Tito Rutaremara asanga ’inzu yo kwa Habyarimana’ yashyirwamo ibibi byose yasize akoze

Yanditswe na Ferdinand Maniraguha
Kuya 21 Nyakanga 2016 saa 09:37
Yasuwe :
0 0

Senateri Tito Rutaremara yatangaje ko inzu ndangamurage yo kwa Habyarimana itagomba kugaragaza ibyiza yakoze, ahubwo ngo hakwiriye gushakwa ibibi yakoze cyangwa ibibi byose byakozwe mu Rwanda akaba aribyo bishyirwamo.

Ubusanzwe inzu izwi nko kwa Habyarimana iherereye i Kanombe, ikaba yitirirwa amateka y’abaperezida bayoboye u Rwanda bayibayemo, nubwo agaragaramo ari aya Habyarimana nayo make, cyane cyane ajyanye n’ubuzima yabagaho.

Mu igenzura Abasenateri bagize Komisiyo y’iterambere ry’ubukungu n’imari ryakozwe hagamijwe gusuzuma ishyirwa mu bikorwa ry’ibikorwa bya Leta mu bukerarugendo, bagaragaje ko basanze hari inzu ndangamurage zigaragaza ibikorwa bitandukanye n’ibyo zashyiriweho.

Ubwo basuraga inzu ndangamurage y’amateka y’abakuru b’ibihugu yo kwa “Habyarimana”, ngo basanze irimo amafoto ajyanye no kwibuka Jenoside yakorewe Abatutsi, kandi ikwiye kugaragaraza ay’abaperezida.

Gusa iyi komisiyo isobanura ko abo yahasanze bavugaga ko ibihakorerwa ari iby’agateganyo ku buryo nabo batazi ikigomba kujyamo, ariko ngo bakavuga ko ari ibintu bitazamara igihe.

Abasenateri bavuga ko babahaye ibitekerezo byo gushyiramo amateka y’abaperezida babayemo, bitaba ibyo igahagarikwa.

Ni ikibazo byasaga n’aho buri musenateri yagaragazagaho igitekerezo, Senateri Tito Rutaremara we avuga ko asanga iyi nzu itagomba kugaragaza amateka na make meza ya Habyarimana kuko yayubatse akayibamo, bityo ngo n’ibyo iyi nzu igaragaza bikwiriye kuba ibibi bye gusa.

Ati “Muri iriya nzu ndangamurage y’abaperezida, ntabwo wajya kwerekana ubuzima bwiza bwa Habyarimana, kandi niwe wayubatse ayijyamo. Ni ugushaka rero ibyo yakoze akaba ari byo bihajya. Sinzi n’igituma tuvuga ngo nibashake ibyahagenewe, Ese twatanze ibitekerezo inzu ikaba iyo kwerekana ibyo Habyarimana yakoze cyangwa ibibi byose byakozwe mu Rwanda bikaba byajya hariya.”

Ikibazo cy’inzu yagenewe amateka y’abaperezida Senateri Tito agikomatanya n’iy’umuyobozi wayoboye Kigali bwa mbere, Richard Kandt igararamo inzoka nyamara yanditseho ngo “Inzu y’amateka ya Kandt”,nayo ahamya ko ikwiriye kugaragaza ubukoloni n’ibibi byabwo.

Ati “ Ntabwo wajya kwandika Kandt ngo uvuge ibyiza byose, ngira ngo abashyizeho ngo batwereke ibidukikije, batwereke inzoka nibyo. Ngira ngo ubukoloni n’inzoka n’ibyo bindi ntimugire ngo ni ibyiza.”

Ni ibitekerezo byakiriwe ariko Perezida w’Inteko Inteko Ishinga Amategeko umutwe wa Sena Bernard Makuza yamwunganiye avuga ko iyo nzu ndangamurage y’i Kanombe ari iya Leta, ahubwo yatuwemo n’abaperezida, ariko yirinda kugira icyo avuga ku byagaragaramo.

Gusa Senateri Evariste Bizimana wari muri Komisiyo yasuye izo nzu ndangamurage yasobanuye ko “abakorera mu nzu yo kwa Kandt bavuga ko mu Budage, aho uyu mugabo akomoka hariyo indi nzu nk’iyi binatuma n’iya hano ari byo bijyamo kuko ari bo bayitera inkunga."

Perezida w’iyi komisiyo Muhongayire Jacqueline nawe yemeza ko amateka y’ubukoloni agomba kugaragazwa muri iyo nzu, ariko agahuzwa n’ay’u Rwanda kuko ari ho umukoloni wa mbere yabaye.

Ati “Amateka ya Dr Kandt waje ari umushakashatsi w’umudage akaza kuba resident, ni amateka y’ubukoloni yari akwiriye kuhagaragara agahuzwa n’amateka y’igihugu.”

Abasenateri bagaragaje ko iyi nzu mu gihe gito izaba itakigaragaramo izo nzoka, kuko ngo minisiteri yateganyije ko hazashyirwa inyamanswa zimwe na zimwe zoroshye kugaburira, hakazaremwa icyanya cy’izo nyamanswa, ariko kuba ituranye n’abaturage n’ishuri ribanza, ngo basabye ko bisubirwamo.

Bisa n’ibizazana impinduka mu bizakorerwa muri iyi nzu ya Kandt, kuko itegeko n’amateka ya Minitiri agena ibigomba gukorerwa mu ngoro ndangamateka zose ntarasohoka.

Mu myanzuro itandatu Abasenateri bafashe harimo uvuga ko "Guverinoma igomba kunoza imikorere y’ingoro ndangamurage,ibihakorerwa bigahuzwa n’icyo zagenewe”.

Inkuru bijyanye:Amabanga y’ubupfumu n’imbaraga z’umwijima mu yahoze ari ingoro ya Habyarimana

Perezida wa Komisiyo, Muhongayire Jacqueline
Inzu ndangamurage y'abaperezida izwi nko kwa Habyarimana
Ahabaga inzoka ya Habyarimana
Inzoka ya Habyarimana yogaga muri iyi piscine

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza