Ikinyarwanda cyahawe intebe muri Miss Rwanda 2020, urundi rurimi ruzakoreshwa ku bushake bw’uhatana

Yanditswe na Nsengiyumva Emmy
Kuya 20 Ugushyingo 2019 saa 06:59
Yasuwe :
0 0

Abakobwa bifuza guhatanira ikamba rya Miss Rwanda 2020 batangiye kwiyandikisha binyuze ku rubuga rw’irushanwa, mu mabwiriza basabwe kuba bujuje harimo impinduka kuko Ikinyarwanda cyashyizwe mu ndimi zemerewe gukoreshwa.

Abifuza guhatanira ikamba rya Miss Rwanda 2020 bashyiriweho ibyo bagomba kuba bujuje nkuko byatangajwe na Rwanda Inspiration Back Up isanzwe itegura iri rushanwa.

Amabwiriza cyangwa ibisabwa kugira ngo umukobwa abashe kwiyandikisha muri Miss Rwanda ni;

- Kuba ari Umunyarwandakazi

- Kuba afite imyaka hagati ya 18 na 24

- Kuba yararangije amashuri yisumbuye

- Kuba avuga neza Ikinyarwanda. (Kuba azi urundi rurimi rwiyongera ku rurimi kavukire mu zemewe n’amategeko mu Rwanda nabyo biremewe)

- Kuba afite uburebure guhera kuri 1,70 m

- Kuba afite BMI iri hagati ya 18.5 na 24.9

- Kuba atarigeze abyara

- Kuba yiteguye kuguma mu Rwanda byibuze mu gihe cy’umwaka nyuma yo gutorwa nka Nyampinga

- Ntagomba gushyingirwa cyangwa gushinga urugo mu gihe akiri Nyampinga

- Kuba yiteguye guhagararira u Rwanda ahantu hose n’igihe cyose abisabwe cyangwa biri ngombwa

- Kuba yiteguye gukurikiza no kubahiriza amahame yose n’amabwiriza agenga ba Nyampinga

Nyuma yo kunyuza amaso muri ibi bisabwa umukobwa ugiye kwiyandikisha muri Miss Rwanda 2020, twasanze umukobwa asabwa kuba azi Ikinyarwanda mu gihe kumenya urundi rurimi byaba akarusho. Bitandukanye n’ibyakorwaga mbere.

Ubusanzwe mu mategeko y’irushanwa bavugaga ko umukobwa agomba kuba azi Ikinyarwanda n’urundi rurimi muri eshatu z’amahanga zemewe mu Rwanda.

Umuyobozi wa Rwanda Inspiration Back Up, Ishimwe Dieudonne, yabwiye IGIHE ko aribyo koko iryo bwiriza ryahinduwe.

Ati ”Ni mu rwego rwo guha agaciro ururimi rwacu ariko nanone no gufasha umukobwa kwisobanura uko ashaka mu gihe umushinga we waba uri mu rurimi kavukire.”

Yakomeje agira ati ”Indimi z’amahanga ntabwo tuzikuyeho ariko noneho ntabwo tubujije n’utazizi, abakobwa bose bahawe amahirwe. Ikinyarwanda ni cyo cy’ingenzi, izindi ndimi zizakoreshwa ku mahitamo y’uhatana.”

Prince Kid yavuze ko mu gutanga amanota hazitabwa cyane kubyo umukobwa avuga, ubwiza ndetse n’umuco.

Ubusanzwe umukobwa yasabwaga kuba azi Ikinyarwanda n’urundi rurimi rumwe rw’amahanga, uburyo abahatana bitwaraga mu ndimi z’amahanga byatumye benshi bibaza impamvu abategura Miss Rwanda bazibandaho nyamara hashobora gukoreshwa ururimi kavukire, aha bagaraazaga ko icyingenzi ari ikiri mu muntu atari ururimi akivugamo.

Umwe mu bagize icyo bavuga ku ikoreshwa ry’indimi z’amahanga ni Ange Kagame,ubwo hasozwaga Miss Rwanda 2019 yagaragaje ko gukoresha Ikinyarwanda gusa muri iri rushanwa byaba bihagije.

Icyo gihe yagize ati ”Kuvuga mu Kinyarwanda byaba bihagije. Mu irushanwa rya Miss Universe baba bafite abasemuzi, basobanurira abatavuga Icyongereza, wakongeraho ibibazo ubwabyo bibajijwe mu Cyongereza cya ntacyo”.

Igitekerezo cya Ange Kagame cyakiriwe neza n’abamukurikira kuri Twitter, urebye uburyo abategura irushanwa babihinduye basa n’abemeranya neza n’ibitekerezo bya benshi bifuzaga ko Miss Rwanda yajya ikorwa mu Kinyarwanda gusa.

Reba hano igitekerezo cyari cyatanzwe na Ange Kagame ku irushanwa rya Miss Rwanda

Umukobwa uzegukana ikamba azasimbura Miss Nimwiza Meghan
Ibyo umukobwa ushaka kwitabira Miss Rwanda 2020 agomba kuba yujuje

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza