Ku wa 18 Nzeri: Imyaka 57 irashize ibendera ry’u Rwanda rizamuwe muri Loni

Yanditswe na Ferdinand Maniraguha
Kuya 18 Nzeri 2019 saa 07:00
Yasuwe :
0 0

Imyaka 57 irashize u Rwanda rubaye umunyamuryango w’Umuryango w’Abibumbye Loni. Ku itariki nk’iyi, rwemerewe kuba umunyamuryango umunsi umwe n’Ubwami bw’u Burundi (bwaje guhinduka Repubulika) nyuma y’amezi abiri gusa ibyo bihugu byombi bibonye ubwigenge buvuye k’u Bubiligi.

Uwo munsi mu Nteko Rusange ya 17 ya Loni, Perezida Grégoire Kayibanda yahawe ijambo ashima kuba igihugu cye kibaye umunyamuryango wa 105 muri Loni, ko amahoro aganje bityo kwemera u Rwanda bigiye kuba umusemburo w’iterambere n’ububanyi n’amahanga.

Icyakora ku rundi ruhande, nubwo igihugu cyavugwagamo amahoro, hari hashize igihe gito abatutsi ibihumbi 120 barahunze igihugu nyuma y’ubwicanyi n’ubugizi bwa nabi bakorerwaga n’abahutu guhera mu 1959.

Uwo munsi mu nteko rusange, iby’impunzi ntabwo byakomojweho ahubwo Kayibanda yasabye amahanga kumushyigikira bakamuha inkunga, kugira ngo ibikorwa bya Leta bishoboke.

Uko byagenze kuri uwo munsi nyir’izina

Hari ku wa Kane tariki 18 Nzeri 1962, nyuma y’amezi abiri gusa u Rwanda rubonye ubwigenge. Uwo munsi uretse u Rwanda, ibindi bihugu nk’u Burundi, Jamaica, Trinidad et Tobago nabyo byemejwe nk’abanyamuryango bashya ba Loni.

Uwo munsi ku mirongo y’ibyigwa hari ingingo nyinshi ariko iyo kwemera abanyamuryango bashya niyo yagombaga kubanza.

Tariki 26 Nyakanga 1962 Akanama gashinzwe umutekano kari kemeje ko Repubulika y’u Rwanda n’Ubwami bw’u Burundi bwemererwa kuba abanyamuryango ba Loni ariko bategereza Inteko Rusange ngo ibyemeze.

Bimwe mu bihugu bya mbere muri Afurika byari byaramaze kwemererwa kuba abanyamuryango byarimo nka Repubulika ya Congo, Ethiopie, Guinée na Liberie, ndetse ni nabyo byatanze ubuhamya bwiza k’u Rwanda ngo rwemerwe.

Umunya-Pakistan, Muhammad Zafarullah Khan, ni we wari Perezida w’iyo Nteko Rusange, ni nawe wafunguye inteko azana ingingo yo kwemera u Rwanda nk’umunyamuryango mushya.

Yagize ati “Ba nyamuryango mwitabiriye Inteko rusange, imbere yanyu muhafite imbanzirizamwanzuro A/L.391 washyigikiwe n’u Bubiligi, Congo, Ethiopia, Guinea na Liberia. Ese mfate ko inteko rusange yemeje ku bwiganje busesuye ko Repubulika y’u Rwanda iba umunyamuryango w’Umuryango w’abibimbye?”

Ibihugu byari aho byose byemeje mu buryo busesuye ko u Rwanda ruba umunyamuryango, nuko Khan ategeka ko itsinda ry’intumwa zaturutse mu Rwanda ziyobowe na Perezida Kayibanda ziherekezwa zikajyanwa kwicara mu mwanya wagenewe u Rwanda muri Loni.

Ibihugu bishya bimaze kwemezwa, umwanya wahawe Walter Loridan wari uhagarariye u Bubiligi mu nteko rusange, ngo ageze ijambo ku bitabiriye dore ko igihugu cye ari cyo cyari kimaze imyaka 43 kiragijwe u Rwanda n’u Burundi kikaba cyaranashyigikiye ko byinjizwa muri Loni.

Loridan yatangiye ataka igihugu cye akazi keza cyakoze, ndetse yemeza adashidikanya ko kuba byarabonye ubwigenge, ibuye ry’ifatizo ngo ibyo bigerweho ryashyizweho n’u Bubiligi.

Ati “Ku Bubiligi, kwemerwa kw’ibi bihugu ni ikamba tubonye rivuye mu muhate w’imyaka myinshi twamaze dushyira ibuye ry’ifatizo ku buzima aba bagombaga kuriririho mu buryo bwiza. U Rwanda n’u Burundi, nitwe u Bubiligi twabigejeje ku bwigenge. Uyu munsi bifite abayobozi bashoboye ari nayo soko y’iterambere n’inzego zubakiriye kuri demokarasi bafite.”

Loridan yavuze ko umutekano muri ibyo bihugu wabaye mwiza nyuma y’aho biboneye ubwigenge ndetse ko bigaragaza ko iterambere rizashoboka, icyakora avuga ko bitazashoboka ibihugu bikomeye nk’u Bubiligi bitabigizemo uruhare.

Ati “Nubwo ibi bihugu bishya bihagaze neza, bizakomeza nta kabuza gukenera inkunga ivuye hanze haba mu bya tekiniki n’iby’imari. U Bubiligi ntabwo buzitesha ayo mahirwe. Twavuze kenshi ko tuzakomeza gufasha ibi bihugu byombi kugira ngo bigere ku ntego zabyo.”

Loridan amaze kuvuga, yahawe amashyi hakurikiraho Perezida Kayibanda, avuga mu rurimi rw’Igifaransa nubwo inyandiko za Loni zigaragaza ibyabaye uwo munsi zanditse mu rurimi rw’Icyongereza.

Yatangiye avuga ko abanyarwanda na Leta ayoboye bishimiye kuba bwa mbere mu mateka, bahagaze mu Nteko rusange ya Loni.

Ati “Ni ibyishimo kuri njye, Guverinoma y’u Rwanda n’abanyarwanda uyu munsi babaye abanyamuryango ba Loni bakaba bagiye gutanga umusanzu mu kugera ku ntego uyu muryango wiyemeje , iterambere rya muntu n’ubufatanye.”

Kayibanda imbere ya Loni, yavuze ko igihugu gitekanye, ko abategetsi babi bahoze mu gihugu bakirukanywemo (yavugaga abatutsi kandi nabo ari abanyarwanda), abakoloni bakaba baragiye.

Ati “Nubwo n’ingabo zacu zikiri nto, ubu igihugu cyacu gifite amahoro. Abaturage bacu bari ku murimo , Guverinoma yacu iri gukorana imbaraga n’umurava . Ibikorwa byose dushingira ku mikoro ahari ndetse n’icyerecyezo abayobozi bihaye cyo kuzamura imibereho myiza y’abaturage n’iterambere rishingiye kuri demokarasi mu gihugu cyacu.”

Kayibanda yavuze ko u Rwanda rugikeneye inkunga z’ibihugu bikize ngo rutere imbere ndetse n’ubufasha mu bya tekiniki.

Yavuze ko muri Loni bazashyigikira abarwanya ubugizi bwa nabi, abashishikajwe n’imibanire myiza y’ibihugu, n’abashyigikiye iterambere.

Ati “Turi kumwe n’abarwanya ivangura n’ubugizi bwa nabi , turi kumwe n’abarajwe ishinga n’ubufatanye hagati y’ibihugu n’abagamije guteza imbere ukwishyira ukizana. U Rwanda ruzahora ruri ku ruhande rw’abarajwe ishinga n’iterambere.”

Kayibanda n’itsinda yari ayoboye bagiye muri Loni, mu Rwanda bahasize inzobere za Loni zari zaje kwiga ibyo igihugu gikeneye kurusha ibindi ngo bajye kubashakira inkunga.

Perezida Kayibanda yasabye ubunyamabanga bwa Loni kuzaca inkoni izamba ubwo bazaba basuzuma ubusabe bw’inkunga u Rwanda rwatse, ati “Ndasaba abazasuzuma ibyo tuzaba twatanze dusaba gufashwa, kuzatwitaho cyane. Ni nabyo nsabira n’ibindi bihugu biherutse kubona ubwiogenge nkatwe.”

Intumwa z’u Burundi zaje zitinze uwo munsi ntizabona umwanya wo kuvuga ijambo , inama isozwa ahagana saa kumi n’imwe n’igice z’umugoroba havugwa ishimwe rya Jamaica nyuma yo kwemera nk’umunyamuryango wa Loni.

Amahoro yavugiwe muri Loni uwo mwaka asa nk’aho yari ku munwa kuko mu mwaka wakurikiyeho mu 1963, bamwe mu banyarwanda bari barahunze biyitaga ‘Inyenzi’ bagabye igitero mu Rwanda, Leta ya Kayibanda yadukira abatutsi b’imbere mu gihugu irabica ku buryo abasaga ibihumbi 20 000 bishwe bamwe bakicirwa mu nsengero, mu ngo n’ahandi. Ibindi bihumbi uwo mwaka byahunze igihugu.

Ubugizi bwa nabi bwarakomeje kugeza mu 1973 ubwo Kayibanda yahirikwaga ku butegetsi na Habyarimana Juvenal, nubwo ingengabitekerezo icamo ibice abanyarwanda nayo yakomereje kugeza mu 1994 habaye Jenoside yakorewe Abatutsi igahitana abasaga miliyoni.

Kuba u Rwanda rwarinjiye muri Loni, muri Repubulika ya mbere n’iya kabiri bisa nk’aho nta mumaro munini byagejeje ku baturage kuko nta na rimwe Loni yamaganye ubwo bwicanyi cyangwa ngo ishyire igitutu ku babukoraga.

Mu 1994 ubwo Jenoside yakorwaga, ingabo za Loni zari mu Rwanda zarigendeye zisiga abaturage bicwa ndetse hamwe nko kuri ETO Kicukiro zisiga ibihumbi by’abatutsi mu maboko y’Interahamwe .

Ubwo ibendera ry'u Rwanda n'ay'ibindi bihugu bitatu byari byinjiye muri Loni yazamurwaga ku cyicaro cya Loni muri Nzeri 1962
Kayibanda mu nyubako iberamo Inteko Rusange ya Loni
Aha Kayibanda (uwa kabiri ibumoso) hamwe n'abandi bayobozi mu Rwanda bari basuye icyicaro gikuru cya Loni
Ubutegetsi bwa Kayibanda bwavugaga hose ko mu gihugu ari amahoro
Kayibanda aganira na bamwe mu bayobozi ba Canada
Kayibanda aganira na bamwe mu bayobozi ba Canada muri Kanama 1967
Mu 1967 ubwo Kayibanda yari yagiriye uruzinduko muri Canada
Ubutegetsi bwa Kayibanda bwavugaga ko mu gihugu hari amahoro ariko bamwe mu baturage bicwa

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza