Sida iraca ibintu, icyizere gihanzwe amaso isuzumwa ry’urukingo rwayo

Yanditswe na Rabbi Malo Umucunguzi
Kuya 5 Ukuboza 2016 saa 01:41
Yasuwe :
0 0

Icyorezo cya Sida gikomeje kuza mu bihitana abantu benshi ku Isi, aho ishami ry’Umuryango w’Abibumbye ryita ku Buzima rigaragaza ko kugera mu mpera za 2015, miliyoni 36.7 zabanaga na Virusi itera Sida, VIH.

Iyi mibare itera inkeke kuko nko mu 2015 gusa ubwandu bushya bwageze kuri miliyoni 2.1, naho miliyoni 1.1 bo irabahitana.

Virusi itera iyi ndwara itaragira umuti n’urukiko, kuva yatangira kuvugwa imaze kwandurwa n’abantu miliyoni 78, ndetse kugeza mu 2015, abagera kuri miliyoni 35 bari bamaze gusezera ku Isi bitewe n’indwara zibasiye imibiri yashegeshwe na VIH.

Muri Nyakanga uyu mwaka, nibwo byatangajwe ko urukingo rwa VIH rugiye gutangira gusuzumirwa muri Afurika y’Epfo, igihugu gifite abasaga miliyoni eshatu bafata imiti igabanya ubukana bwa Virusi itera Sida, ari nacyo gihugu gifite benshi ku Isi.

CNN ivuga ko mu kwezi gushize batangiye gukusanya abakorerabushake basaga 5000 batanduye VIH ngo bafashe mu bushakashatsi. Ni icyiciro cya gatatu cy’ubushakahatsi ku rukingo rwa Sida, HVTN 702, gikurikira ubwakozwe muri Thailand mu 2009, bwerekanye ubushobozi bwo gukingira iyo virusi kuri 31%.

Mu mpinduka zakozwe, abashakashatsi bavuga ko hari icyizere ko rushobora gukingira hagati ya 50% na 60%.

Noro Tshongoyi, umwe mu bari gushaka abakorerabushake, avuga ko atari ibintu biri kwitabirwa cyane ariko ari amahirwe ku bashaka gufasha impuguke gukora amateka.

Linda-Gail Bekker uyobora ikigo cy’ubushakashatsi cyashinzwe na Musenyeri Desmond Tutu, Emavundleni Research Centre, avuga ko cyagiye kigira uruhare mu bushakashatsi kuri Sida, ariko bwari butaragera ku cyiciro nk’icya HVTN 702.

Ati "Niba dukeneye guhashya iki cyorezo mu buryo bufatika, tugomba guhagarika umubare w’ubwandu bushya, kandi nta buryo byakorwamo, nta bundi buryo burambye uretse kugira urukingo rushobora kuyikingira.’’

Umuyobozi w’Ikigo Gishinzwe Indwara zandura muri Leta Zunze Ubumwe za Amerika, Anthony Fauci, avuga ko hari abumva ko Sida yarangiye ku Isi kandi atari ko bimeze, ahubwo imibare y’abayandura yakomeje kuba imwe mu myaka 15 ishize.

Ati “Ikibazo ni uko abantu nta yandi mahitamo iyo bagiye gukora imibonano mpuzabitsina, barashaka kwirinda ariko ntibakozwa agakingirizo. Niba umugabo bagiye kuyikorana adashaka kugakoresha, ubwo ni ibyo.’’

Uburyo bwo kwirinda SIDA bukoreshwa ni ukwifata cyangwa gukoresha agakingirizo, ariko hari benshi bakomeza kwandura, ndetse abenshi babana na VIH ariko ntibabizi.

Impungenge ni zose kuko muri 36.7 zirenga z’ababana na VIH, kugeza muri Kamena 2016, miliyoni 18.2 bonyine nibo bafataga imiti igabanya ubukana. Ibyo bigira ingaruka ko ku batuye Isi, kuko nibura buri minota ibiri, umwangavu umwe cyangwa ingimbi aba yanduye Virusi itera Sida.

Inkuru wasoma: Urukingo rwa virusi itera SIDA rushobora kuboneka mbere y’uko uyu mwaka urangira


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza