Butaro:Havutse umwana utagira umwenge w’ikibuno

Yanditswe na Philbert Hagengimana
Kuya 21 Ukuboza 2016 saa 05:02
Yasuwe :
0 0

Mu bitaro bya Butaro biri mu Karere ka Burera havukiye umwana utagira innyo, wahawe ubutabazi bw’ibanze hakaba hategerejwe ko azabagwa iki kibazo kigakemuka burundu.

Mu kwezi gushize ni bwo uyu mwana yavutse neza nyuma gato ababyaza bahita babona ko nubwo afite ikibuno, ariko adafite ahazajya hasohokera imyanda.

Nizeyimana Pio, Se w’uwo mwana wavukanye icyo kibazo, avuga ko bakibimenya, ibitaro bya Butaro byabandikiye urupapuro rubohereza kuvuriza mu Bitaro bya Kigali CHUK, gusa ngo bahawe ubutabazi bw’ibanze ubundi basabwa gutegereza.

Uwo mwana yahawe ubutabazi bw’ibanze, bamushakira umwanya w’agateganyo imyanda yasohokeramo, aho babaye bapfumuye mu rubavu.

Umuyobozi w’Ibitaro bya Butaro, Dr. Tharcisse Mpunga yatangarije IGIHE ko uwo muryango utagushije ishyano, kuko ikibazo umwana wabo yavukanye hari n’abandi kijya kibaho, dore ko ngo umwana umwe mu bihumbi bitanu (1/5000), ashobora kuvuka atyo nk’uko yavukana ubundi bumuga.

Ati “Ntabwo ari we wenyine bibayeho; ni ibintu bibaho, ni imwe mu busembwabuvukanwa.Umwana umwe mu bihumbi bitanu ashobora kuvukana kiriya kibazo.”

Akomeza avuga ko Urwungano Ngogozi ruba rumeze neza ariko ugasanga nta mwenge rufite aho imyanda isohokera kikaba ari kimwe mu bibazo umwana ashobora kuvukana, ariko ngo abahanga mu byo kubaga indwara nk’izo, barabivura bigakira uretse ko bisaba ubwitonzi n’ubushakashatsi ngo habanze hamenyekane icyabiteye.

Ati “Abakora ‘Churgie General’ barabikora, ariko babikora mu byiciro ari na yo mpamvu uwo mwana ashobora kuba yarahawe igihe cyo kuzongera kugarurwa, ngo bashobore kuba bagira ngo bategereze ko akwiza ibiro ku buryo ashobora guterwa ikinya bakamubaga.”

Yakomeje asobanura ko impamvu kuvura ibibazo nk’ibyo abana baba bavukanye bigora, kubera ko bisaba ubusesenguzi bwimbitse ngo barebe akaremangingo gafite ikibazo, hanarebwe niba kaba ari ko kateye icyo kibazo.

Uretse ko uwo muryango wahuye n’ikibazo kitaba kuri benshi, ikibazo cy’amikoro yaba ayo kugeza uwo mwana mu bitaro bya Kigali CHUK avuye i Butaro, kwishyura serivisi bahabwa ndetse n’impungenge ni zose ku hazaturuka ubwishyu igihe uwo mwana azaba agiye kubagwa.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza