cyiciro cya kabiri cy’Indatabigwi 211, cyatangiye gutozwa ku wa 17 Nzeri, gisoza kuwa 27 Nzeri 2016, gitorezwa mu kigo cy’amahugurwa cya Nkumba, giherereye mu karere ka Burera, mu Ntara y’Amajyaruguru.

Abatoza b'Intore bashimiwe inyigisho bahaye Intore z'Indatabigwi II
Inzego zinyuranye zemeye guha ubufasha izi ntore mu rwego rwo kuzifasha kwesa imihigo
Minisitiri Uwacu yasabye izi ntore kwesa imihigo uko bikwiye bitaba ibyo Itorero rikavaho
Abatoza n'Intore bishimiye uko Itorero ryagenze
Umuhizi mukuru yemerewe n'intore kuzamufasha kwesa imihigo abona gusangiririra na Minisitiri ku ntango y'imihigo

Kwamamaza

Kwamamaza
IZINDI NKURU WASOMA
Isengesho ry’umugore utwite
2016-11-03 13:24:00
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Tuesday 6 Ukuboza 2016
Copyright © 2009 -2014 - IGIHE Ltd - All Rights Reserved