Yashakiye umuhungu we umugeni k’uwamwiciye umugabo muri Jenoside

Yanditswe na Sitio Ndoli
Kuya 16 Mata 2017 saa 08:50
Yasuwe :
0 0

Umugabo witwa Nyaminani Gratien wo mu Karere ka Rusizi yari mu gitero cyishe umugabo wa Mukakabera Bernadette muri Jenoside yakorewe Abatutsi mu 1994. Ariko uyu mubeyi wo mu Murenge wa Nzahaha yabirenzeho ajya kumusaba umugeni.

Nyuma ya Jenoside Mukakabera yumvise ku mutima we agomba kubabarira abamuhemukije bakanamwicira umugabo, atangira kujya muri gereza ya Rusizi gushishikariza Nyaminani kwemera icyaha, agasaba imbabazi.

Nyaminani yabanje kwinangira kwemera icyaha no gusaba imbabazi abo yahemukiye harimo n’uyu mukecuru, akavuga ko yabitewe n’uko yabonaga imbabazi amwingingira kumusaba ari iza nyirarureshwa.

Ati “Bernadette yazaga kunyinginga ngo nsabe imbabazi kubo nabahemukiye, mbanza kunangira ndabyanga ndavuga nti ‘ntabwo naba narakoze icyaha kimeze kuriya ngo bampe imbabazi buriya ni ukugira ngo babone ukuntu bazatwica’ nyuma ni bwo naje kwemera kuzisaba ariko byanyirarureshwa kuko nari nzi ko byanga byakunda bagomba kunyica nanjye, ariko uko iminsi igenda nagiye mbona ko yambabariye abikuye ku mutima.”

Nyuma yo guhabwa imbabazi imiryango yombi yahuje urugwiro kugeza aho umuhungu wa Mukakabera uri mu Ngabo z’u Rwanda yabengutse umukobwa wa Gratien wagize uruhare mu kwica se ubu akaba yaramubereye sebukwe.

Bernadette ati “Imbabazi namuhaye ntawazimpatiye sinshobora kumubwira ijambo rimusesereza ngo nuko yampemukiye tubana mu matsinda aho twicaye ni nk’abana b’impanga, umuhungu wanjye yaje kunsaba kumushakira umukobwa wo mucyaro uzamba hafi ndamubwira nti ‘ko n’uyu mwana wa Gratien ari muzima wamujyanye ko ari umugore wakubaka urugo’ nuko umuhungu wanjye yashatse umukobwa wa Gratien kuko nta mutima mubi nari nkibafitiye sinagombaga kumuhora icyaha cya se.”

Umukobwa wa Nyaminani Gratien, Yankurije Donata, avuga ko we n’umugabo we ntawishishaga mugenzi we ashingiye ku buhemu umubyeyi we yagiriye umuryango yashatsemo, ubu bamaze imyaka icyenda babana ariko kubera urukundo bafitanye ngo bahora ari nk’abageni.

Ati “Nta by’ingengabitekerezo biba mu rugo rwacu.” Uretse ibyo kandi umugabo we nta kumucyurira icyaha cya se.

Uwo mugabo avuye muri gereza abanye neza n’umuryango yahemukiye.

Nubwo ubumwe n’ubwiyunge mu Banyarwanda butaragerwaho 100% hari intambwe zikomeye zatewe muri sosiyete nyarwanda. Ababyeyi barashyingirana, barasangira, bababana muri za koperative, n’ibindi bikorwa byinshi.

Yankurije Donata hagati ya se na nyirabukwe watanze imbabazi k'uwamwiciye muri Jenoside

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza


Warning: mysqli_query(): (HY000/1194): Table 'spip_jobs' is marked as crashed and should be repaired in /home/lex94/public_html/ecrire/req/mysql.php on line 244