Uturere twose twasabwe gushyiraho itsinda ryihariye ryo guhangana na malaria

Yanditswe na David Eugène Marshall
Kuya 5 Gicurasi 2018 saa 08:21
Yasuwe :
1 0

Imibare itangwa n’Ikigo cy’Igihugu cy’Ubuzima (RBC) igaragaza ko indwara ya malaria ikomeje gukaza umurego, dore ko mu 2013 abayivuje banganaga na 1,014,500 ariko bageze kuri 4,739,896 mu 2017.

Ni muri urwo rwego rero ku wa 3 Gicurasi 2018, Minisiteri y’Ubuzima yahurije hamwe abafatanyabikorwa bayo, abayobozi b’uturere twose bungirije bashinzwe ubuzima ndetse n’abayobozi b’ibitaro by’uturere mu Rwanda, higwa ku kibazo cya malaria.

Uretse kurebera hamwe gahunda yo kurwanya iyio ndwara hashyirwa mu bikorwa uburyo bwashyizweho, hanafatiwemo ingamba z’uko buri karere kagomba gushinga itsinda ryihariye ryo guhangana n’icyorezo cya malaria uhereye mu nzego z’ibanze kuzamura ku rwego rw’igihugu.

Iryo tsinda ryihariye rikazajya ritanga raporo buri kwezi, riterane rimwe mu gihembwe naho buri mezi atandatu rihure ku rwego rw’igihugu, rihuze amakuru riyasesengure, rirebere hamwe icyarushaho kuba cyiza mu rwego rwo guhashya malaria.

Umuyobozi mukuru wa RBC, Dr Jeanine U. Condo, yagize ati “Ni ngombwa ko inzego zose zihuza imbaraga kugira ngo malaria icike, haba mu kuyirinda, kuyivuza ku gihe ndetse no kwigisha abaturage ibijyanye nayo. Kugira ngo urugamba rwo kuyihashya rube urwa buri wese nta n’umwe usigaye kandi icyizere cyo kuyitsinda kirahari mu bufatanye busesuye bwa buri wese.”

Abari mu nama bunguranye ibitekerezo, Visi Meya ushinzwe imibereho myiza mu Karere ka Kayonza, Harerimana Jean Damascene, atanga icyifuzo ko inyigisho zijyanye na malaria zagezwa no ku bana mu mashuri y’ibiburamwaka.

Yagize ati “Byaba byiza malaria, yigishijwe abana bato, bagakura bayizi bihagije, icyinjizwa muri za kirazira nk’uko biri mu zindi ndangagaciro nyarwanda, cyane ko inyigisho ihawe umwana ayibika neza ikamugirira akamaro mu mibereho ye yose n’igihe azaba mukuru.”

Dr. Aimable Mbituyumuremyi uyobora Ishami rishinzwe kurwanya malaria muri RBC yasobanuriye abari aho ko kurwanya no gutsinda malaria atari umugani kuko hari aho ingufu zagiye zihuzwa zigatanga umusaruro.

Yagize ati “Dufashe nk’urugero ku Karere ka Nyagatare, aho kubera ingamba zo kurwanya malaria zashyizwemo imbaraga harimo no gutera imiti mu mazu y’abaturage ndetse no kuyivurira mu bajyanama b’ubuzima, akarere kavuye ku barwayi 90,000 mu 2015 kageza ku 5000 mu 2017.”

Gusa ngo iyi gahunda yo gutera imiti yica imibu itera malaria ntishobora gutererwa uturere twose kubera ko ingengo igenda ku karere kamwe ubwayo ari miliyari imwe n’igice y’amafaranga y’u Rwanda kandi hari izindi ngamba zagahurijwe hamwe nko gusibanganya ahari ibizenga imibu yororokeramo, gutema ibihuru no gukinga amadirishya kare hamwe no kurara mu nzitiramubu ziteye umuti.

Hanatangajwe ku mugaragaro ko hari gahunda Leta yashyizeho muri Werurwe 2018, yo kwemerera abikorera ku giti cyabo bagacuruza inzitiramubu, byongeye kandi bamwe mu baturage bo mu cyiciro cya gatatu n’abari mu cya kane cy’Ubudehe bakajya bigurira inzitiramubu ku giti cyabo.

Muri ayo mabwiriza kandi, harimo ko ubwo bucuruzi bw’inzitiramubu n’uturere dusabwa kuzabishoramo imari kugira ngo Farumasi z’uturere n’ibigonderabuzima mu bihe bizaba bitanga inzitiramubu ku baturage bo mu bindi byiciro by’ubudehe nk’uko bisanzwe, abo bo mu byiciro bizazigurira bizabone aho bazihahira.

Abari mu nama ariko binubiye ko inzitiramubu zizagurishwa abo mu kiciro cya gatatu kandi hari abakijujutira ko bagishyizwemo nta mikoro bafite, Dr. Aimable azubiza ati “Si bose bazazigurira, hazarebwa ba bandi bafite imirimo izwi, cyane cyane abafite akazi muri leta n’abandi bishoboye, si buri wese wo muri icyo cyiciro uzigurira inzitiramubu, abo rero bazishyura amafaranga kandi ntazaba akanganye.”

U Rwanda rufite intego ko ingamba zafashwe zo kurwanya malaria zishyizwe mu bikorwa byazagera mu 2020 iyi ndwara yarabaye amateka.

Umuyobozi mukuru wa RBC, Dr Jeanine U. Condo
Dr. Aimable Mbituyumuremyi uyobora Ishami rishinzwe kurwanya malaria muri RBC
Abantu batandukanye bitabiri inama yiga ku kurwanya malaria

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza