Kirehe: OMS yatanze imiti ya miliyoni 80 Frw irimo ihashya malaria mu mpunzi z’Abarundi

Yanditswe na Tombola Felicie
Kuya 7 Kanama 2017 saa 08:19
Yasuwe :
0 0

Ishami ry’Umuryango w’Abibumbye ryita ku Buzima (OMS) ryagobotse impunzi z’Abarundi ziri mu nkambi ya Mahama rishyikiriza imiti ya Malaria ibitaro bya Kirehe mu Ntara y’Iburasirazuba hagamijwe guhashya malaria nk’indwara ikunze kwibasira izo mpunzi.

Imiti yatanzwe harimo iya Malaria, imiti ifasha mu kuvura indwara zandurira mu mibonano mpuzabitsina, imiti izwi nka ‘antibiotics’, imiti ivura indwara zitandura ndetse n’ibikoresho bikoreshwa mu gusukura ibikoresho byo kwa muganga byose hamwe bikaba bifite agaciro ka miliyoni 80 z’amafaranga y’u Rwanda.

Harimo kandi imiti yo gufasha abagore batwite, gufasha abarwaye gucubwamo, asima n’ibikoresho by’isuku, ibyo kubaga , ibyo gupima umuvuduko w’amaraso n’ibindi bitandukanye.

Imiti ya Malaria niyo myinshi yatanzwe kuko mu mpunzi zisaga ibihumbi 55 ziri mu nkambi ya Mahama, niyo ndwara ibibasira cyane.

Nk’uko tubikesha The New Times, Umukozi ushinzwe gukumira indwara ndetse no kugenzura gahunda mu ishami rya OMS mu Rwanda, Dr Rusanganwa Andre, yatangaje ko impamvu ubwo bufasha bwatanzwe mu Karere ka Kirehe ari uko ariho hantu hari kugaragara malaria cyane.

Yanavuze ko uretse imiti ya Malara banatanze n’indi miti itandukanye ndetse n’ibikoresho mu guhangana n’izindi ndwara muri rusange.

Raporo zigaragaza ko mu nkambi ya Mahama iyo ndwara yibasiye cyane cyane abana bari munsi y’imyaka itanu bikaba byaragaragaye cyane hagati y’ukwezi kwa Mata na Gicurasi muri 2017 ndetse ikaba ari n’ikibazo ku baturiye iyo nkambi.

OMS ivuga ko yatangiye gufasha muri iki kibazo cya Malaria muri Gicurasi 2017 ifatanyije n’Ishami rya Loni ryita ku mpunzi (UNHCR), Guverinoma y’u Rwanda ndetse n’abandi bafatanyabikorwa hakaba harasuzumwe abantu 6,064, muri bo 48% basanganwa iyo ndwara, baravurwa barakira.

Byarakomeje no muri Kamena 2017, abantu 3273 barasuzumwe maze 41% basanganwa malaria.

Umuyobozi w’Ibitaro bya Kirehe Dr Ngamije Patient, ati “Nko mu kwezi kwa Kamena, 30% mu basanganywe Malaria bo mu nkambi ya Mahama, abari barembye cyane boherejwe ku bitaro bya Kirehe.”

Yakomeje agira ati “Ubu bufasha bw’imiti tubonye buzagabanya amafaranga twatangaga mu kugura imiti kuko ku kwezi tugura imiti iri hagati ya miliyoni 20 na 23 , ubu rero dukirikije ubufasha bw’imiti tubonye tuzazigama hagati ya miliyoni eshatu ndetse n’enye ku kwezi.”

Yanavuze ko iyi ndwara yihariye 4% by’abarwayi ibyo bitaro byakira. Dr Ngamije yavuze ko imiti bahawe na OMS izabafasha guhangana na Malaria ikunze kuhigaragaza muri Kanama na Nzeri.

OMS yanavuze ko mu minsi ya vuba izageza ku bitaro bya Kibungo ibikoresho bya laboratwari bifasha mu gusuzuma indwara hakiri kare , akaba ari ibitaro ibya Kirehe byoherezaho abarwayi.

Umunyamabanga Nshingwabikorwa w’Akarere ka Kirehe, Eric Zikama, yatangaje ko akarere ndetse na Minisiteri y’Ubuzima bakomeje gufatanya mu kurwanya amalaria ndetse ko ubufasha bwa OMS ari andi maboko yo kubashyigikira.

OMS igeza imiti muri Kirehe

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza