Ubuhamya bwa Umumararungu wandujwe Sida n’uwamuhataga impano akiri umunyeshuri

Yanditswe na Evariste Nsengimana
Kuya 4 Ukuboza 2017 saa 02:00
Yasuwe :
0 0

Umumararungu Judith uri mu kigero cy’imyaka 24 na 26 ukomoka mu Karere ka Nyarugenge, ahagarara ku karubanda akerura uko yashutswe yiga mu mashuri yisumbuye, akanduzwa virusi itera Sida akiri muto.

Uyu mukobwa wasangije ubuhamya bwe urubyiruko n’abandi bari bitabiriye umunsi mpuzamahanga wo kurwanya Sida, yavuze ko kubera ubukene umuryango we wari ufite, yahuye n’umusore akajya amufasha kubona udukoresho, bituma bakorana imibonano idakingiye.

Yagize ati “Ngeze mu cyiciro rusange cy’amashuri yisumbuye kuko iwacu bari bafite ubushobozi buke, natangiye kugira ibibazo by’ubuzima ndangije nkundana n’umusore akajya amfasha mu buzima busanzwe; akamfasha mu bikoresho bimwe ba bimwe umukobwa akenera. Nyuma twaje gukora imibonano mpuzabitsina idakingiye twese nta n’umwe wari uzi undi uko ahagaze, nta n’ubwo twigeze tubitekereza ngo tubyiteho.”

Uyu mukobwa ubona ko afite ubuzima bwiza, avuga ko yakomeje kwiga, ageze mu mwaka wa gatanu ari nawo yakoreyemo imibonano idakingiye, yatangiye kurwaragurika, akagira ibisebe ku mubiri, bituma uwo musore amwanga, ubuzima butangira kumugora binamuviramo guhagarika amasomo, ajya mu rugo.

Ati “Nageze mu rugo nkajya mpora ndwaye, uruhu rwanjye rwarabaye nabi ari nako nkomeza kuzana ibisebe ku mubiri, mfata umwanzuro wo kuva mu rugo njya kuba mu miryango.”

Umumararungu avuga ko yabaye mu miryango itandukanye ariko kubera ubuzima butari bumworoheye ahitamo kujya kwaka akazi muri restaurant i Nyamirambo ariko uburwayi bukomeza kumumerera nabi atazi ubwo aribwo.

Umusore wakundaga kurira muri iyo orestaurant akajya amwitegereza amubaza icyo arwaye, undi akamubwira ko ntacyo.

Uwo musore yakomeje kujya amwitegereza, amugira inama yo kwipimisha akamenya uko ahagaze ariko ntiyabiha agaciro, gusa kubera guhora abimubwira yaje kumwemerera bajyanayo, bamupimye basanga afite ubwandu bw’agakoko gatera Sida.

Umumararungu akimenya uko ahagaze, yarihebye akajya ahora yikingiranye mu nzu, arira aziko ubuzima bwe burangiye.

Ati “Numvaga ko ubuzima bwanjye burangiye, ko nta cyumweru kiri bushire ntapfuye kuva ndwaye Sida. Ndifungirana ngerageza no kwiyahura biranga.”

Wa musore wamugiriye inama yo kujya kwipimisha, kubera ko yahoraga aza kumureba no kumuhumuriza, byaje gutuma Umumararungu ahitamo kwimukira mu kandi gace ariko hashize igihe bongera guhura amugira inama yo kutiheba amusaba gutangira gufata imiti igabanya ubukana.

Umumararungu ati “Naramwemereye turagenda, ntangira imiti nk’abandi, ubu ndayinywa, murabona ko ndi umukobwa mwiza, tunahuriye mu nzira ntiwapfa kundeba ngo umenye ko mfite virusi itera Sida.”

Yavuze ko afite icyizere cyo gukomeza akarangiza amashuri, anagira inama urubyiruko kwirinda.

Yagzie ati “Kubera mfata neza imiti igabanya ubukana, sinasoza ntagiriye inama urubyiruko rwaba rutaragira n’urwagize ibyago byo kwandura virusi itera Sida. Urutaragira ikibazo, narugira inama yo gukomeza kwifata, uwo binaniye agakoresha agakingirizo. Uwagize ibyago byo kwandura, namugira iyo gukomeza imiti no kuyinywa neza kandi akirinda kwanduza abandi.”

Ibarura rya Minisiteri y’Ubuzima ryo mu 2015, ryagaragaje ko mu Banyarwanda batitabira kwipimisha virusi itera Sida, urubyiruko ruza ku isonga. Umubare w’ab’igitsina gabo bari bataripimisha kuva babaho bari 24%, ab’igitsina gore ari 16%. Muri abo, urubyiruko ruri hagati y’imyaka 15 na 24 rwihariye ijanisha rya 67,2% naho 13% by’abanduye Sida ntibari babizi.

Kugeza ubu ubwandu bushya buhagaze kuri 3% mu myaka 10 ishize ku bantu bari mu kigero cy’imyaka 15 na 49; bwagabanutse ku kigero cya 50% ku babyeyi banduzaga abana bari munsi y’amezi 18. Abanduye Sida bafata imiti igabanya ubukana bageraga kuri 86% mu 2015.

Insanganyamatsiko u Rwanda rwahisemo uyu mwaka ishishikariza abantu kwipimisha ubwandu bwa Virus itera Sida no gufata neza imiti igabanya ubukana ku wanduye aho igira iti “Twipimishe Sida, k’uyifite, gutangira no kuguma ku miti ni ubuzima burambye.”

Umumararungu Judith atanga ubuhamya bw'uko yanduye SIDA akiri umunyeshuri mu mashuri yisumbuye

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza