Inkomoko y’Insigamugani: Agahugu umuco akandi umuco!

Yanditswe na IGIHE
Kuya 11 Nyakanga 2018 saa 06:09
Yasuwe :
0 0

Uyu mugani wegeka igihugu ho umuco wacyo, bawuca iyo bashaka gukemura impaka zishingiye ku migenzereze y’aha n’aha; nibwo bazikiranura bagira bati “Agahugu umuco, akandi umuco”.

Wakomotse kuri Mutaga Sebitungwa, umwami w’u Burundi, ahayinga umwaka w’i 1700. Icyo gihe mu Rwanda hari ku ngoma ya Cyirima Rujugira, hakaba hari Abanyarwanda bari baracikiye i Burundi barimo Bicura bya Rwaka rwa Mazimpaka na Budengeri bwa Ndabarinze.

Ubwo Cyirima yari amaze kuzungura murumuna we Karemera Rwaka ku ngoma kuko yari amaze guhuma, Bicura na Budengeri bamaze gucika, basanze Mutaga ahitwa i Nkanda mu Buyenzi (Gikongoro) hari hakiri ah’u Burundi; bamutekerereza ibyabo.

Yarabakiriye arabahaka, ndetse aranabatonesha; abashyira mu bandi bahungu (abagaragu b’ibwami batari abatware). Bamaze kubageramo barabimenyereje, baramenyerana kuko na bo bari ingenzi.

Mutaga yarabibakundiye bigeza ubwo abagira abatware be, bukeye araza inkera, abatware n’abahungu bagumya kunegurana n’abo banyarwanda bombi (Budengeri na Bicura).

Abarundi barababaza bati “Kuki Umwami w’i Rwanda mumwita Cyirima ntimumwite Kibarima! Mwahinduye izina rye mukamwita Kibarima kuko ari we wabamaze!?” Bicura na Budengeri barabasubiza bati “Twacitse tutari abiru, none muzatume kuri Cyirima n’abiru be bazabasobanurire impamvu ya byo!”

Ubwo Mutaga arabumvira, ageze aho ati “Nimureke mbamare impaka. Ejo nzatuma umuntu kuri Cyirima azadusobanurire icyo iryo zina rivuga.”

Bukeye ashaka ibintu byo kumutashya birimo impu z’ingwe n’amahembe y’inzovu. Niko kera byagendaga; umwami watumaga ku wundi yamwohererezaga intashyo; ari yo maturo, intumwa ikayajyana, ikavuga icyo ishatse ntigire icyo iba. Ni na yo nkomoko y’umugani baca bagira bati “Intumwa irarabirwa ntiyicwa.”

Ni uko intumwa ya Mutaga iragenda no kwa Cyirima, imusanga i Ntora ubu hitwa ku Gisozi muri Gasabo, ubu ni mu Mujyi wa Kigali, imusohoreza ubutumwa bwa Mutaga, hanyuma Cyirima n’abahungu babura icyo bayisubiza, gusa barayibwira bati “Genda uzatubarize Mutaga uti ni kuki i Burundi haba inka ariko umwami waho akarenga akimana n’isekurume y’ihene?”

Bayiha Mutemura sekuruza wa Musenyeri Kagame ngo bajyane azamusubize, bagezeyo Mutemura abwira Mutaga ati “Cyirima yakuntumyeho ngo azagusobanurira izina rye umaze kumubwira igituma Umwami w’i Burundi yimana n’imfizi y’ihene kandi i Burundi hari amapfizi y’inka.”

Mutaga amara akanya yiyumvira, abaza Mutemura ati “Witwa nde?” Undi ati “Ndi Mutemura.” Mutaga ati “Harya imfizi y’inguge n’iy’ihene ikiruta ikindi ni ikihe?”

Ubwo yamubwiraga ko umwami w’u Rwanda yimana n’isekurume y’inguge, Mutemura abaza Mutaga ati “Ese ubwo hatsinzwe nde?” Ubwo yashakaga kumubwira ko yatumye kuri Cyirima ubusa.

Nuko Mutaga abyumvise atyo atuma Mutemura ati “Genda umubwire uti “Nimurekere aho gutumanaho bene ayo magambo y’umuco w’abantu uti “Agahugu umuco, akandi umuco.”

Guhera ubwo rero uwo mugani wamamara mu Burundi no mu Rwanda, abantu baba bagiye impaka ku migenzereze y’aha n’aha ntibemeranwe, bakikiranura bavuga bati “Twoye ayo. Agahugu umuco akandi umuco!” – Umuco - Umwihariko w’imbaga isangiye imisango ya burijo (igihe cyose).


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza