Umunsi bagarura ubumwe i Rwanda:Imyaka 25 irashize u Rwanda rubohowe( Igice cya mbere)

Yanditswe na Nsanzabera Jean de Dieu
Kuya 4 Nyakanga 2019 saa 01:43
Yasuwe :
0 0

Hashize imyaka 25 FPR-Inkotanyi ihagaritse Jenoside yakorewe Abatutsi, ikanasoza urugamba rwamaze imyaka igera kuri ine, rwari rugamije kubohora u Rwanda ingoyi y’igitugu, inda nini n’imitima yabaswe n’amacakubiri, ashingiye ku moko no ku Turere.

Muri ibi bihe bikomeye Abanyarwanda twibuka neza uko u Rwanda rwabohowe, hari byinshi dukwiye kuzirikana, cyane cyane ubuzima bushaririye Abanyarwanda banyuzemo mu gihe cy’imyaka 99 ( 1895-1994), u Rwanda rwamaze rusenywa n’abakoroni n’abandi banyarwanda badakunda igihugu.

Muri uko kwibuka aho u Rwanda rwavuye n’aho rugeze, hari byinshi bidakwiye kwibagirana mu mateka y’u Rwanda n’Abaturage barwo.

Ayo mateka ahera ku bakoroni b’Abadage, badukiriye u Rwanda bakarucagaguramo ibice byinshi, bitwaje gushyiramo imipaka igabanya u Rwanda n’ibihugu by’ibituranyi nka Uganda, Congo n’u Burundi. Barutwaye ubutaka bungana na 5/6 by’ubwo rwari rufite, muri Km2 168, 606, hasigara ubutaka bungana na Km2 26. 338.

Umwaka wa 1910-1912, wakozwemo ibikorwa byo kugabanya ubuso bw’u Rwanda, ntabwo bizibagirana mu mateka y’urugamba rwo kubohora u Rwanda.

Ubwo Abakoroni b’Ababiligi batsindaga Abadage mu ntambara ya kabiri y’isi mu wa 1916, bakabasimbura ku gukoroniza ibihugu bakoroniza birimo u Rwanda n’u Burundi, bahereye ku Rwanda barwihimuraho ngo ni uko rwafashije Abadage kurwanya Ababiligi, bagatangira gusesera mu muco, mu miyoborere, mu mibanire n’ubumwe bw’abenegihugu, bagamije kubisenya.

Mu mwaka wa 1917 ni bwo Rezida, Major Declerk yatwaye ku ngufu Musinga gusinya iteka riha buri Munyarwanda uburenganzira bwo kuyoboka idini yishakiye. Imana y’i Rwanda irimurwa, hinjira imana y’abanyaburayi isimbura icyeza-Mana ry’Abanyarwanda, ryari kimwe mu bibahuza bikanubaka ubumwe bwabo.

Muri ibyo bihe, ni nabwo Musinga bamwambuye ububasha bwo kwica no gukiza, icyubahiro cy’ikirenga cyo gufata ibyemezo biyobora igihugu binakirengera biyoyoka ubwo. Ntabwo bizibagirana mu mateka y’urugamba rwo kubohora u Rwanda.

Mubihe bibi u Rwanda rwidegembywamo n’ibigande, umwami bamwatse ububasha mu bucamanza, umwami yari “Nyamugirubutangwa (Mutavuguruzwa mu byemezo)” kandi ni koko niko imihango y’ubwiru yabigenega ko umwami ari we Nteko y’ikirenga mu gihugu.

Ababiligi bemeye ko mu murimo we wo guca imanza, azunganirwa n’umuzungu uhagarariye Rezida. Ububasha bwe mu gucira imanza abaturage ayoboye babumukuraho. Umwaka wa 1922, wakozwemo ibikorwa nk’ibyo byo gusuzugura abayobozi b’u Rwanda, ntabwo bizibagirana mu mateka y’urugamba rwo kubohora u Rwanda.

Mu gihe u Rwanda rwigengaga ku butaka mu kubugaba no kubugabana, umwami Ababiligi bamugabanyirije ububasha bwo kugaba imisozi. Muri uwo mwaka bamubujije gushyiraho abatware mu gihugu no kubanyaga uko ashaka, abatware b’Intara na bo ntibashoboraga gushyiraho abasushefu bitabanje kunyura kuri Rezida.

Ishyirwaho n’ikurwaho ry’abategetsi b’u Rwanda, rijya mu maboko y’Abakoroni. Umwaka wa 1923, wakozewemo ibikorwa nk’ibyo byuje agasuzuguro, ntabwo bizibagirana mu mateka y’urugamba rwo kubohora u Rwanda.

Itorero ryari shuri ryo ha mbere, bigiragamo imyuga, umuco, indangagaciro na za kirazira n’ubumenyi ngiro bw’ingeri nyinshi, imitegekere y’igihugu, imyuga y’uburyo bwose, ubumenyi mu kubungabunga ubuzima bw’abantu n’amatungo n’ibindi, rikaba ryari ryarahanganywe na Gihanga, rikaza gushimangirwa na Ruganzu II Ndoli ubwo yari atangiye kuzahura igihugu cyari cyarabaye umwirare biturutse ku kurwanira Ingoma kwa Se Ndahiro Cyamatara na bene Se Juru na Bamara. Igihugu kikamara imyaka 11 kitagira umwami.

Abazungu baraje barabisenya batangira gucengeza buhoro buhoro imyigire ya kizungu mu banyarwanda, mu gukuraho itorero, bahise barisimbuza amashuri yigisha gatigisimu. Umwaka wa 1924, abakoroni b’Ababiligi baciyemo Itorero ry’u Rwanda, ntabwo bizibagirana mu mateka y’urugamba rwo kubohora u Rwanda
Ubwiru bwari Itegeko Nshinga ryo mu Rwanda rwo ha mbere, bwavanyweho n’indi mihango n’imigenzo y’Abanyarwanda irimo umuganura.

Muri uwo mwaka, Adiminisitarateri wa Nyanza yafashe icyemezo cyo "Guca" Gashamura ka Rukangirashyamba umutware w’Abiru (Umwiru w’ijambo) amucira i Gitega (Burundi). Bamuzizaga ko yari afite uruhare mu mitegekere no mu mibanire y’ibwami n’Abazungu.

Musenyeri Léon Paul Classe na we uwo mugambi wo kwigizayo Gashamura yari awurimo. Baciye umuganura bitwaje ko ariwo Abanyarwanda bahuriramo bagasangira imihango yabo itsindira igihugu. Rwampungu, umuhungu wa Gashamura, bahise bamushyira mu ishuri riyoborwa n’Umubiligi, bityo "Ubwiru" burazima kuko bari babuciye umutwe.

Bandora wari umupfumu n’umujyanama w’ibwami, Ababiligi bamwirukanye ibwami. Ubucurabwenge nabwo ntibaburebeye izuba, bityo amateka y’igihugu atangira gusibangana atyo. Ubusizi bwari igishyitsi gikomeye cy’ubutegtsi bw’u Rwanda mu kwamamaza amatwara y’abami n’ibigwi byabo mu kubaka u Rwanda, nabwo bwaracecekeshejwe, Ubuvanganzo nyarwanda bwose butangira kuzima, aho kwicara mu nganzo ngo Abanyarwanda bakomeze kuvoma ibyiza biri mu muco wabo, batangira gucyocyorana n’abakoroni bababaza igituma baje gusenya ibyiza nyaburanga biri mu muco w’Abanyarwanda.

No ku mwaduko wa Repubulika byabaye uko habura umuzahura w’umuco w’igihugu, abantu bagendera mu cyo bise “UBUHANZI BWO MURI REPUBULIKA” bwagendanaga no kurata no gusingiza ingengabitekerezo z’amashyaka yimakazaga amacakubiri n’irondakoko mu bana b’u Rwanda. Inganzo nzima dukomora ku bahanze u Rwanda isibama ityo.

Imihango, Imigenzo n’Imiziririzo ya bene Gihanga yo yari izingiro ryo kwiyitaho kw’Abanyarwanda no kurinda ibyagezweho ngo barusheho kugira ubuzima bwiza bushingiye ku kugira icyo utinya n’icyo wubaha, bayitesheje agaciro. Abantu batangira kuba ibifura n’ibinyamusozi bavuga ibyo babonye, batangira kuba nk’impyisi barya ibyo babonye.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza