Guhana igihango: Umuhango w’ikumiracyaha mu Rwanda rwo hambere

Yanditswe na IGIHE
Kuya 4 Nyakanga 2018 saa 03:00
Yasuwe :
0 0

Mu Rwanda rwo ha mbere, hakorwaga imihango myinshi ijyanye n’ubuzima bw’igihugu, imibereho myiza y’abaturage, iy’intambara n’iyindi. Muri iyo mihango habagamo n’umuhango ushimangira imibanire y’abantu, ikabarindira ubumwe n’urukundo ntibigire icyasha.

Umuhango wo kunywana, guhana igihango cyangwa se guca ku nda ni umwe mu yakorwaga mu Rwanda rwo ha mbere ariko itagikorwa. Wari ufite imvano yawo yihariye ndetse n’icyo wari umariye Abanyarwanda nk’uko tubikesha igitabo “Intwari z’imbanza, zubatse u Rwanda rugahamya igitinyiro” cyanditswe na Nsanzabera Jean de Dieu, inzobere mu Muco, ubusizi n’amateka y’u Rwanda.

Umwami w’u Rwanda Cyilima I Rugwe wategetse u Rwanda ahasaga mu wa 1345-1378, yazunguye imigambi ya se Bwimba yakomoraga mu ihame ry’umushinga wo kubaka u Rwanda, mu gisata cyo kwagura igihugu no kugihuza.

Ku ngoma ye yashyizeho intego itagira igisibya yo kwigarurira ingoma y’u Buliza yagengwaga n’Abasinga b’Abongera babarizwaga mu burengerazuba bw’ingoma y’i Gasabo yagengwaga na Cyilima Rugwe muri ibyo bihe.

Aho ubu ni mu Mirenge imwe n’imwe, igize Akarere ka Gasabo y’Iburengerazuba (Jali, Gatsata, na Jabana), yabarizwaga kandi mu mirenge imwe n’imwe igize Akarere ka Rulindo (Shyorongi, Rusiga, Masoro, Ngoma, Murambi, Ntarabana, Cyinzuzi, Mbogo, Buyoga, Tumba, Bushoki na Burega) u Buliza kandi, bwakoraga mu Mirenge imwe n’iwe y’Akarere ka Gakenke (Muhondo, Rushashi, Ruli, Coko, Minazi, Munyongwe, Mataba na Gakenke).

Umugambi wo kwivugana umwami Mugina w’u Buliza yashyizwe awugezeho, nuko anyaga ingabe yabo Bushizimbeho, ubutaka bwabo abwomeka ku Rwanda ingoma y’u Buliza izima ityo.

Ubwo umwami Cyilima Rugwe yigaruriraga u Buliza, akomeka ubutaka bwayo ku Rwanda, umubare w’abarutuye na wo wahise wiyongera, kuko Abanyabuliza na bo bahise barwegukira, baba abaturage barwo nk’abandi bose.

Rugwe yaje gutangira kwiga ingamba zihamye zazamufasha kubacira imanza, dore ko bari bamaze kuba benshi nuko afata urukiko rw’umwami rwariho icyo gihe, arwongeraho n’izindi nkiko, kugira ngo arusheho gutanga ubutabera bwunga.

Muri uko gutekereza uburyo yazatangamo ubutabera bubereye abaturage, nibwo yibajije ikibazo kigira kiti “Nubwo nshyizeho inkiko zizajya zimfasha gutanga ubutabera mu baturage, ariko na none, ntabwo nkwiye kuyobora igihugu kirunzemo abanyabyaha benshi, bazakomeza kumbera umutwaro wo guhora mu manza zabo, cyangwa se ngo abaturage bahore baza gutanga ubuhamya aho kujya mu mirimo iteza imbere imiryango yabo imbere n’igihugu muri rusange.”

Icyo kibazo yakomeze kwibaza, ni cyo cyamugejeje ku gikorwa cyo gutekereza uburyo yakumira ibyaha bitaraba, akanarema umuhango ugizwe n’imiziro itoza abantu umuco wo gukundana, kuzirikanana no kudakorerana ibyaha. Bitewe n’uko yagiraga ibitekerezo binyaruka, niko guhita atekereza kandi ashyiraho umugenzo wo kunywana cyangwa se guca kunda nk’ikimenyetso cy’abahanye igihango cyo kutazahemukirana.

Cyilima Rugwe ni we wabaye umutekereza wa mbere mu mateka y’u Rwanda, uwo muhango wo guhana igihango n’imigenzo yawo yarimo kunywana cyangwa se guca ku nda awuhamya nk’uw’ikumiracyaha kitaraba mu gihugu.

Uburyo bwo gukumira icyaha kitaraba, yabuhanze kugira ngo abaturage bafashe ubuyobozi bw’igihugu kwirindira umutekano no kurwanya ingeso mbi. Uburyo yakoreheje nibwo bwiswe mu mateka y’u Rwanda “Kunywana, guca ku nda” ari byo byari bibumbiye mu muhango wo “Guhana Igihango”.

Kunywana cyangwa guca kunda ni imwe mu migenzo nshimangira-bumwe n’urukundo y’Abanyarwanda. Ni umugenzo wakorwaga n’abantu babiri cyangwa se barenze, byo gushaka kugaragaza ko bazakundana mu bihe byose nta n’umwe watatira igihango ngo ahemukire undi.

Mu guhana igihango cyangwa se kunywana, buri muntu mu bifuza kunywana, yicaga indasago ku nda, undi agafata amaraso ahavuye akayanywa, n’undi akabigenza atyo.

Mu kunywa ayo maraso hari amagambo y’indahiro baturiranaga hagati yabo, aho bagiraga bati “Ndahiye imbere y’Imana y’i Rwanda ko ntazatatira igihango tugiranye, ningitatira kizansame.” Gusama umuntu kw’igihango mu bakigiranye ni ukumwica akavaho, cyangwa se akagerwaho n’ibyorezo bitabarika by’uburwayi n’ibimukokoraho amaboko y’ubutunzi n’umuryango.

Ibyo Abanyarwanda babyemeraga nk’ihame ntakuka, kandi koko bikababera uko babyizera. Uwaramukaga arenze ku masezerano yagiranye n’undi ariko baranywanye, igihango cyaramusamaga agapfa cyangwa se agaterwa n’ibiza.

Mu migenzo yo guca ku nda no kunywana, nibyo byashimangiraga ko abantu bahanye igihango koko cyo kutazahemukirana bo n’imiryango bakomokamo.

Umuntu yashoboraga kunywana n’umuntu uwe cyangwa se benshi, ibyo bigatuma umuntu agira abanywanyi benshi.

Uko barushagaho guhererekanya iyo migenzo, niko yarushagaho gukwira igihugu cyose, abaturage bose bisanga barahanye igihango.

Umuhango wo guhana igihango, ni umwe yagiraga imiziro myinshi izirikira abantu mu rukundo, ikabarindira amasezerano y’ubumwe n’ubudahemukirana. Ibyo byarushagaho gutuma Abanyarwanda baziririza umugenzo wo kunywana no guhana igihango, kandi bakanawukunda kuko wabafashaga guhamya ubwizerane hagati yabo.

Ubwo buryo bwo gukumira icyaha kitaraba, bwabaye nk’ubucamanza butagaragarira amaso mu Banyarwanda, aho umuntu yashakaga guhemukira undi cyangwa se igihugu, akabaza umutima we agasanga bidakwiriye bitewe n’igihango bagiranye. Ibyo byatumye ku ngoma ya Rugwe n’izindi zayizunguye nyuma haba imanza nke cyane mu gihugu, kuko zakumirwaga zitaraba.

Abanyarwanda barushijeho kwimakaza umuco w’ubwizerane, urukundo, kuzirikanana, gusananirana, ubunyangamugayo, n’ubuzezwabintu.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza