U Rwanda rwasabwe kugabanya icyuho kikigaragara mu gusuzuma no kuvura abana igituntu

Yanditswe na Evariste Nsengimana
Kuya 23 Werurwe 2019 saa 12:42
Yasuwe :
0 0

Ishami ry’Umuryango w’Abibumbye ryita ku buzima (OMS), ryasabye u Rwanda kugabanya icyuho kikigaragara mu gusuzuma no kuvura abana indwara y’igituntu no kongera ingengo y’imari ishyirwa mu guhangana na yo.

Umuyobozi ushinzwe gahunda yo kurwanya Sida, indwara zandurira mu mibonano mpuzabitsina, Hepatite n’igituntu muri OMS ishami ry’u Rwanda, Mugabo Jules, niwe watanze ubu butumwa, ubwo hizihizwaga umunsi mpuzamahanga wo kurwanya igituntu.

Uyu munsi uyu mwaka wahawe insanganyamatsiko igira iti ‘Igihe kirageze isuzumishe igituntu, kiravurwa kigakira’ wizihirijwe mu Murenge wa Rukoma mu Karere ka Kamonyi ku wa 22 Werurwe.

Mugabo yashimye muri rusange intambwe u Rwanda rwateye mu guhangana n’indwara y’igituntu, aho nibura ku bigo nderabuzima n’ibitaro bishobora kugisuzuma, kukivura no gutanga imiti yacyo.

Ati “Ndashaka gushimira u Rwanda kubera imiyoborere myiza n’uruhare rugira mu gukumira igituntu, bikaba bigaragara mu ngamba rufite ku rwego rw’igihugu no ku rwego rw’Akarere, kugera ku mudugudu.”

Hari urwego rw’abajyanama b’ubuzima rukurikirana buri munsi abaturage, ugaragaje ibimenyetso rukamushishikariza kwisuzumisha, rugakurikirana ukirwaye kugeza akize, guhugura abaganga, kwegereza serivisi z’ubuvuzi abaturage no kubaha imiti yacyo ku buntu n’ibindi.

Ati “Ku bijyanye n’abana haracyakenewe imbaraga nyinshi zo gusuzuma no kuvura abana bagaragaweho igituntu. Turasaba u Rwanda kongera ingengo y’imari yagenewe kurwanya indwara y’igituntu kugira ngo ibashe kuranduka burundu muri iki gihugu.”

Umuyobozi w’ishami rishinzwe kurwanya igituntu n’indwara zandurira mu myanya y’ubuhumekero mu kigo cy’Igihugu gishinzwe Ubuzima(RBC), Dr. Migambi Patrick, yavuze ko ku bana bakekwaho kurwara igituntu mu Rwanda, abari hagati ya 40-42% aribo bagisanganwa.

Ati “Bivuze ko hari umubare runaka tutabona. Igituntu ku bana bari munsi y’imyaka itanu gishobora kwigaragaza mu bimenyetso bitandukanye. Si ya nkorora nk’umuntu mukuru.”

Yavuze ko ari kimwe no mu bindi bihugu, u Rwanda rukigorwa no gusuzuma no kuvura igituntu mu bana kubera ibimenyetso byacyo bigoye kubibona ku bana.

Ibimenyetso umuntu ashobora kubona ku mwana akihutira kumusuzumisha igituntu harimo kutiyongera ibiro, guhorana umuriro yahabwa imiti ya malaria ntakire n’ibindi.

Ati “Icyo kibazo kirahari, turimo kubyiga tureba uburyo twabikora. Niyo mpamvu mu gushaka igituntu mu bana ntabwo twibanda mu gushaka agakoko kacyo mu gikororwa, dufata ibintu byinshi birimo kureba niba yarigeze abana n’ukirwaye.”

Dr. Migambi aheruka kubwira IGIHE ko muri rusange, buri mwaka Leta y’u Rwanda ikoresha miliyoni 8$(hafi miliyari 7,5Frw) muri gahunda zo kurwanya igituntu zirimo imishahara y’abakozi, amahugurwa, kugura ibipimo, kwita ku bikoresho, gukurikirana abarwayi n’ibindi.

Gupima igituntu, bitwara amafaranga agera ku 9000Frw hakoreshejwe uburyo bushya bwitwa ‘Genexpert’ ariko hatabariwemo igihembo cy’umuganga, umwanya bitwara, ibikoresho byifashishwa n’ibindi.

Umuntu umwe ufata imiti y’igituntu gisanzwe, afata imiti igihe cy’amazi atandatu. Nibura buri kwezi akenera ifite agaciro k’ibihumbi 22Frw.

Umurwayi w’icy’igituntu cy’igikatu kimusaba gufata imiti igihe cy’amezi hagati y’icyenda na 22. Nibura buri kwezi hakoreshwa amadolari 1500, ku uyifata amezi atarenga icyenda, yarenga hagakoreshwa nibura amadolari 4400.

Mu 2018 OMS yagaragaje ko abanyarwanda 57 ku bihumbi 100, (hafi 6900) bari barwaye igituntu mu gihe umwaka wawubanjirije bari 64 ku bihumbi 100 (7 680).

Mu myaka itanu ishize, abakirwaye bagabanutseho nibura 8% buri mwaka. Icyo gihe abanyarwanda bishwe n’igituntu bari 4,9 ku bihumbi 100 (hafi 580) mu gihe umwaka wawubanjirije bari 6,2 ku bihumbi 100 (hafi 740).

OMS yatangaje ko muri 2017 abantu basaga miliyoni 10 bari barwaye igituntu harimo abagabo miliyoni 5,8 abagore miliyoni 3,2 n’abana miliyoni imwe. Gusa 64% nibo cyagaragayeho. Bivuze ko 36% kitababagaragayeho. Icyo gihe miliyoni 1,3 cyarabishe.

Umuyobozi wa RBC, Dr. Jeanine Condo ari gushyikiriza abajyanama b'ubuzima amagare kubera uruhare bagira mu guhashya igituntu

Amafoto: Rugema Ande/RBC


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza