Shira amatsiko ku bifatwa kwinshi kuri Virus itera Sida-Ikiganiro na Dr. Nsanzimana

Yanditswe na Evariste Nsengimana
Kuya 5 Nyakanga 2019 saa 09:57
Yasuwe :
0 0

Benshi bamaze gusobanurikirwa ko akenshi Virus itera Sida yandurira mu mibonano mpuzabitsina idakingiye, igihe umubyeyi uyifite yonsa umwana cyangwa amubyara, mu guterwa amaraso, gutizanya ibikoresho bikomeretsa hagati y’uyifite n’utayifite n’ahandi hatuma amaraso yabo ahura.

Gusa hari ibindi bikunze kwibazwa n’abatari bacye cyangwa ugasanga babifiteho ubumenyi butandukanye, bumwe butandukanye n’ukuri cyangwa bushyira abandi mu rujijo.

Twavugamo nk’itandukaniro ryo kugira virus itera Sida no kuyirwara, imiti ihabwa ufite virus itera Sida, igihe umuntu amenya ko afite virus itera Sida cyangwa ayirwaye, ibimenyetso by’ibanze agira, igihe uyirwaye ashobora gupfira adafashe imiti n’ibindi.

IGIHE yagiranye ikiganiro n’umuyobozi w’ishami rishinzwe kurwanya Sida, umwijima n’indwara zandurira mu mibonano mpuzabitsina mu kigo cy’igihugu cy’ubuzima[RBC], Dr. Nsanzimana Sabin, asobanura byinshi kuri Virus itera Sida.

IGIHE: kugira Virus itera Sida no kurwara Sida bitandukaniye he?

Dr. Nsanzimana: Ni ikibazo abantu benshi bakunda kwibazaho ndetse bakanabyitiranya. Iriya virus ukuntu iteye, uhuye nayo uyu munsi bitwara hagati y’imyaka 10 na 15 kugira ngo ibe yakwica cyangwa ugere ku cyiciro twita ko uyirwaye, mbere yaho uba ubana na Virus ya VIH/Sida.

Kubera ubushobozi ifite yangiza uburinzi[Abasirikare] bw’umubiri bikazagera igihe uba utagishoboye kwirinda no kwirwanaho, bikavamo uburwayi. Mbere y’uko abasirikare bashira nibwo tuvuga ngo ‘Umuntu abana na Virus itera sida’.

Iyo umubiri wamaze gucika intege kubera virus yabaye nyinshi niba nta miti wafashe, hakurikiraho imyaka itatu kugera kuri itanu, aho umuntu yitwa ko afite virus ariko yamuteye uburwayi.

Sida rero ubwayo ntabwo ari indwara, ni uruhurirane rw’indwara zose zishobora kuza kubera umubiri utagifite ubushobozi bwo kwirinda.

IGIHE: Umuntu ashobora kumara igihe kingana gute atarapfa mu gihe adafashe imiti?

Dr. Nsanzimana: Icyo gihe abantu bashobora kurama badahawe imiti bari muri icyo cyiciro cy’uburwayi ntibarenza nk’imyaka itanu, nyuma yaho ni urupfu.

IGIHE: Afashe imiti yamara ikingana gute?

Dr: Nsanzimana: Ufite Virus Sida iyo afata imiti neza, araramba nk’undi muntu utayifite.

IGIHE: Mwavuze ko iyo abasirikare bashize umubiri utagifite ubwirinzi aribwo atangira kurwara Sida, umuntu agira abasirikare bangana gute?

Dr. Nsanzimana: Hari abagira abasirikare benshi n’abagira bake ariko muri rusange umuntu uhagaze nk’uko kwawe aba afite abasirikare hafi 1000. Umubare w’ifatizo usanga abantu bahuriraho ni hagati ya 800-1000, hari n’abashobora kugira 1500.

IGIHE: Umuntu ashobora kumenya ko yanduye Virus itera Sida atagiye kwa muganga?

Dr. Nsanzimana: Iyo ucyandura Virus itera Sida abantu benshi ntibabimenya ariko hari utumenyetso duto ushobora kubona, abantu benshi bakatwitiranya n’ibicurane.

Hari nk’umuriro ushobora kuzamuka ukagera kuri 38 °C, bidakabije ukaba wakumva amazuru afunganye, usa nk’urwaye umutwe. Iyo[Virus itera Sida] yinjiye haba turiya tumenyetso, tukamara nk’iminsi itanu tukigendera, ubundi ukabaho utazi ibiri kuba mu mubiri wawe.

Nk’umuntu wari ufite urwungano ngogozi rufite ibibazo ugasanga aragira Diarrhea[Guhitwa] zidasanzwe, icyo gihe iyo ufite Virus itera Sida biriyongera.

Hari abatangira kugira ibibazo ku ruhu ukabona ku mubiri we hari ibintu bihinduka cyane, ugasanga nk’ahantu horoshye nko ku minwa n’ahandi hasa nkaho uruhu rutangiye kuvaho ku buryo bworoshye.

Icyo kimenyetso hari abajyaga bagiheraho, ugasanga bavuga ngo ‘Umuntu ufite iminwa itukura, isa gutya agomba kuba afite virus itera Sida ariko ntabwo aricyo bisobanuye. Ibimenyetso nyakuri biza igihe cy’uburwayi.

IGIHE: Ibimenyetso abenshi bahuriraho ni ibihe?

Dr. Nsanzimana: Ikimenyetso abantu benshi bakunze guhuriraho bamaze igihe baranduye virus itera Sida ni uguhitwa bidasanzwe kandi ntibishire. Hari abakunda kugira iseseme ihoraho, ugasanga ntagishaka ibyo kurya, yatangiye kunanuka buhoro buhoro.

Mu cyiciro cya kabiri hatangira kuzamo indwara ushobora kuvuga ngo hari virus yinjiye mu mubiri igutera uburwayi, ikujyana ku cyiciro cya gatatu nibwo hazamo indwara z’igituntu.

IGIHE: Ni inde wemeza ko umuntu afite Virus itera sida?

Dr. Nsanzimana: Ni umuganga amaze gukora igipimo cyabugenewe. Icyo gipimo cyatangiye kubaho mu 1987. Urumva Virus itera Sida yahagaragaye mu 1981.

IGIHE: Muri iyo myaka hafi itandatu yapimwaga gute?

Dr. Nsanzimana: Mu bigaragara abantu bapimishaga ijisho niba ariko nabyita kuko abantu babaye nk’abatunguwe.

Virus nya SIDA rero kuko itwara igihe kirekire, umuntu wa mbere bamubonye yaraheze mu bitaro muri Los Angeles n’aha muri CHUK[mu Rwanda] muri 1983.

Icyo gipimo cyagiye kivugururwa, cyatangiye gukoreshwa muri 1987 ariko nk’aha mu Rwanda cyahageze mu 1995.

IGIHE: Ni gute iyo Virus itera Sida ipimwa?

Dr. Nsanzimana: Icyo gipimo cyagiye kivugururwa, uyu munsi kigeze aho umuntu ashobora kwipima ariko mbere abantu batangaga amaraso bagategereza igihe bayapima, bakagaruka gufata ibisubizo, bigera ho umuntu apimwa akirirwayo akagitahana, bigera aho akibona mu minota 20. Uyu munsi ushobora kwipima no mu kanwa.

Igipimo dukoresha uyu munsi cyo mu kanwa ni intambwe ya mbere ariko ntikivuga ngo ufite virus itera Sida, ni intambwe yo kujya kwisuzimisha kuko iyo umaze kugikora hatangira ibindi byisumbuyeho bikorerwa kwa muganga nabyo tugakora bibiri bikurikirana.

Icya mbere kivuga ngo reka ndebe niba hari amahirwe menshi ashoboka ko iyi virus yaba ihari, tugakora ikindi cya kabiri kivuga ngo reka noneho ndebe amahirwe ashoboka ko ishobora kuba idahari, kugira ngo tutaza guha umuntu igisubizo kitari cyo.

IGIHE: Bibaho ko umuntu ahabwa igisubizo kitari cyo?

Dr Nsanzimana: Ubundi igisubizo wahawe nticyagakwiye guhinduka kuko haba hakozwe izo nzira zose navuze. Gusa hari ibintu bitandukanye bishobora gutuma igipimo cyakozwe kitaguha igisubizo gikwiriye 100%.

Umuyobozi w’ishami rishinzwe kurwanya Sida, umwijima n’indwara zandurira mu mibonano mpuzabitsina mu kigo cy’igihugu cy’ubuzima[RBC], Dr. Nsanzimana Sabin, yasobanuye byinshi kuri Virus itera Sida.

IGIHE: Ni ibiki bishobora gutuma igisubizo kitaba cyo 100%?

Dr. Nsanzimana: Impamvu ya mbere izwi ku Isi hose inarenze ubushobozi bwa muntu ni uko ibi bipimo dukora nta na kimwe kizewe 100%, icyiza dushakisha twazengurutse Isi yose cyizewe usanga ari hagati ya 95% na 98%.

Iya kabiri, bitewe wenda n’uburyo icyo gipimo cyakozwemo, hari ubushobozi bwa muntu, hari uburangare, bubaho nabwo ntidukwiye kubwibagirwa, hari n’uburyo igipimo cyabitswe.

IGIHE: Bitwara igihe kingana gute ngo Virus itera Sida igaragare mu maraso uhereye igihe yayagereyemo?

Dr Nsanzimana: Ubundi biterwa n’igipimo tugiye gupimisha kuko hari nyinshi. Ikizwi cyane ari nacyo gikoreshwa henshi, ni ikireba abasirikare b’umubiri. Igifite ubushobozi buhambaye kizayibona hashize nk’ibyumweru bibiri nyuma yo kwandura, ubundi igihe fatizo ni amezi atatu.

Hari n’ikindi kisumbuyeho kinahenda cyane kuko hano mu gihugu tuyikoresha muri Labolatwari nkuru y’igihugu, gikorwa ku bintu byihariye. Gishobora kuyibona igihe cyose yinjiriye mu mubiri.

IGIHE: Ni ubuhe bufasha ugaragaje ibyago byo kugira virus itera Sida ahabwa?

Dr. Nsanzimana: Ubundi iyo wapimwe virus itera Sida, mbere y’uko utangizwa imiti [Igabanya ubukana] hari inzira unyuramo. Icyo gihe uhabwa inama z’uko witwara ariko ushobora no guhabwa ikinini dutanga kitwa Bactrim. Icyo n’ubundi tukivuza inkorora n’ubundi burwayi busanzwe ariko cyabaga kigamije kurinda abantu ibyuririzi. Nabyita nk’agakingirizo kugira ngo utazagira ibyo uhura nabyo mbere y’uko utangira imiti igabanya ubukana.

IGIHE: Bactrim itandukaniye he n’imiti igabanya ubukana izwi nka ARVs?

Dr Nsanzimana: Abantu bakunda kubyitiranya ariko ni ibintu bibiri bitandukanye kuko Bactrim ushobora no kuzihagarika igihe icyo aricyo cyose, ubu ntitukinavuga ngo bibe ngombwa ko umuntu wese azifata ariko igabanya ubukana[ARVs] ntabwo ushobora kuvuga ngo uyihagarike n’umunsi umwe kuko virus zihita zongera zigakura zikaba miliyari 10 nk’izo umuntu udafata imiti.

IGIHE: Imiti igabanya ubukana yo ikora ite?

Dr. Nsanzimana: Nko mu Rwanda dufite imiti igabanya ubukana irenga 20 nayo iri mu miryango itandukanye.

Iri mu muryango wa mbere n’uwa kabiri niyo dukoresha tuvura abantu bacyandura virus itera Sida. Hari n’iyo mu muryango wa gatutu, dukoresha tuvura abananiwe no kuvurwa n’iyo mu ya mbere n’iya kabiri ariko uko bizamuka ni nako igiciro n’umubare w’ibinini ufata byiyongera.

Umuntu ucyandura afata ikinini kimwe ariko iyo abifashe nabi, ashyirwa kuri bibiri cyangwa bitatu, akazagera aho ashobora no gufata n’ibigera mu 10.

Ku cyiciro cya gatatu, imiti dufite yose tuba twaragerageje bikanga twarasigaranye ya yindi tuvuga ngo ni imbaraga za nyuma.

IGIHE: Mu Rwanda hari abantu bageze kuri icyo cyiciro?

Dr. Nsanzimana: Dufite abantu barenga 90% bari mu miti ya mbere y’ibanze, abandi hafi 8% bari mu miti ya kabiri ariko dufite n’abantu barenga 100 barenze kuvurwa n’imiti yose dufite, bageze ku ikomeye cyane ari nacyo cyiciro cya nyuma. Bari kwiyongera ku buryo ari n’ikibazo dufite kidukomereye twibaza ngo nibananirwa n’iya nyuma dufite turabakorera iki?

IGIHE: Iyo miti nayo bayifatira ubuntu?

Dr Nsanzimana: Yego, bayifata ku buntu. Iy’umwe igura 3000$ ku mwaka mu gihe wa wundi wo mu cyiciro cya mbere ari munsi 100$.

IGIHE: Abanyarwanda babana na Virus itera sida bangana gute?

Dr. Nsanzimana: Abanyarwanda babana na Virus itera sida ni 3%. Hari abiyongeramo bashyashya basaga ibihumbi 10 ku mwaka.

IGIHE: Abafata imiti igabanya ubukana bangana gute?
D. Nsanzimana:
Abafata imiti bariyongereye, barasaga ibihumbi 190.

IGIHE: Abo yica bangana gute?

Dr. Nsanzimana: Abapfa baragabanutse cyane ku buryo 82% by’abapfaga baguma muri gahunda[Yo gufata imiti igabanya ubukana] ari nacyo gisobanura ko umubare wa 3% udahinduka. Gusa mu gihugu cyose tubarura abasaga 3000 bitaba Imana bafite Virus itera Sida ariko biragoye kumenya niba ariyo ibica.

IGIHE: Abana bavuka ku babyeyi bafite virus itera Sida bandura bangana gute?

Dr. Nsanzimana: Mu mwaka wa 2000 twabaga dufite abana hafi 10% bavukanaga Virus itera Sida. Iyo mibare yaragabanutse ku buryo 1% niwe uyivukana.

IGIHE: Abafite Virus itera Sida biganje mu kihe cyiciro mu Rwanda?

Dr. Nsanzimana: Mu 2005 bari biganje mu cyiciro cy’imyaka 35, mu 2010 usanga biganje mu myaka 40, mu 2015, birimuka bajya mu myaka 45. Indi mibare dufite tutarashyira ahabona igaragaza ko abafite virus itera Sida ari nk’itsinda riri kugenda ryimuka. Bageze mu myaka 50.

IGIHE: Ni ubuhe butumwa mutanga?

Dr. Nsanzimana: Utarahura nayo, namushishikariza gufata ingamba zo kuyirinda[Yifata, yirinda imibonano mpuzabitsina idakingiye cyangwa gukoresha agakingirizo].

Abo dusangiye umurimo[Abaganga], buriya ururimi rurarema. Icyo ubwiye ukugana nicyo gifite akamaro kurusha imiti umuha.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza