Ingoma ya Cyilima Rugwe: Intango y’ibyiciro by’ubudehe, ubuhutu, ubututsi n’ubutwa

Yanditswe na Nsanzabera Jean de Dieu
Kuya 3 Ukwakira 2018 saa 10:05
Yasuwe :
0 0

Nk’uko twabibasezeraniye mu nkuru iheruka, tugiye gusubukurira aho twasubikiye tubagezaho ibindi byiciro by’ubudehe, byakuye intango ku ngoma ya Cyilima Rugwe nk’uko bikubiye mu gitabo “Intwari z’Imbanza zubatse u Rwanda rugahamya igitinyiro”.

Dukomereje ku cyiciro cya kabiri cy’ubudehe mu Rwanda rwo ha mbere ni cyo bitaga “Ubuhutu”abakibagamo bakitwa “Abahutu.”

Ubuhutu bwadutse ku ngoma ya Cyilima I Rugwe, ahasaga mu wa 1345 ubwo u Rwanda rwari rumaze kwigarurira Ingoma y’u Buliza.

Icyo gihugu gishya bari bamaze komeka k’u Rwanda, batangiye kugitoza ubworozi bw’inka, ni bwo noneho imiryango yari ifite Inka nyinshi yatangiye gushaka abo bazigabira ngo babafashe kuzigwiza no kuzikwirakwiza mu bihugu bari bigaruriye.

Kuko Inka yari ubukungu fatizo bw’igihugu, zagombaga kuba nyinshi kugira ngo uko abaturage biyongera mu kwigarurira ibihugu ari nako ubukungu bw’igihugu bwiyongera.

Abari bafite inshingano yo kugaba izo nka, ni abari mu cyiciro cya mbere cy’abatunzi bahejeje mu butunzi no mu myumvire aribo bitaga Abatutsi.

Ubuhutu bwari mu cyiciro cy’ubudehe cyari kigizwe ahanini n’abamaze guhembuka gake batangiye gusobanukirwa n’ibyiza by’ubworozi bw’inka bwadukanywe n’Abanyiginya.

Ubuhutu kandi cyari icyiciro cy’abitabiriye kuyoboka Abanyiginya mu gihe cy’itsindwa ry’ibihugu byabo mu gihe cy’iyagurwa ry’igihugu cy’u Rwanda. Abanyiginya nabo bakabitura kubagabira Inka nk’ikimenyetso cy’ikirenga cyarangaga umukire muri ibyo bihe.

Ubuhutu ryari izina rusange ku bagabye (Abatutsi) n’Abagabiwe (Abahutu), ni ukuvuga ko nta wabashaga kwita undi umuhutu ataramugabiye Inka.

Ubuhutu ni ijambo rishaka kuvuga “ubugaragagu bushingiye ku Nka."

Ubuhutu kandi ryari izina rusange ry’abagaragu kuri ba Sebuja. Inka zagabirwaga Umuhutu zitandukanye n’izatangwaga mu buhake, kuko inka yo mu cyiciro cya kabiri cy’ubudehe yabaga ari iy’ubuntu, naho iy’ubuhake yo ikaba yaratangwaga habanje kuyikorera.

Icyo cyiciro cya kabiri cy’ubudehe cyateje u Rwanda imbere cyane kuko cyamaze imyaka myinshi igera kuri 587 (1345-1932) gituma u Rwanda rugira Inka nyinshi.

Kubera ko ibihugu u Rwanda rwagiye rwigarurira rwari rwarabanje gukoresha politiki yo kubagabira Inka, abenshi muri byo bari bamaze kujijukirwa n’ubukungu bwihishe mu bworozi bw’inka, maze uko Gasabo yoromya ibihugu, ni nako borozaga abaturage Inka.

Icyiciro cy’ubudehe cya kabiri ntabwo cyari icyiciro gisuzumirwamo imiterere y’ubutunzi gusa, cyari n’icyiciro kigaragariza ubuyobozi abaturage bafite imyumvire yo kuyoboka itangiye kuzamuka mu mushinga ubaraje ishinga mu kubaka u Rwanda no kurwagura.

Benshi mu bari biganje muri icyo cyiciro babaga ari abaturage b’ibihugu u Rwanda rwabaga rwigaruriye. Bityo bakitabwaho nk’abafite aho bageze, atari uguhera ku busa.

Mu gice gikurikira tuzakomereza ku cyiciro cya gatatu cy’Ubutwa cyabagamo abiswe ‘Abatwa.’


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza