OMS yemeje urukingo rwa virusi ya Ebola

Yanditswe na Cyprien Niyomwungeri
Kuya 23 Ukuboza 2016 saa 08:10
Yasuwe :
0 0

Ishami ry’Umuryango w’Abibumbye ryita ku buzima, OMS, ryemeje bidasubirwaho urukingo rwa virus y’icyorezo cya Ebola, nyuma y’uko mu bantu hafi 6000 barukingiwe umwaka ushize nta n’umwe yigeze igaragaraho.

Ejo kuwa Kane tariki 22 Ukuboza 2016 nibwo OMS yemeje urwo rukingo rwiswe rVSV-ZEBOV rwizewe 100% guhagarika burundu icyorezo cya Ebola, cyahitanye abarenga ibihumbi 11 300 muri Afurika y’Uburengerazuba.

Urwo rukingo rwakozwe na Canada, muri Guinea rwatewe abantu 5800 bakoze ku murwayi wa Ebola. Nyuma y’iminsi 10 barapimwe basanga nta n’umwe wayanduye.

Avuga kuri urwo rukingo, Umuyobozi mukuru wungirije wa OMS, Marie-Paule Kieny yagize ati “Ibi biragaraza ko urukingo rufite ubushobozi bwo gukingira 100%.”

Ikipe y’abashakashatsi yagaragaje ko mu gihe Ebola yagaragaje ubukana bwinshi, hari amahirwe 90% y’uko ruriya rukingo rwayikingira ku kigero kirenze 80%.

Umwe muri bo witwa Kieny, yavuze ko urukingo rutangira gukora nyuma yo kuruhabwa ariko batazi neza niba rushobora kumara amezi atandatu rugikora.

Laboratwari yo muri Leta Zunze Ubumwe za Amerika yatsindiye uburenganzira bwo kugurisha ruriya rukingo, ivuga ko biteguye guhashya icyorezo cya Ebola mu buryo bwose kuko banateganyije inkingo ibihumbi 300 zishobora gutangwa nk’ingoboka mbere yo gutangira kugurisha.

Ku ikubitiro urwo rukingo ruzagoboka abatuye mu duce twa Repubulika Iharanira Demokarasi ya Congo na Sudani tuvugwamo icyorezo cya Ebola.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza