Urukingo rwa virusi itera SIDA rugeragerezwa mu Rwanda ruratanga icyizere kirenga 50%

Yanditswe na Evariste Nsengimana
Kuya 18 Mata 2018 saa 02:51
Yasuwe :
0 0

Ikigo cy’Igihugu cy’Ubuzima mu Rwanda (RBC) cyatangaje ko ubushakashatsi gikora ku miti n’indwara, bitanga icyizere ku rwego rushimishije by’umwihariko ko uburi gukorwa ku rukingo rwa virusi itera SIDA rwizewe ku kigero kirenga 50%.

Mu 2005 nibwo Ikigo Projet San Francisco (PSF) gikorera mu Rwanda cyatangiye ubushakashatsi ku rukingo rwa Virusi Itera SIDA, rugeragerezwa ku bantu bari hagati ya 20 na 50 hagamijwe kureba niba nta ngaruka rushobora gutera mu mubiri w’umuntu ndetse ukaba wakora abasirikare banesha virusi itera SIDA.

Mu mpera za 2017, hagaragajwe ko ibimaze kurukorwaho mu cyiciro cya mbere cyo kureba niba nta ngaruka rushobora gutera urufashe cyarangiye neza.

Mu nama yahuje inzego zitandukanye ziganjemo iz’ubuzima kuri uyu wa Gatatu, igamije kureba ubushobozi bw’u Rwanda mu gukora ubushakashatsi ku ndwara n’imiti, Umuyobozi ushinzwe Gahunda yo kurwanya Sida n’Indwara z’Umwijima n’izandurira mu Mibonano mpuzabitsina muri RBC, Dr. Nsanzimana Sabin, yatangaje ko urwo rukingo rumaze gutanga icyizere kirenga kuri 50%.

Yagize ati “Ubushakashatsi ku rukingo rwa Virusi itera Sida bumaze igihe kinini, hari n’aho abantu bageze basa n’abananiwe bavuga bati ‘ko nta rukingo rufatika tubona’. Ngira ngo kugeza ubu urwabashije gutanga umusaruro ufatika ntirwarenze ku kigero cya 40% y’abashobora kurufata rukabagirira akamaro ku buryo abari barufitiye icyizere bacitse intege.”

Yongeye ati “Kuri uyu munsi hari imishinga myinshi kuri uru rukingo iri gukorwa nk’iyagaragarijwe mu nama yo kurwanya Sida yabereye muri Afurika y’Epfo […] Ubundi urukingo rwakabaye rukurinda kugera kuri 90% cyangwa 100% ariko urwagaragaye rwari kuri 40, ariko urwitezwe, rushobora kurenga kuri 50%.”

Dr. Nsanzimana yakomeje avuga ko igeragezwa ritaratanga igisubizo nyacyo kuko rugaragaza ko muri babiri barufata, umwe aba bafite ibyago byo kwandura, gusa ngo ingamba zo guhangana n’iyi ndwara zirakomeje, izi ziganjemo kugeza ku bayirwaye imiti igabanya ubukana kandi ifite imbaraga, kuyirinda n’izindi.

RBC ivuga ko muri rusange kuva mu 2012, imaze gutangiza ubushakashatsi burenga 257, burimo ubwakozwe ku ndwara n’imiti. Urugero ni nk’ubwakozwe ku mpeta yifashishwa mu gusiramura bwatangirijwe mu Rwanda, ubwakorewe ku muti ugabanya ubukana bwa Virusi itera Sida, ubwakorewe ku gakoresho kifashishwa mu kwipima Sida hakoreshejwe amacandwe kanifashishwa ubu ‘OraQuick HIV Self-Test’ n’ibindi.

Imibare ya Minisiteri y’Ubuzima igaragaza ko ubwandu bwa Virusi itera SIDA mu Rwanda buri kuri 3 %, mu gihe abantu bari hagati ya 2000 na 3000 bicwa nayo buri mwaka. Mu Rwanda kandi abarenga ibihumbi 200 barayanduye, hejuru ya 90% byabo bafata imiti igabanya ubukana, mu gihe abandura bashya bagabanutse ku kigero cya 50% naho abapfa bagabanuka kuri 80%.

Urubyiruko rungana na miliyoni 4.3 muri Afurika yo munsi y’Ubutayu bwa Sahara rubana n’ubwandu bwa Virusi itera SIDA.

Umuyobozi ushinzwe Gahunda yo kurwanya Sida n’Indwara z’Umwijima n’izandurira mu Mibonano mpuzabitsina muri RBC, Dr. Nsanzimana Sabin, yatangaje ko urukingo ruri kugeragezwa rutanga icyizere kirenga kuri 50%
Inama yitabiriwe n'abantu b'ingeri zitandukanye yari igamije kureba ubushobozi bw’u Rwanda mu gukora ubushakashatsi ku ndwara n’imiti

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza