Uko Nyanza yabaye umurwa Mukuru w’ubwami bw’u Rwanda (Igice cya mbere)

Yanditswe na Nsanzabera Jean de Dieu
Kuya 25 Mata 2019 saa 01:47
Yasuwe :
0 0

Abanyarwanda benshi biganjemo abakiri bato, bazi neza ko Nyanza yo mu Karere ka Nyanza mu Murenge wa Busasamana mu Ntara y’Amajyepfo, ariwo murwa Mukuru umwe rukumbi w’igihugu cy’u Rwanda rwagize mu bihe byose rwamaze rutwarwa n’abami, nyamara ukurikije ibirari by’amateka y’u Rwanda, igihugu cyagiye kigira imirwa mikuru myinshi itandukanye, yagiye ishyirwaho n’abami bagera kuri 28 batwaye u Rwanda mu gihe cy’imyaka 870 (1091-1961) u Rwanda rwamaze ruganje mu buyobozi bw’igihugu kigengwa n’umwami.

Nk’uko tubikeshasha ibitabo “ Imizi y’u Rwanda” n’igitabo “Intwari z’imbanza, zubatse u Rwanda rugahamya igitinyiro” byombi byanditswe n’Umusizi Nsanzabera Jean de Dieu, inzobere mu Muco, amateka n’ubuvanganzo by’impitabihe ku gihugu cy’u Rwanda, bitugaragaziza ko mu Rwanda rwo ha mbere, buri mwami yagiye agira umurwa mukuru we, kenshi na kenshi ukazarangirana n’ingoma ye.

Hari n’aho usanga abami batatu, bane…basangiye umurwa mukuru umwe, ariko ugasanga haje uwa gatanu arawimuye awujyanye ahandi.

Imirwa mikuru yose y’u Rwanda, yagiye ishyirwaho kandi ikomeza kwimurwa hakurikijwe uko igihugu cyatanyaga kijya mbere mu kwagura igihugu higarurirwa ibindi bihugu byari kuri ubu butaka bwitwa u Rwanda butaraba igihugu kimwe.

Gahunda yo kwigarurira ibindi bihugu babyomeka ku butaka bwabo, yatangijwe n’abami b’ingoma y’i Gasabo, ari naho ntango y’igihugu cyitwa u Rwanda, dore ko hari n’ibindi bihugu bifite andi mazina yabyo byahawe n’abakurambere babihanze.

Uko buri mwami yagendaga yigarurira ubutaka bw’igihugu iki n’iki akabwomeka ku gihugu cy’u Rwanda, ni nako uwamuzunguye yagendaga yicuma yigira hirya, ari nako yimura umurwa mukuru w’u Rwanda, mu rwego rwo gusatira igihugu atarigarurira kugira ngo agicungire hafi, ari nako arushaho kucyotsa igitutu cyo kuyoboka ku neza kandi anategura gahunda yo kugitera mu gihe cyaba gikomeje kwinangira.

Umurwa mukuru w’u Rwanda w’ikubitiro wabaye Gasabo ka Rutunga, naho uwa nyuma wabaye mu Mudugudu wa Mwima wo mu Kagali ka Rwesero mu Murenge wa Busasamana wo mu Karere ka Nyanza, aho wahimukiye uvuye mu Mudugudu wa Gakenyeri wo mu Kagali ka Nyanza mu Murenge wa Busasamana ho mu Karere ka Nyanza, aho Umwami Yuhi Musinga yari atuye.

Imirwa mikuru y’u Rwanda igaragara n’ubundi mu ngoro 124 abami b’u Rwanda 28 bubatse mu mateka yabo zari zigenewe guturwamo n’umwami n’abagore be, ni ukuvuga ko umwami yashoboraga kugira ingoro nyinshi, ariko imwe muri zo akaba ariyo ivamo ikagirwa umurwa mukuru w’igihugu.

Mu kubatekerereza aya mateka y’uko Nyanza yaje kuba umurwa Mukuru w’u Rwanda wabaye kimenyabosemu Rwanda, reka tubanze tubatekerereze amateka y’imirwa y’abami b’u Rwanda n’uko yagiye ishyirwaho.

Umurwa mukuru wa mbere w’u Rwanda wabaye Gasabo na Rutunga, kuri ubu ni mu Mudugudu wa Vugavuge mu Kagali ka Gasabo ho mu Murenge wa Rutunga wo mu Karere ka Gasabo. Ukaba warahanzwe mu ntango y’ingoma ya Gihanga I Ngomijana ahasaga mu wa 1091.

Uyu murwa mukuru wa Gasabo abami b’u Rwanda bawuhererekanyije ingoma 8 mu gihe cy’imyaka 221 (1091-1312), ifite intango kuri Gihanga Ngomijana, ikagera kuri Ruganzu Bwimba.

Aho u Rwanda rutangiriye kwaguka, rubikuye ku kwigarurira igihugu cy’ikubitiro cy’u Buliza ku ngoma y’umwami Cyilima Rugwe, nibwo umurwa mukuru watangiye kwimurwa ndetse ujyanwa mu bice bitandukanye by’igihugu. Aho Rugwe yawushyize ku ngoma ye, ni ku musozi wa Rwahi ho mu Mudugudu wa Rwahi mu Kagali ka Rubona ko mu Murenge wa Shyorongi mu Karere ka Rulindo mu Ntara y’Amajyaruguru.

Uwo murwa wahanzwe mu ntango y’ingoma ya Cyilima I Rugwe ahasaga mu wa 1345. Rugwe yawukuye i Gasabo awushyira ku Rwahi mu rwego rwo kwitegera igihugu cy’igihangange cya Nduga y’Abasinga b’Ababanda, yagombaga gutangira kotsa igitutu ngo kiyoboke ku neza cyakwanga akakigarurira ku mbaraga bubi na bwiza, ari nacyo cyatumye atura hafi yacyo kugira ngo arusheho kumva impumeko yacyo uko bwije n’uko bukeye no kugitera bizamworohere.

Umurwa mukuru wa gatatu wabaye mu Mudugudu wa Ntora mu Kagali ka Ruhango ho mu Murenge wa Gisozi wo mu Karere ka Gasabo mu Mujyi wa Kigali. Ukaba warahanzwe mu ntango y’ingoma ya Kigeli I Mukobanya ahasaga mu wa 1378. Nubwo habaye umurwa mukuru w’u Rwanda mu bihe by’intango y’ingoma ya Mukobanya, hari hataraba ah’u Rwanda kuko hari hakiri mu Bwanacyambwe bw’Abasinga b’Abongera.

Umwami Kigeli Mukobanya amaze kwima ingoma ya se Cyilima Rugwe, yashatse uko yakwiyenza ku Bwanacyambwe kugira ngo abone uko bawigarurira mu gutera ikirenge mu cya se Rugwe wari umaze guhangura ingoma y’u Buliza bw’Abasinga b’Abongera, niko gusaba umwami Nkuba ya Nyabakonjo w’u Bwanacyambwe ikibanza cyo kubakamo ingoro ye i Ntora.

Nkuba ya Nyabakonjo yaje kumenya ko Mukobanya ari umwiyenzo wo kumutera ashaka, ahera ko agira amakenga menshi avanze n’ubwoba, amuha umusozi wose wa Ntora ngo awubakeho ingoro ye ndetse n’abaturage be bazamuzigure impande zose ntawe umukomye mu nkokokora.

Icyo twazirikana aha ng’aha mu bijyanye no kwimura umurwa mukuru w’u Rwanda bawukura I Gasabo ujya ahandi, nuko Gasabo intango y’u Rwanda itigeze yibagirana ngo ibe intabwa. Yakomeje kuba umurwa mukuru w’ikirenga, bakahakorera imihango yo guterekera abakurambere b’Abanyiginya babarirwa mu cyiciro cy’ibimanuka bahanze igihugu no gushyiraho imfatiro zacyo no kuhategurira ibitaramo by’imihigo, ibitaramo njyarugamba na mvarugamba, hakanabera inama z’umushyikirano zirebera hamwe ubuzima bw’igihugu.

I Gasabo hanaberaga inama y’Abiru, ari nayo yari ifite umwihariko w’umwiherero w’Abayobozi bakuru b’igihugu mu Rwanda rwo ha mbere.

Mu gice gikurikiraho, tuzabagezaho uko imirwa y’u Rwanda yagiye ihangwa kugeza ku murwa mukuru wa nyuma w’ingoma y’u Rwanda w’i Mwima wa Rwesero mu Murenge wa Busasamana ho mu Karere ka Nyanza.

Iyi ngoro iherereye mu Rukari mu murenge wa Busasamaana. Ni hamwe mu hatuye bamwe mu bami b'u Rwanda

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza