Akanyamuneza ku Rwanda kubona Urukerereza ruseruka mu irahira rya Perezida Kenyatta

Yanditswe na Mathias Hitimana
Kuya 28 Ugushyingo 2017 saa 02:32
Yasuwe :
1 0

Itorero Ndangamuco ry’Igihugu “Urukerereza” ryaserutse mu birori bikomeye by’irahira rya Perezida wa Kenya, Uhuru Kenyata, kuri uyu wa Kabiri.

U Rwanda na Kenya nk’ibihugu bifitanye umubano mwiza, Perezida Paul Kagame yari mu bakuru b’ibihugu barenga 10 bitabiriye irahira rya Kenyatta, barimo Yoweri Kaguta Museveni wa Uganda; Ian Khama wa Botswana; Edgar Lungu wa Zambia; Ismaïl Omar Guelleh wa Djibouti; Hage Geingob wa Namibia; Faure Gnassingbé wa Togo; Mohamed Farmajo wa Somalia na Minisitiri w’Intebe wa Ethiopia, Hailemariam Desalegn.

Uretse kuba Perezida Kagame yari muri ibyo birori, Urukerereza narwo ruri mu batumiwe kubisusurutsa. Rwagaragaye rubyina imbyino gakondo z’i Rwanda, n’abakaraza mu murishyo w’ingoma uryoheye amatwi.

Abanyarwanda bakirurabukwa kuri televiziyo muri ibyo birori bikomeye, bagaragaje ku mbuga nkoranyamabaga ko bibateye ishema.

Umuyobozi w’Ishami rishinzwe guteza imbere Umuco muri Minisiteri y’Umuco na Siporo, Steven. Mutangana, yabwiye IGIHE ko itumirwa ry’Urukerereza mu birori bikomeye mu mahanga bituruka ku buryo babona imbyino gakondo z’u Rwanda.

Avuga ko abayobozi n’abashyitsi bagenderera u Rwanda, Urukerereza rujya kubakira rukabasusurutsa, na nyuma nimugoroba mu gihe cyo kubakira rukajyayo rukabyina, bigatuma abanyamahanga barwishimira.

Kubw’ibyo, Mutangana avuga ko bishoboka ko abateguye ibirori bikomeye by’irahira rya Perezida wa Kenya bishimiye uko Itorero ry’igihugu ribyina, bakaritumira.

Urukerereza rwaserutse mu irahira rya Perezida Kenyatta

Mu irahira rya Perezida Kagame, ryari ryitabiriwe na Perezida Kenyatta, icyo gihe Urukerereza rwasusurukije abanyacyubahiro n’imbaga yari muri Stade Amahoro.

Uretse muri Kenya nk’igihugu cyo mu Karere, Perezida wa Misiri, Abdel Fattah al-Sisi, aherutse gutumira Urukerereza mu gususurutsa urubyiruko rugera ku 3 200 rwaturutse mu bihugu 113, rwitabiriye ihuriro mpuzamahanga ry’urubyiruko “World Youth Forum”.

Muri Kanama 2017, ubwo Perezida wa Misiri yari mu ruzinduko i Kigali, yanyuzwe no gutaramirwa n’Urukerereza, asaba ko ahabwa umwanya akabashimira abakora mu biganza.

Kuba Urukerereza rutumirwa no mu mahanga, Mutangana avuga ko ari isomo rikomeye ku Banyarwanda mu gusigasira umuco wabo.

Yagize ati “Niba n’abanyamahanga babishima bigera kuri urwo rwego n’Abanyarwanda bakwiye kuba bishimira umuco wabo, by’umwihariko imbyino za Kinyarwanda, guhera mu bakiri bato, bikazamuka mu rubyiruko, ababyeyi, mbese Abanyarwanda mu byiciro bitandukanye bagaha agaciro umuco wabo, bakabona ko n’abarangaraga bakavuga ko iby’ahandi ari byo byiza, babona ko ahubwo abanyamahanga barimo bakunda umuco wacu, bakavuga bati ‘nibaze bawutwereke’.”

Irahira rya Perezida Kenyatta ryitabiriwe n'abakuru b'ibihugu byinshi barimo Perezida Kagame
Perezida wa Misiri ari i Kigali, yanyuzwe no gutaramirwa n’Urukerereza, abashimira abakora mu biganza

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza