U Rwanda rwahawe imashini zizagabanya abarwayi b’impyiko bajyaga kuvuzwa mu mahanga

Yanditswe na Herve Ugirumukunda
Kuya 21 Ukwakira 2017 saa 04:20
Yasuwe :
1 0

Misiri yahaye Ibitaro bya Gisirikare bya Kanombe imashini icumi zizatuma abarwayi b’impyiko batarengerana ngo barembe bibe ngombwa ko bajyanwa mu mahanga.

Ni imashini ziyungurura amaraso (hemodialysis), zikavanamo imyanda, impyiko irwaye ikoroha bidasabye ko isimbuzwa indi nzima.

Ubwo yatahaga ishami ry’Ibitaro bya Kanombe izo mashini zizakoreramo, kuri uyu wa 21 Ukwakira 2017, Minisitiri w’Ubuzima, Dr. Diane Gashumba, yashimiye Misiri avuga ko izo mashini zizagabanya amafaranga u Rwanda rwatangaga rujya kuvuza abarwaye impyiko mu mahanga.

Yagize ati “Izi mashini icumi Misiri yahaye ibitaro bya Kanombe ziraza kudufasha cyane kuvura abarwayi b’impyiko kugira ngo batagera kuri rwa rwego barembye cyane kuko byo biragoye kubivura. Zikaba zigiye kutwunganira, zigiye kandi no kudufasha kugabanya umubare w’abarwayi twajyaga twohereza hanze biduhenda nabo ubwabo bibavuna gukora urugendo.”

Minisitiri Gashumba yakomeje asobanura ko ubusanzwe buri mwaka u Rwanda rwatangaga amafaranga menshi ku barwayi bajyanwa mu mahanga ariko nyuma y’izi mashini yizeye ko agabanuka akagera mu cya kabiri cy’ayatangwaga.

Yagize ati”Buri mwaka dutanga amafaranga menshi agera kuri miliyoni magana atanu kugira ngo Abanyarwanda bajye kwivuza hanze, ariko haba harimo n’abivuza kanseri n’umutima. Ariko abarenga kimwe cya kabiri muri bo baba bivuza impyiko, ni ukuvuga ngo iki gikorwa kigiye kugabanya ingengo y’imari n’imvune yagendaga ku bagiye kwivuza hanze.”

Minisitiri w’Ubuzima yongeyeho ko hari ibitaro byari bisanzwe bifite izo mashini ariko ari nke, ku buryo zitari zihagije ugereranyije n’umubare munini w’abarwayi b’impyiko bari mu gihugu.

Ati”Hari ahandi hari hari ziriya mashini mu Bitaro bya Kaminuza bya Kigali, ibya Butare, ndetse no mu bitaro bya Rubavu twazishyizemo mu bufatanye bw’abikorera ku giti cyabo, no mu bitaro bya Gihundwe ariko ntizari zihagije.”

Ambasaderi wa Misiri mu Rwanda, Namira Negm, yavuze ko igihugu cye kimaze igihe gifasha u Rwanda mu rwego rw’ubuzima kandi ko yishimiye cyane ko ishami rivura impyiko ry’Ibitaro bya Kanombe rizakiza Abanyarwanda benshi batageze ku rwego rwo kuremba.

Ati “Twishimiye ko twafunguye iri shami rihuriweho n’ibihugu byombi. Tuzakomeza kwakira abaganga baza kwihugura mu Misiri tunafasha Ibitaro bya Kanombe kubona ibyo bikeneye ngo byite ku buzima bw’Abanyarwanda.”

Umuyobozi w’Ibitaro bya Kanombe, Col. Dr. Jean Paul Bitega, yavuze ko buri cyumweru bakiraga abantu 15 barwaye impyiko, bikabagora kubavura kuko bari benshi ugereranyije n’imashini zari zihari.

Kuri ubu yizeye ko ibi bitaro bigiye kwakira umubare munini w’abarwayi bakavurwa neza mu mutuzo kubera ishami ribavura ryaguwe rikongerwamo n’imashini zigezweho.

Ambasaderi wa Misiri mu Rwanda, Namira Negm na Minisitiri w'Ubuzima , Dr Diane Gashuma, bafunguye ku mugaragaro ishami rizajya rivurirwamo impyiko mu bitaro bya Kanombe
Minisitiri w’Ubuzima, Dr. Diane Gashumba, yashimiye Misiri yeretswe icyumba izo mashini zizajya zikoresherezwamo
Misiri yahaye u Rwanda imashini zizajya ziyungurura amaraso y'abarwaye impyiko
Umuyobozi w’Ibitaro bya Kanombe, Col. Dr. Jean Paul Bitega
Ambasaderi wa Misiri mu Rwanda, Namira Negm avugana n'itangazamakuru nyuma yo gutaha ishami ry'ibitaro rizajya ryita ku barwayi b'impyiko

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza