U Rwanda ruhagaze rute mu Karere mu kugerwaho n’ingaruka z’indwara ya Malaria?

Yanditswe na Evariste Nsengimana
Kuya 24 Mata 2019 saa 08:23
Yasuwe :
0 0

Malaria ni indwara iterwa n’agakoko kitwa ‘plasmodium falciparum’ gakwirakwizwa n’umubu w’ingore wa Anopheles ukunda kurumana cyane cyane mu masaha y’ijoro. Uyu mubu wororokera cyane ahantu hari ibishanga, ibidengenzi by’amazi, ibihuru n’ibindi bishobora kuwufasha kwihisha.

Raporo nshya y’Ishami ry’Umuryango w’Abibumbye ryita ku Buzima (OMS) igaragaza ko mu 2016 mu bantu barenga miliyoni 216 barwaye malaria ku Isi, abarenga ibihumbi 445 yabahitanye.

Iyo raporo igaragaza ko 90% by’abarwaye Malaria na 91% by’abo yishe mu 2016 ari abo ku mugabane wa Afurika. Si ibyo gusa kuko muri uwo mwaka malaria yashegeshe ubukungu bwa Afurika ku kigero cya 1.3%.

U Rwanda ruhagaze rute mu Karere ?

Imibare igaragaza ko mu bihugu bikikije u Rwanda, Repubulika Iharanira Demokarasi ya Congo (RDC) ariyo ifite umubare munini w’abishwe na malaria mu 2016, ikurikirwa n’u Burundi, Uganda, Tanzania, u Rwanda na Kenya.

Raporo ya OMS igaragaza ko ibihugu bigize Umuryango wa Afurika y’Iburasirazuba[EAC] n’Akarere k’ibiyaga bigari byikubiye 80% by’abagaragaweho na malaria mu 2016 na 80% by’abo yishe muri ako gace.

Iyo raporo igaragaza ko RDC yikubiye 59% naho u Burundi bukagira 26% by’abantu basaga miliyoni 31.7 barwaye malariya muri Afurika yo hagati.

Rwanda

Malaria yikubye hafi inshuro enye hagati ya 2012 na 2017. Abarwaye iyoroheje bavuye kuri miliyoni imwe mu 2012 bagera kuri miliyoni 4.5 mu 2016 mu gihe abarwaye iy’igikatu bavuye 9 000 bagera ku bihumbi 17.

Minisiteri y’Ubuzima igaragaza ko abarwaye malaria y’igikatu bavuye ku bihumbi 17 mu 2016 bakagera ku bihumbi birindwi mu 2018 naho abo yishe bavuye kuri 700 mu 2016 bagera kuri 300 mu 2018.

Kugabanyuka kw’abo iyo ndwara ihitana kwavuye ku muhate wa Leta y’u Rwanda wo gushyiraho ingamba zihamye zo kuyikumira zirimo gutanga inzitiramibu, gutera imiti yica imibu itera malaria mu nzu, gutera imiti yica imibu n’amagi yayo, guha ubushobozi abajyanama b’ubuzima bwo gusuzuma no kuvura malaria n’ibindi.

U Burundi

Imibare yakusanyijwe n’ibigo nderabuzima mu 2015 igaragaza ko mu bantu bose bisuzumishije abangana na 25% bayibasanzemo.

Hagati ya 2015 na 2017 malaria yagaragaye ku baturage barenga miliyoni 19.7 mu Burundi, abasaga 9000 irabica.

Abana barwaye malaria bavuye kuri 17% mu 2010 bagera kuri 27% mu 2016/17. Mu bantu 8 793 175 bayirwaye mu 2016 nibura 5 853 yarabishe.

DRC

Mu 2016 Repubulika iharanira Demokarasi ya Congo yihariye 10% by’abagaragaweho malaria na 14% by’abo yishe ku Isi, ikaba iya kabiri nyuma ya Nigeria.

Muri rusange mu bantu 16 821 130 barwaye malaria muri DRC, abagera ku bihumbi 34 yarabishe.

Kenya

Nibura 70% muri miliyoni zisaga 48 batuye Kenya baba mu bice bifite ibyago byo kwandura malaria. Mu 2016, icyo gihugu cyari cyihariye 3% by’umubare w’abishwe na malariya ku Isi. Mu bantu 2 931 406 barwaye malaria, 603 yarabishe.

Uganda

Mu 2017 Uganda yari ku mwanya wa cyenda mu bihugu 15 bya mbere bibangamiwe na malaria ku Isi. Abayirwaye basaga miliyoni icyenda, abo yahitanye bangana na 5 111.

Tanzania

Muri iki gihugu malaria yasanganywe 26% by’abarwayi bajya kwivuza. Mu barwayi basaga miliyoni eshanu bayisanganywe mu 2016, yishemo 5 045.

Bimwe mu bimenyetso umuntu urwaye malaria agaragaza harimo kubabara umutwe, kubabara mu ngingo, guhinda umuriro, kugira iseseme n’ibindi.

Kwirinda iyo ndwara birashoboka cyane binyuze mu gutema ibihuru bikikije inzu, gusiba ibidendezi by’amazi, kurara mu nzitiramubu no kwihutira kwivuza igihe umuntu agaragaje ibimenyetso.

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza