Inkomoko y’Insigamugani ‘Arasera i Gahanga’

Yanditswe na Nsanzabera Jean de Dieu
Kuya 11 Nzeri 2018 saa 12:22
Yasuwe :
0 0

Uyu mugani bawuca iyo babonye umuntu utonganyijwe n’umutegeka amuziza ubusa ariko we akamwihorera ntagire iryo arevura nyamara ashirira imbere; ni bwo bavuga bati “Arasera i Gahanga” ( i Gahanga ni mu mutwe).

Byakomotse ku muja Nyirampatswe, wari umusyi w’ibwami kwa Nsoro Bihembe i Bugesera.

Nyuma yacikishijwe [gutoroka] n’umujinya w’inkoni yakubitirwaga akamama, maze Cyilima Rugwe amwubakira i Gahanga na Burema mu Bwanacyambwe (Kigali), ahakomereza umwuga we w’ubusyi. Hari ahagana mu 1400.

Kuri iyo ngoma, Kigali cya mwendo yari ikiri iy’u Bugesera itwawe na Nsoro Bihembe.

Bukeye Cyilima atuma kuri Nsoro Bihembe, ati “Uzi ko umbyaye kandi napfushije data ntiwandeba; none ndagusaba ikibanza i Kigali kuko ndahakunda ”.

Intumwa ya Cyilima iragenda isohoza ubutumwa. Imaze kubuvuga, Nsoro ateranya abantu bakuru arabubabwira. Yungamo ati “Kandi n’ubwo ansaba ubwo aransaba anangaya kuko yantumyeho yapfushije se sinamureba ”.

Abakuru baramusubiza, bati “Ubwo uwo mwana agusabye kandi ari imfubyi yawe, uhamwimye waba umuhemukiye ”, bati “Hamuhe nta cyo hatubije u Bugesera”.

Nsoro arabyemera; ashaka intumwa ijyana n’iya Cyilima ijya kumuha ikibanza. Igezeyo ibwira Cyilima, iti “Nsoro yantumye kuguha ikibanza n’ingobyi y’urugo mu mpinga ya Kigali cya Mwendo (ahitwa Busasanzobe)”.

Ubwo Cyilima ava i Nyamweru ajyana n’intumwa ya Nsoro imuha ikibanza n’ingobyi y’urugo.

Amaze kukibona ashaka inka z’imbyeyi ebyiri aziha abantu bajyana n’intumwa ya Nsoro gukura ubwatsi. Inka bazimurikira Nsoro bati “Ngizo inka agukurije ubwatsi, ngo aragushimiye cyane”.

Nuko Cyilima atura i Kigali arahakomeza. Ingoma zikabikira zikabambura, bikumvikana i Bugesera kuko Kigali yirengeye.

Cyilima aranezerwa, bukeye arashyekerwa yongera gusaba Nsoro igikingi i Gahanga na Burema; amutumaho, ati“Wamugiriye ubuntu umuha ikibanza n’ingobyi y’urugo, none aragusaba n’agakingi i Gahanga na Burema ko kwiragiriramo inka ye”. Inturnwa iragenda ibibwira Nsoro. Nabyo arabyemera arahamuha. Cyilima ahubaka ikiraro cy’inka ze.

Ubwo i Bugesera hari umugore w’umuja wa Nsoro witwa Nyirampastwe. Umurimo we wari uwo gusya ifu y’inono bavugagamo umutsima bitaga ingezi.

Iyo fu bayisyaga nk’iminsi itandatu yamara kunogera bakabona kuyarika. Uko bwije n’uko bukeye, uwo mugore akumva ingoma za Cyilima zivugira i Kigali akazumviriza.

Bukeye yegera Nsoro aramubwira, ati “Abantu bakugiriye inama yo guha Cyirima ikibanza i Kigali bakugiriye nabi! Wowe se hari umwami uhabwa ikibanza?”

Nsoro abyumvise bimujyamo; atekerereza abatware uko uwo mugore yamubwiye. Abatware bati “Ni amanjwe y’ako kagore”. Nibwo batangiye kwanga Nyirampatswe bati: “Nagumya kubivuga bizadukorera ishyano”.

Bajya inama yo kumurega ngo bamwirukanishe. Batangira koshya abanyagikali kujya bavuga ko asigaye yararenzwe ntakore umutsima uko asanzwe.

Bakomeje kumureguza Nsoro na we arabyemera; aramuhamagaza aramutonganya. Nyirampatswe aramwihorera ntiyakoma. Nsoro ategeka kujya bamukubita.

Batangira ubwo bakajya bamukubita. Inkoni zimaze kumurembya agira umujinya aracika; acikira mu Rwanda asanga Cyilima i Kigali.

Agezeyo amubwira ko acitse Nsoro. Cyilima amubaza icyo yamujijije n’icyo we yamukoreraga. Undi arabimutekerereza, amumenyesha ko yari umusyi w’inono.

Nuko Cyilima amushyira mu kiraro cy’inka ze z’i Gahanga na Burema; bakajya bahamusangisha uburo akabusya. Inkuru igera i Bugesera, bati “Nyirampatswe yarakize birambuye, asigaye asera i Gahanga aho Cyilima yamwubakiye”.

Kuva ubwo mu Rwanda no mu Bugesera babona umuntu urakaye cyane ari ko akamarizayo ntakome, bakamugenurira kuri Nyirampatswe wavanwe i Bugesera n’umujinya w’inkoni zo kwa Nsoro, yagera mu Rwanda agakomeza umwuga we w’ubusyi ari i Gahanga; bakavuga rero, bati “Naka arasera i Gahanga”

Gusera igahanga = Kurakarira imbere


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza