Kwamamaza

Legacy Clinics igiye gutanga ubuvuzi bugezweho yifashishije ibikoresho bidasanzwe mu Rwanda

Yanditswe kuya 29-10-2016 saa 09:08' na Rabbi Malo Umucunguzi


Mu myaka itatu ishize, nibwo umunyemari Jean Malic Kalima umenyerewe mu bucukuzi bw’amabuye y’agaciro, yagize igitekerezo cyo gushinga ivuriro rigezweho kandi rifite ibikoresho bijyanye n’imiterere y’uburwayi bugaragara muri iki gihe.

Ni inzozi amaze iminsi 42 akabije ubwo huzuraga icyiciro cya mbere cya Legacy Clinics & Diagnostics mu Murenge wa Nyarugunga ku muhanda ugana i Kabuga mu Mujyi wa Kigali, ritwaye miliyoni $4.5, rikagira abaganga b’inzobere 15 n’abandi batanu biteguye gutangirana na ryo mu gihe kiri imbere.

Ubwo ryafungurwaga ku mugaragaro kuri uyu wa Gatanu, Umuyobozi ushinzwe ibikorwa by’ubuvuzi, Dr. Subira Manzi, yavuze ko rigiye gufasha cyane mu gutanga ubuvuzi bwakeneraga inzobere zo mu Buhinde.

Yakomeje agira ati “Mu cyiciro gikurikira, Legacy Clinics and Diagnostics izagura ibikorwa byayo, mu buryo bwo kwakira abantu benshi, hakazibandwa ku bikenerwa n’abaturage hitawe cyane kuri serivisi zitaboneka mu gihugu no mu karere.’’

Ni ivuriro riri mu bice bitatu harimo Legacy Clinics igizwe n’ibikoresho bifasha mu gusuzuma abarwayi bikorwa n’abaganga bo mu Rwanda, mu Buhinde no mu bindi bihugu; Legacy Diagnostics igizwe no gufotora ibice by’umubiri na laboratwari; na Legacy Dental irebana na serivisi z’amenyo; byose bigakorwa ku bufatanye bwa Legacy Clinics/Rwanda na SL Diagnostics yo mu Buhinde.

Legacy Clinics and Diagnostics ifite ibyuma bigezweho harimo nka CT-Scan isuzuma mu gice cyo hejuru cy’umubiri, igikoresho cyagiye ku isoko mu 2014, Mammogram ikoreshwa mu gusuzuma kanseri y’ibere, ibyuma bipima amagufa, umutima, amenyo n’ibindi.

Philippa Kibugu-Decuir, ni umwe mu banyuzwe n’ishingwa ry’iri vuriro, ashingiye ku bikorwa bizafasha mu gukurikirana uburwayi bwa kanseri y’ibere.
Ati “Izi ni inzozi nagize ubwo nasuraga u Rwanda mu 2007. Nta serivisi zari zihari, nta kintu cyari gihari mu bijyanye na kanseri. Uyu munsi turishimira Legacy yacu. Ku bantu bari bafite izo inzozi, uyu munsi zabaye impamo.’’

‘‘Maze imyaka 22 nkize kanseri, nakize kubera ko nabaga muri Amerika, nari mfite abaganga basaga barindwi, mfite serivisi zose, mfite ubufasha. Ku bw’amahirwe make, nari mfite umuvandimwe uba muri Afurika, we ntiyabashije kubaho kuko ntiyabonye nk’ibyo nari mfite.’’

Philippa waje gushinga Umuryango urwanya kanseri, Breast Cancer Initiative East Africa, avuga ko kubona ivuriro rya kanseri mu 2016 ari ugukomeza kuzura kw’inzozi ze, asaba abagore ngo ‘bikunde, bimenye, bisuzumishe’.

Minisitiri w’Ubuzima, Dr Diane Gashumba, yavuze ko ari ‘ibyishimo bikomeye kubona abikorera batanga umusanzu mu kubungabunga ubuzima bw’Abanyarwanda kandi ‘‘bakawutangira ahantu heza nk’aha’’.

Ati ‘‘Uko twabonye iri vuriro, rizaganwa n’abantu benshi mu karere, kuko bafite ibikoresho byiza, bikomeye, by’ikoranabuhanga, bafite abaganga b’inzobere, tubona yuko bizagira uruhare mu kugabanya impfu no kubungabunga ubuzima bw’Abanyarwanda.”

“Urebye hari serivisi zose, nicyo gishimishije. Hari serivisi zo kuvura abana, abakuru, ariko icyo nabonye gikomeye ni ubushobozi bwo kumenya icyo umuntu arwaye. Hari laboratwari ikomeye ikora ibipimo hafi ya byose, ariko hari n’ibyuma bipima umutima, ibisuzuma indwara z’ubuhumekero, navuga ngo biteye imbere cyane.’’

Dr Gashumba kandi yashimye kuba iri vuriro rinafite ikoranabuhanga rizajya rituma bavugana n’abantu bo hanze kugira ngo biyungure ubumenyi cyangwa bungurane inama mu buvuzi.’

Jean Malic Kalima yavuze ko gushinga iri vuriro byaturutse ku kuba igihugu cyaratanze amahirwe yo guhanga imirimo, ashinga ibitaro aho gutegereza ko leta yaba ari yo ikomeza kubikora cyangwa abashoramari bava hanze.

Ati “Twaravuze ngo reka tugerageze turebe, dushoremo imari, tunashake abaganga bafite ubumenyi batange serivisi nziza, kuko mu by’ukuri mu Rwanda hari abaganga. Hari abaganga bacu bize ariko bakaba babura ibikoresho.”

Minisiteri y’Ubuzima yizeza ko ibiciro by’iri vuriro bitazapfa kujya hejuru cyane, kuko amavuriro ubwayo adapfa kuzamura ibiciro ahubwo ari ibintu biteganywa n’amategeko.

Minisitiri w'Ubuzima Dr Gashumba Diane afungura ku mugaragaro Legacy Clinic
Jean Malic Kalima yavuze ko gushinga iri vuriro byaturutse ku kuba igihugu cyaratanze amahirwe yo guhanga imirimo
Minisitiri w'Ubuzima Dr Gashumba Diane ageza ijambo ku bitabiriye umuhango wo gufungura Legacy Clinics

Amafoto:Luqman Mahoro


Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Wednesday 7 Ukuboza 2016
Copyright © 2009 -2014 - IGIHE Ltd - All Rights Reserved