Abahanzi b’ikinamico basabwe kwibanda ku zijyanye n’amateka y’u Rwanda

Yanditswe na Mukahirwa Diane
Kuya 28 Werurwe 2021 saa 04:30
Yasuwe :
0 0

Abahanzi bakora ikinamico muri iki gihe basabwe kwibanda cyane ku kinamico zigaruka ku mateka y’u Rwanda, kuko zifasha abantu gukomeza indangagaciro zabo no kumenya neza amateka yabo.

Ikinamico ni bumwe mu buvanganzo bwifashishwa mu gutanga ubutumwa butandukanye buhindura imitekerereze n’imyitwarire ya benshi, kuri ubu mu Rwanda uko zikorwa biri gutera imbere kuko hari uburyo butandukanye bwo kuzitambutsa harimo n’Ikoranabuhanga.

Byari bigoye mu myaka yo hambere ko buri wese yakwandika ikinamico ikagera kuri benshi kuko yacaga ahantu hake, ariko ubu hari ibitangazamakuru n’imbuga nkoranyambaga ku buryo ntawagorwa no gutambutsa ikinamico.

Kuri uyu wa Gatandatu abitabiriye inama nyunguranabitekerezo ku iterambere ry’ikinamico mu Rwanda, bagagaraje ko abahanzi bakwiriye guhanga ikinamico zigaragaza umuco n’amateka by’u Rwanda kuko bituma abakiri bato bamenya amateka yabo.

Ni ikiganiro cyateguwe n’Inteko y’Umuco cyatambutse mu buryo bw’ikoranabuhanga mu rwego rwo kwirinda icyorezo cya Covid-19. Iki kiganiro cyabaye hizihizwa umunsi mpuzamahanga w’ikinamico uba buri wa 27 Werurwe

Umwanditsi w’ikinamico Prof Kayishema Jean Marie Vianney, yavuze ko ikinamico ishingiye ku mateka ishobora kwibutsa Abanyarwanda indangagaciro zabo, ndetse igafasha urubyiruko kumenya amateka y’igihugu cyabo.

Ati “Abahanzi b’ikinamico bakwiye gukangukira guhanga amakinamico ashingiye ku mateka y’u Rwanda, kuko bizatuma tuvuga ba bantu babaye intwari mu mateka y’u Rwanda tube twabigiraho ubwo butwari.”

“Ikindi mbona byafasha ni ukugarura Abanyarwanda kuri wa mwimerere wabo gakondo, abantu bakamenya indangagaciro zabo bigatuma turushaho kwiyumvamo ubunyarwanda.”

Kuba ikinamico zishingiye ku muco zagira akamaro byemejwe na Murayire Protais, wavuze ko ikinamico ziganisha ku mateka zifite umumaro cyane kuko ubwo yari mu buhungiro i Burundi ikinamico z’amateka y’u Rwanda zatumye agira ishyaka ryo kurwiyumvamo cyane.

Ati “Ndi umuhamya ko ikinamico ishingiye ku mateka igira umumaro, kuko igihe twari mu buhungiro i Burundi habaga gukina imikino igaragaza amateka y’igihugu cyacu. Byarakidukumbuje ndetse byabaye n’imbarutso ya benshi binjiye mu ngabo kugira ngo barwanirire cya gihugu cyabo babwiwe.”

Abahanzi b’amakinamico bo bemeza ko bakwiye kuba abahanzi batanga ubutumwa bwiza kandi bugira uruhare mu kubaka igihugu, kandi basanga bikozwe neza byatanga umusaruro haba kubandika ndetse n’abakurikira ibihangano byabo.

Umwanditsi akaba n’umukinnyi wa filimi ica ku rubuga rwa YouTube, Benimana Ramadhani, uzwi nka Bamenya yavuze ko abanditsi bakwiye kwibanda ku gutanga ubutumwa bwiza kandi bufitiye akamaro imbaga nyamwinshi.

Ati “Abanditsi bakwiye kwibanda cyane ku butumwa bufitiye Abanyarwanda akamaro kuko iyo utanze ubutumwa ubona n’inyungu zitandukanye, kandi gutanga ubutumwa bwiza bizana inyungu niho biva kuba watungwa no kwandika ikinamico.”

Umuyobozi w’Inteko y’Umuco, Amb Masozera Robert, na we yibukije abanditsi b’ikinamico inyungu ziri mu kwandika ikinamico zishingiye ku muco.

Ati “Ndashimira abatanze ibiganiro cyane abavuze ku guhimba ikinamico zigaruka ku muco n’amateka by’u Rwanda, ni ikintu cyiza nkuko mwabyumvise mu buhamya hari abo cyafashije gukunda no gutabarira igihugu.”

Yakomeje avuga ko byazafasha urubyiruko kumenya amateka yaranze igihugu cyabo kandi ko byanateza imbere ubukererugendo.

Ati “Ikinamico ishingiye ku muco n’amateka byafasha urubyiruko kumenya amakuru yaranze igihugu cyabo, ikindi amateka yakinwe azakururira n’abandi kuza gusura u Rwanda, bakuruwe na ya kinamico.”

Mu kwizihiza uyu munsi w’ikinamico hahembwe ikinamico n’abakinnyi beza bazo. Mu ikinamico hahembwe Muhorakeye Viviane wanditse ‘Ngiye kwishyira hanze’, Tuyishimire Théonille wanditse ‘Umwana ni nk’undi’ na Niyonagize Fulgence wanditse ‘Sano’.

Mu bakinnyi hahembwe Mugeni Aimée wakinnye mu Imbuto y’umugisha, Twagirayezu Evariste wakinnye muri ‘Ntacyaruhungabany’ na Karinda Isaïe wakinnye mu ‘Ukubarira akubeshya’.

Inteko y'Umuco yashishikarije abanditsi b'ikinamico kwibanda ku zivuga ku mateka y'u Rwanda

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .