IGIHE.com > Ubuzima > Indwara
Iyo Ubumuga bw’ingingo bukurikiranywe umuntu akiri muto burakira kandi bitamuhenze

Iyo Ubumuga bw’ingingo bukurikiranywe umuntu akiri muto burakira kandi bitamuhenze


Yanditswe kuya 4-07-2012 - Saa 15:18'


Nk’uko byagaragaye abanyarwanda benshi iyo bavukishije umwana ufite ubumuga bw’ingingo, nubwo bitabashimisha ariko ntibakunze kugira icyo babikoraho. Benshi babyakira uko babibonye ntibamenye ko ari ibishobora gukosorwa, bigakira.

Mu miryango myinshi ubumuga bw’ingingo, bukunze gutera amakimbirane mu miryango nk’aho usanga abagore bakubitwa bazira kubyara ibirema. Aho batabipfuye ho usanga babifata nk’umuvumo w’umuryango utagira icyo uhindurwaho.

Mu rwego rwo guhugura abantu ku bijyanye n’indwara zimugaza twegereye muganga akaba n’inzobere mu kuvura indwara z’amagufa Dr. Nsengiyumva Emmanuel maze adusobanurira birambuye indwara y’ubumuga bw’ibirenge bita (pieds bots) ndetse n’aho ihuriye kandi itandukaniye n’izindi ndwara zimugaza amagufa mu myaka y’ubukure bw’umuntu.

Indwara "pieds-bots" ni bwoko ?

Dr Emmanuel Nsengiyumva avuga ko ari indwara imugaza ibirenge ariko ubu bukaba ari ubumuga umuntu avukana ngo ndetse hakoreshejwe ibyuma by’ikoranabuhanga bikoreshwa kwa muganga ushobora kubona ko umwana afite ubwo bumuga akiri mu nda.

Twamubajije icyaba gitera iyo ndwara adusubiza ko impamvu yambere iterwa n’imiterere y’umwana mu nda ya nyina ishobora kuvamo inkomoko yo kumugara kwe ari nabyo ahanini bifata 90%. Indi mpamvu yatubwiye ni uruhererekane rw’amaraso mu muryango (génétique) bityo ikaba indwara y’ibisekuruza iyo hari uwayirwaye mu muryango ashobora kuzayanduza abazamukomokaho bifite irindi janisha ryose risigaye (10 %).

Dr.Nsengiyumva kandi avuga ko hariho amoko ane y’ubumuga bw’ibirenge. Hari ubwo usanga uwamugaye agenda ashinze amano adakoza hasi agatsinsino. Hari ubwo usanga ubworo bw’ikirenge budakora hasi ufite ubu bumuga agasa n’ugendesha hejuru h’ikirenge, hari ubwo usanga agatsinsino ariko gakandagira konyine bityo ugasanga ibindi bice bisa n’ibireba hejuru, n’ibindi.

Ni indwara ivurwa igakira

Ibyerekeranye no kuvura iyi ndwara, Dr. Nsengiyumva avuga ko uburyo bukoreshwa mu gukosora ufite ubu bumuga, ari ubwo gukotera ufite pieds bots. Bakoresha kandi ubuhanga bwo kubaga igice cyamugaye hagakururwa imitsi igakora nk’iyindi.

Dr Nsengiyumva asobanura ko umuntu wese uko yaba angana kose abasha kuvurwa ngo gusa iyo akuze kubera amagufa aba akomeye kumuvura biragorana kandi ntibimworohera gukira ngo agende neza nk’uko bikwiye, ndetse icyo gihe biramuhenda kandi n’amavuriro abasha kuvura abatarakosowe bakiri abana ni make.

Ku bijyanye n’ikiguzi cyo kuvura ubu bumuga, uyu muganga yakomeje atubwira ko bihendutse cyane iyo umuntu akurikiranywe akiri muto kuko mutuelle ibasha kwishyura. Ku bigo nderabuzima byaba bibasha kwakira abafite iki kibazo, yatubwiye ko amavuriro hafi ya yose abasha gukemura iki kibazo iyo abavurwa bakiri bato ngo naho iyo ari bakuru bakurikiranwa mu mavuriro asanzwe yita ku bamugaye nka Gatagara, Rilima….

Umubare w’ababa bafite ubu bumuga kugeza ubu ntabwo uzwi neza ngo gusa ku bana 1000 bavuka babiri baba bafite iki kibazo (0.2 %). Uyu muganga kandi yemera ko hashyizwe imbaraga nkeya mu gukangurira abantu kwivuza izi ndwara ariko ngo ubukangurambaga bwatangiye ndetse ngo bagiye no gusohora inyandiko zivuga kuri ubu bumuga bazimanike ku bigo nderabuzima hose mu gihugu.

Ingaruka z’ubu bumuga

Ku bjyanye n’ingaruka z’ubu bumuga, avuga ko ari nyinshi ngo harimo izifata ku miterere y’umuntu bityo hari ibyo abandi bakora uyu ufite ubu bumuga akaba atabishobora. Ndetse byangiza umurwayi mu mitekerereze igihe cyose aba abona ko atameze nk’abandi, bityo ahorana ipfunwe hakaba hari n’ubwo yumva hari n’aho atakandagira.

Kubera ko iyi ndwara ivurwa kandi igakira, Dr Nsengiyumva akangurira abaganga kujya bagira inama ababyeyi babyaye abana bafite ubu bumuga kujya bahita babakurikirana bakivuka kuko bashobora gukira bakagenda neza nk’abandi bantu.

Iyi ndwara ya pied-bots yayitandukanije n’izindi ndwara zishobora kumugaza amaguru kandi umuntu atarazivukanye. Yatubwiye ko zihabwa izina rimwe ariryo rya (rickettsies) mu rurimi rw’icyongereza.

Izi zo zishobora gutuma uzirwaye agenda akomanya amavi cyangwa amaguru akaba nk’imiheto (benshi babyita paranthèse) kandi umuntu atarabivukanye.
Ngo impamvu zitera izi ndwara harino indwara zifata amagufa, indwara z’ingingo ubwazo, cyangwa se uburwayi bw’ikindi gice gikorana n’amaguru nk’ibirenge cyangwa mu matako, hari kandi kubura kw’imyunyu mu mubiri bitewe no kurya nabi, ubwandu bufata urugingo narwo rukanduza izindi, indwara iva ku gisekuruza.

Izi ndwara iyo uzikurikiranye hakiri kare, zishobora kuvuzwa imiti ikomeza amagufwa, cyangwa gukosora indyo ariko iyo zifashe umuntu urengeje imyaka irindwi avurwa no kubagwa amagufwa kandi bigakorerwa mu bitaro bizi kubaga amagufwa.

Kubera izi ndwara ziza abantu bakuze kandi impamvu zitagaragarira buri wese, bamwe bashobora kuzitiranya n’amarozi bityo ntibivuze cyangwa bakajya aho bidashoboka ndetse bikabyara n’amakimbirane mu miryango.
Kuri izi ndwara za (rickettsies) muganga atanga inama y’uko ababyeyi bajya bitegereza abana babo kugira ngo bamenye icyahindutse mu miterere yabo bityo bakurikiranwe hakiri kare.

TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!

IBITEKEREZO