00:00:00 IGIHE NETWORK KN KINYARWANDA EN ENGLISH FR FRANCAIS

Amateka y’ibigega by’i Nyanza byashibutse mu cyerecyezo cy’Umwami Rudahigwa

Yanditswe na Karirima A. Ngarambe
Kuya 31 Ukwakira 2021 saa 07:24
Yasuwe :
0 0

Abantu benshi batembera cyangwa bagana mu Majyepfo y’u Rwanda no mu bindi bice by’u Rwanda baturutse mu Majyepfo, baca mu gasantere kazwi cyane bita ku Bigega muri Nyanza.

Abenshi biranabatungura cyane kuko nta bigega uhita uhabona nka bimwe bya Kinyarwanda, bikabatera amatsiko yo kumenya aho iryo zina ryaturutse.

Ku Bigega ni agasantere kuri ubu kabaye ihuriro ry’abagenzi b’impande zose. Nta modoka yaba iya rusange cyangwa iy’abantu ku giti cyabo ihagera ngo igende idahagaze kubera serivisi zitandukanye zihatangirwa, ziganjemo ibiribwa n’ibinyobwa biramira abari mu rugendo.

Urugwiro rw’abasore n’inkumi bagusanganiza ibyo wifuza mu buryo bw’umwihariko, inseko yerekana ko umukiliya ari umwami ni byo twasanze ubwo twasuraga aka gasantere gafite umwihariko mu mateka y’u Rwanda.

Mu kiganiro na Ndayambaje Alexis, Umukozi w’Ingoro y’Abami mu Rukari, ushinzwe kwakira no gusobanurira amateka yaho, yavuze ko aho hantu hiswe ku Bigega biturutse ku bigega byo guhunikamo imyaka umwami Mutara III Rudahigwa yahubakishije, ubwo igihugu cyari kimaze kwibasirwa n’inzira karundura ya ‘Ruzagayura’.

Inzara ya Ruzagayura yatangiye ahagana mu Ukwakira kwa 1943. Yatewe n’amapfa yamaze imyaka ibiri. Ayo mapfa yatangiye muri Nzeri 1942, yongera kubaho nyuma gato y’itumba ryo mu 1943. Abanyamateka bashimangira ko ishobora kuba yarahitanye abantu ibihumbi 300.

Ndayambaje yavuze ko kubakisha ibyo bigega by’i Nyanza ari ikimenyetso cy’uburyo Umwami Rudahigwa yarebaga kure.

Ati “Umwami Rudahigwa yarebaga kure, igihe cyose yatekererezaga uko umuturage yamererwa neza ndetse ashyiraho ibigega nyuma y’amage y’inzara ya Ruzagayura, aho yagize ati ‘hatazongera kubaho inzara nk’iyi ikayogoza igihugu’. Ni bwo mu 1947 abyubatse hano i Nyanza, kugira ngo hahunikwe imyaka, ikoreshwe igihe bibaye ngombwa”.

Yakomeje avuga ko uku kureba kure kwa Rudahigwa ari nako kwakomotseho icyerecyezo cya Leta y’Ubumwe cyo gushyira ibigega hirya no hino ngo bihunikwemo imyaka igihe yeze ku bwinshi, izagoboke abaturage mu bihe by’amapfa.

Ati “Ni yo mpamvu igihugu cyacu mu buyobozi bureba kure aha hakomeje guhunikwa imyaka ndetse ibigega bikaba biri hirya no hino mu gihugu.”

Murekatete Aline, umukozi ushinzwe Ibigega bya Nyanza na we yavuze ko ibigega by’i Nyanza ubu byashyizwe mu maboko ya Minisiteri y’Ubuhinzi n’Ubworozi guhera mu 2010, kugira ngo bihunikwemo imyaka izagoboka abaturage, kandi ngo bimaze gutanga umusaruro.

Ati “Urugero nko mu gihe cy’icyorezo cya Covid-19 mu bihe bikomeye twabayemo muri Guma mu rugo, ngira ngo mwarabibonye hirya no hino mu itangazamakuru, Guverinoma yahaga abaturage ibibatunga biturutse muri ibi bigega.”

Murekatete yavuze ko mu bigega by’i Nyanza hahunikwa cyane cyane ibishyimbo, indi myaka igahunikwa mu bindi bigega byubatse hirya no hino mu gihugu, ku buryo iyo bibaye ngombwa ko Guverinoma igoboka abaturage, iyo myaka yose ihurizwa hamwe igafashishwa abayikeneye.

Ukigera mu gasantere ko ku Bigega uhita ubona icyapa kiharanga
Ibi bigega byubatswe mu 1947 ku iteka ry'Umwami Mutara III Rudahigwa
Ibi bigega byubatswe u Rwanda rumaze imyaka ibiri rwibasiwe n'inzara ya Ruzagayura
Guhunika imyaka ngo izagoboke abaturage bimaze kuba umuco mu gihugu
Ibi bigega bifatiye runini abaturage, byanakomotseho igitekerezo cyo kubaka ibigega bihunikwamo imyaka hirya no hino mu gihugu
Murekatete Aline, umukozi ushinzwe Ibigega bya Nyanza avuga ko ibigega by'i Nyanza byagize uruhare rukomeye mu kugoboka abaturage mu bihe bya Covid-19
Ndayambaje na Murekatete bavuze ko ibi bigega bifitiye igihugu akamaro gakomeye
Ibi bigega bikunze guhunikwamo ibishyimbo
Mu gasantere ko ku Bigega abantu aba ari urujya n'uruza buri munsi
Ndayambaje (ibumoso), Murekatete n'umunyamakuru Karirima ubwo yasuraga ibigega by'i Nyanza byifashishwa mu guhunika imyaka
Icyuzi cya Nyamagana Umwami Rudahigwa yari yarubakiye rubanda mu rwego rwo kubarinda amapfa, ikindi kimenyetso kigaragaza ko yarebaga kure

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .