Ubuhamya: Uwizeyimana yarokokeye Jenoside ahiciwe Abatutsi barenga 15,000

Yanditswe na Evariste Nsengimana
Kuya 17 Mata 2018 saa 09:31
Yasuwe :
4 2

Mu 1994, Uwizeyimana Claudine n’umuryango w’abantu 30 barimo barindwi bavukanaga bari batuye ku musozi wa Ruhanga wo mu Murenge wa Rusororo, Akarere ka Gasabo, wiciweho abatutsi barenga ibihumbi 15, biganjemo abari mu rusengero rw’Abangilikani.

Ku wa 15 Mata 2018, mu muhango wo kwibuka Abatutsi basaga ibihumbi 15 bicwe i Ruhanga Uwizeyimana mwene Rutinduka Ézéchiel yavuze ko mbere ya Jenoside yakorewe abatutsi, i Ruhanga hari heza hatuwe n’imfura, cyane ko intambara zo mu 1959 no mu 1963 zitigeze zihagera.

Nyuma y’ihanurwa ry’indege ya Habyarimana ku wa 6 Mata ari nabwo umwe muri basaza n’umuryango we biciweho, bumvise ibintu biturika ntibamenya ikibaye, bukeye radiyo zitangira kubivuga zisaba ko abantu batava mu rugo babyubahiriza ariko bafite ubwoba.

Uwo munsi ahitwa ku Isumo kuri uwo musozi, hashyizwe bariyeri yiciweho Abatutsi baturukaga hirya no hino batangiye gutwikirwa, bibatera ubwoba batangira guhunga bageze ku rugo rw’uwitwaga Masigara, abahari bati ‘Dore imbaragasa ziragiye ntituzi aho zijya’ ariko barakomeza, bukeye bahungira mu rusengero rw’Abangilikani, rwahuriyemo ababaga bakize ibitero ahandi.

Uwizeyimana ati “Tugeze ku wa 14 Mata 1994 nka saa cyenda nibwo Interahamwe zaje n’abapolisi b’icyari Komini Gikoro, twazibonye zituruka ku musozi wa Gicaca, izindi ziva i Kabuga, zizamukira i Rugende no ku Isumo ariko n’ubwo twari tugeze uwo munsi, n’indi niko bashakaga kuza kutwica.”

Uwizeyimana Claudine warokokeye Jenoside ahiciwe imbaga

Avuga ko uwo munsi Interahamwe nibwo zishe uwitwaga Rwabukumba, abari mu rusengero bakomeza kwirwanaho bazibuza kuhagera ariko zikora inama y’uko zizagaruka kubica ari nako zabikoze ku wa 15 Mata 2018.

Uwizeyimana ati “Ubwo twahise dukinga (Urusengero) abagabo bari hanze bari kubasubizayo kugira ngo barebe ko byamera nk’iby’ubushize ariko ntibyakunze kuko baje biteguye[…] babanje kurasa (amasasu n’urusenda) abagobo bari hanze barapfa, ndibuka narasohotse nsanga na musaza wacu bitaga Nkubana bamutsinze imbere y’urusengero bashaka kuzibuza kwinjiramo ngo zitwice.”

Yakomeje agira ati “Bakomeje kurasa bashaka kwinjiramo, bakubise urugi n’amadirishya babikuramo, Interahamwe zahise zinjira, zitangira kwica, kuko zari zifite imihoro, impiri babanza no guteramo na Gerenade ku buryo nabonaga ko n’abantu zagiye zibafata. Binjiyemo baratangira baratema, bavuga ngo ‘Inzoka zahungiye aha kuzica ni ukuzimena umutwe, twarangiza tugatwika.”

Uko niko bakomeje kubica, bamara amasaha agera kuri atatu, kubera ubwinshi bw’abarimo, ntibabamara.

Uwizeyimana ati “Nanjye bangezeho barantema mu mutwe hose, urebyemo ni imihoro gusa, barangije bakubitamo impiri ariko tugasenga tuti ‘Mana ubababarire kuko batazi ibyo barimo gukora, iyo babimenya ntibakabaye batuziza ko turi abatutsi kuko natwe tutabyihaye’. Barishe bigeze saa munini, bafata amajerekani ya Lisansi basukamo.”

Uwizeyimana avuga ko atazibagirwa umupasiteri w’Umuhutu wari urimo bishe mbere y’uko binjira mu rusengero, nyuma y’uko bamusabye kujya ku ruhande ngo babice akabyanga, akababwira ati “Mwabica, nari ndagiye izi ntama, ngasigara ndagiye iki?”

Nyuma yo kumutemagura no kumuhondagura ubuhiri Imana igakinga ukuboko, Interahamwe imwe ngo yamugezeho isanga ntiyahwanye, imukubita ikintu mu musaya, ata ubwenge.

Uwizeyimana ati “Bafashe Lisansi basukamo, bahagarara mu madirishya barasiramo umwambi, urusengero rwose rutangira gushya, rwari umuriro, abantu bari gushya kubera Lisansi ariko twebwe nk’umuntu batakubise nk’amaguru, ugakururuka ugahungira nko mu ruhande rutarageramo umuriro.”

Amasaha yaricumye, Interahamwe zirababeshya ngo utarapfa ubwo yarusimbutse naze zimukize, uhagurutse yagera ku muryango cyangwa ku idirishya bagahita bamutema, Uwizeyimana abirebye yanga kwirirwa ahaguruka, nyuma bananiwe barataha bafite umugambi wo kuzagaruka.

Nyuma nibwo abagabo bamwe babashije kwihisha inyuma y’urusengero baje kureba abatashizemo umwuka, babakuramo, inyota yabishe ariko babura aho bakura amazi kuko ibigega by’amazi Interahamwe zari zabimennye ngo n’urokoka aze kwica n’inyota.

Inzira yakomeje kuba ndende kandi izitanye kuri Uwizeyimana n’abandi babashije kurokokera muri urwo rusengero, nyuma yo kuhava batangiye kwihishahisha mu mibyuko y’amasaka, hamwe ababahigaga bakayatema babashaka ngo babice.

Ku wa 16 Mata 1994, Uwizeyimana yasubiye mu rugo iwabo agiye gushaka amazi, asanga inzu yabo barayishenye, yinjiye muri imwe, yumva Interahamwe zinjiye mu yindi zije gusahura, akizwa n’amaguru, yigira inama yo gusubira kuri rwa rusengero mu ijoro akicara mu nguni.

Bukeye nibwo yaje kugenda ahura na se, bajya kwihisha, urugendo rutamubereye rwiza kuko bahuye n’Interahamwe zihita zivugana se, we akizwa n’amaguru, aho yaguye mu muferege, abamukurikiye bakamucaho.

Uwizeyimana yagiye gusaba amazi ku mugabo witwaga Mbarubukeye, asanga ku rugi rw’inzu handitseho ngo ‘Hano turi abahutu kandi turakora’ ariko kuko yifuzaga icyamwica, ajyayo kuyasaba baramwamagana, ajya ahandi ku mukecuru witwaga Nyirabundibundi, akubitwa n’inkuba asanze yambaye imyenda ya nyina, ariko kuko ntacyo yari gukora, abasaba amazi arakomeza, ajya n’ahandi bamwirukana, ahita yumva ikindi gitero cy’Interahamwe arihisha.

Urugendo rw’ububabare rwarakomeje, igihe kiza kugera bohereza Caterpillar yo gushyingura imirambo, muri icyo gihe ariko Inkotanyi zari zimaze kuhagera ari nabwo Interahamwe zirimo guhunga, aza gutoragurwa n’umusirikare w’Inkotanyi, arahamukura nyuma avuzwa bya bikomere.

Nyuma ya Jenoside, Uwizeyimana waje gutangira ubuzima bushya, yafashijwe kwiga arangiza muri kaminuza.

Urwibutso rwa Jenoside rwa Ruhanga ruri ahahoze urusengero rw'Abangilikani

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza