00:00:00 IGIHE NETWORK KN KINYARWANDA EN ENGLISH FR FRANCAIS

Amaso ahanzwe u Budage ku duhanga tw’Abanyarwanda bubitse

Yanditswe na Ferdinand Maniraguha
Kuya 1 Ugushyingo 2021 saa 06:40
Yasuwe :
0 0

Imyaka itandatu irashize bitangajwe ko mu Budage hari uduhanga tw’Abanyarwanda dusaga igihumbi, twajyanweyo ubwo icyo gihugu cyakolonizaga u Rwanda.

Nta makuru menshi yigeze atangazwa kuri utwo duhanga n’amazina ya ba nyiratwo cyangwa aho twaturutse, gusa icyizwi ni uko umuryango Prussian Cultural Heritage Foundation ucunga inzu ndangamurage z’i Berlin, watangaje ko utwo duhanga twajyanwaga mu Budage ngo hakorwe ubushakashatsi.

U Budage bwakolonije u Rwanda kuva mu 1885 kugeza mu 1916. Bikimara gutangazwa ko utwo duhanga turi i Berlin, u Rwanda rwakoze ibishoboka byose ngo tugarurwe mu gihugu.

Inzego zibishinzwe zatangaje ko zibirimo ngo ‘abo babyeyi’ bagaruke gushyingurwa ku ivuko.

Umuyobozi w’Inteko y’Umuco, Ambasaderi Robert Masozera yabwiye IGIHE ko n’u Budage bwagaragaje ko bushaka ko utwo duhanga tugarurwa mu Rwanda, igisigaye ari ukuganira ku buryo bizakorwamo.

Yagize ati “Na bo turaganira uburyo yatahurwa kuko na bo barabishaka. Hari hasigaye gusa kuganira ku mpande zombi kugira ngo harebwe uburyo byakorwa, turebe ngo abo bantu bageze hano bashyingurwa gute?”

Masozera yavuze ko iyo mibiri nigera mu Rwanda, hazarebwa ahantu ho kuyishyingura hakaba urwibutso.

Ati “Ni ababyeyi bacu, nta nubwo tubyita imibiri tubita ababyeyi, abasogokuruza. Ni ukubashyingura mu cyubahiro nk’uko dusanzwe tubikora mu gihugu ubundi hakaba ahantu h’urwibutso, ni cyo cyifuzo ariko ni ibintu tukiganira na bo.”

Ntabwo harasobanurwa niba utwo duhanga twarajyanywe mu Budage nyuma y’uko ba nyiratwo bishwe cyangwa niba babaga ari abantu bapfuye urupfu rusanzwe.

Masozera yavuze ko hari byinshi bitaramenyekana kuko abenshi banajyanwaga mu ibanga.

Ati “Habaye ubushakashatsi hirya no hino, ni ibya kera ugasanga bamwe nta nubwo abantu bari babizi ariko impamvu batanabimenye ni uko akenshi byanakorwaga mu ibanga […] Ni ibintu byagiye mu 1905 kugeza mu 1908 gutyo, abo kandi bari bakuru, kugira ngo rero uzabone imiryango yabo ni igikorwa cy’ubushakashatsi ariko birashoboka. Aba ni ababyeyi bacu, amasano aba ahari.”

Ntabwo igihe utwo duhanga tuzashyikiririzwa u Rwanda kiramenyekana ariko Masozera yavuze ko ku ruhande rw’u Rwanda biteguye.

Uretse uduhanga tw’abanyarwanda, Umuryango Prussian Cultural Heritage watangaje ko ubitse n’uduhanga dusaga 60 twaturutse muri Tanzania.

Umwaka ushize u Budage bwashyikirije Namibia uduhanga tw’abaturage bayo bo mu bwoko bw’Abaherero n’aba-Nama bishwe n’Abadage ubwo bajyaga kubakoloniza guhera mu 1904.

Abo baturage bishwe bazira kwanga ko Abadage bigabiza ubutaka bwabo, Abadage babihimuraho babica ndetse ubwo bwicanyi hari abanyamateka babufata nka ‘Jenoside’, dore ko bwaguyemo abarenga ibihumbi ijana.

Imitwe y’ababaga bamaze kwicwa, imwe yajyanwaga mu Budage ngo ikorweho ubushakashatsi, hagaragazwe niba abirabura bafite ubwenge, ubuhangange n’imiterere nk’iy’Abanyaburayi.

U Budage bumaze gutsindwa intambara ya mbere y’Isi yose, mu bihano bwahawe harimo kwamburwa ibihugu bwari bukolonije. U Rwanda rwahise ruhabwa Ababiligi kugeza mu 1962 rubonye ubwigenge.

U Bubiligi nabwo hari ibimenyetso ndangamurage n’amateka y’u Rwanda bwatwaye kandi bimwe muri byo byatangiye kugarurwa mu gihugu. Nko mu mwaka ushize, icyo gihugu cyashyikirije u Rwanda inyandiko n’amakarita agaragaza ubukungu buri munsi y’ubutaka bw’u Rwanda hashingiwe ku bushakashatsi bwagiye bukorwa mu gihe cy’ubukoloni.

Mu mpera z’icyumweru gishize kandi, u Bubiligi bwashyikirije u Rwanda indirimbo n’imbyino gakondo bisaga 4000 byajyanywe guhera mu myaka ya 1950.

U Budage bwatangaje ko bubitse uduhanga dusaga igihumbi tw'Abanyarwanda twajyanywe mu gihe cy'ubukoloni

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .