Iya 10 Mata: Abarwayi 100 biciwe muri CHUK muri Jenoside

Yanditswe na David Eugène Marshall
Kuya 10 Mata 2018 saa 09:52
Yasuwe :
0 0

Hari ku Cyumweru, tariki ya 10 Mata 1994 muri Jenoside yakorewe Abatutsi, ubwo mu Bitaro bya Kaminuza bya Kigali (CHUK), hicirwaga abarwayi bagera ku 100 bishwe n’abasirikare ba leta nk’uko Komisiyo y’Igihugu yo Kurwanya Jenoside yabyemeje.

Iyo ugeze muri CHUK, uwo ubajije ku mateka ya Jenoside, akubwira ko habereye ubwicanyi ndengakamere, hakicwa abari baharwariye n’abarwaza babo.

Mu buhamya hanavugwa abamamaye mu kwica, harimo uwamenyekanye ku kazina k’akabyiniriro ka ‘Kamashini’, ariwe ngo wari ushinzwe guhuza ibikorwa byo kwica, abifatanyijemo n’abakozi b’ibi bitaro.

Mukaruzima Dativa wari umukozi muri ibi bitaro mu gihe cya Jenoside itangira ndetse akaza no kuyirokoka, wanahakoze kugeza agiye mu kiruhuko cy’izabukuru mu minsi mike ishize, avuga ko habaye ubugome buteye ubwoba kwica abarwayi .

Yemeza ko ubwicanyi bwakorwaga na bamwe bari abaganga, abakozi b’ibitaro ndetse n’itsinda ry’abasirikare ryari rifite akazi ko gufasha abicanyi riyobowe na Kamashini na bagenzi be bo mu gisirikare cya leta.

Uretse itariki ya 10 hishweho abantu benshi, Mukaruzima avuga ko umunsi utazibagirana muri CHUK ku bijyanye na Jenoside yakorewe Abatutsi, ari itariki ya 25 Gicurasi 1994, ubwo bamwe mu bayobozi b’ibitaro b’icyo gihe biyemezaga guhambira bagakurikira Guverinoma y’Abatabazi yari imaze kwimukira i Murambi ya Nyamabuye mu cyahoze ari Perefegitura Gitarama.

Muri uko guhunga, ngo bajyanye n’ibikoresho birimo n’imiti ariko by’agahomamunwa basiga bahorahoje Abatutsi bari baharwariye. Ngo uwo bari bazi ko arembye cyane, bamukuragaho ubufasha nk’imiti cyangwa serumu.

Mukaruzima yagize ati “Mu guhunga kw’abakozi batwaye ibikoresho byinshi bishoboka, noneho mu kugenda basiga bishe Abatutsi, bica abarwaza ndetse n’uwakanyakanyaga baramwica, noneho abo bumvaga bari bwipfishe kubera ko nta miti, barabareka barigendera kuko nk’abaganga babonaga ko atashobora kubaho nta miti.”

Mukaruzima kandi asoza avuga ko hari abakozi babaye intwari ntibijandika muri ubwo bwicanyi ndetse bakomeza no gufasha abarwayi batahigwaga mu duti duke twari twahasigaye.

Hari n’abaganga ngo bahishe abarwayi mu gihe bagenzi babo babahigaga.

Urwibutso rwa Jenoside yakorewe Abatutsi ruri muri CHUK

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza