Kwamamaza

Kanseri ya prostate ishobora gutuma umugabo aba inkone

Yanditswe kuya 29-08-2016 saa 12:07' na Tombola Felicie


Kwangiza impyiko, kuvunagurika kw’amagufwa y’uruti rw’umugongo kunanirwa gutera akabariro, gukona umugabo, n’ibindi ni zimwe mu ngaruka ziva kuri kanseri ya prostate.

Kanseri ya prostate usanga abantu bayitiranya na kanseri y’amabya (testicular cancer) nyamara biratandukanye kuko rumwe ni urugingo ruba imbere mu mubiri na ho urundi rukaba hanze gusa byose ni uko ari ibice bigize imyanya myibarukiro y’umugabo.

Ishami ry’Umuryango w’Abibumbye ryita ku buzima, rigaragaza ko iyi kanseri iri mu ziganje mu bagabo ku isi kurusha kanseri zifata izindi ngingo z’umubiri.

Kanseri ya prostate yibasira cyane abagabo b’Abirabura bari hejuru y’imyaka 50 kandi mu bagabo bafite imyaka 70 y’amavuko, muri bo 70% bafatwa n’iyi kanseri.

Mu gushaka kumenya byinshi kuri iyi ndwara ituma umugabo ashobora kuba inkone, twegereye Dr Belson Rugwizangoga umwarimu muri Kaminuza y’u Rwanda, mu Ishami ry’Ubuvuzi maze ayivugaho byimbitse.

IGIHE: Kanseri ya prostate ni iki kandi ifata ite?

Dr Belson Rugwizangoga: Kanseri ya prostate (prostate cancer) mu Kinyarwanda nta zina igira nubwo usanga hari abayitiranya na kanseri y’amabya.

Prostate ni urugingo ruboneka ku bantu b’igitsina gabo gusa, rukaba ruri munsi y’uruhago, rukaba rukikije umuheha usohora inkari n’amasohoro; inyuma yarwo hari igice gihera cy’urura runini.

Kanseri ya prostate rero ni uburwayi buterwa n’imikurire irengeje urugero kandi ntagenzurwa y’uturemangingo two mu rugingo rwitwa prostate ruba munsi y’uruhago kandi rukaboneka gusa mu bantu b’igitsina gabo.

Ni urugingo rushinzwe kongera igice kimwe cy’amatembabuzi, kiyongera ku ntanga ngabo bikabyara amasohoro; andi matembabuzi yo mu masohoro akorwa n’urugingo rwitwa “seminal vesicles”.

Hari ubwoko butandukanye bwa kanseri ya prostate, ariko ububoneka cyane bufata mu mvubura zishinzwe gukora amatembabuzi ituma intangangabo zibaho neza igihe zikiri mu myanya ndangagitsina y’imbere mu mugabo, ndetse no mu gihe kigufi zimaze kugera mu gitsina gore.

Ishami ry’Umuryango w’Abibumbye ryita ku Buzima (OMS) ryemeza ko kanseri ya porositate ishobora guterwa n’ibintu bitandukanye, ariko cyane cyane, ibyago byo kuyirwara bigenda byiyongera uko muntu akura, by’umwihariko kuva ku myaka 50 gusubiza hejuru.

IGIHE: Iyi kanseri ikunze kwibasira abana, abasore, abakuze) ku ruhe rwego ?

Dr Rugwizangoga: Nk’uko twabivuze haruguru, iyi kanseri ifata abagabo bakuze, cyane cyane uhereye ku myaka mirongo itanu (50) y’amavuko usubiza hejuru. Mu bagabo bafite imyaka mirongo irindwi y’amavuko, muri bo 70% bafatwa n’iyi kanseri ya prostate.

Hari ubushakashatsi twakozwe ku barwayi ba kanseri ya prostate muri Tanzania ku barwayi 214, muri bo babiri gusa ni bo bari munsi y’imyaka 50 y’amavuko; impuzandengo y’imyaka y’amavuko yari 70, ukuze cyane yari afite imyaka 96. Muri rusange iyi kanseri ntikunze gufata abana n’abasore.

IGIHE: Iyi ndwara ihagaze ite mu bihugu byateye imbere n’ibiri mu nzira y’amajyambere?

Dr Rugwizangoga: Iyo urebye mu bihugu bikize iza ku mwanya wa mbere, na ho mu bihugu bikiri mu nzira y’amajyambere iza ku mwanya wa gatandatu.

Ku Isi yose, kanseri ya prostate ifata abagabo ibihumbi magana cyenda (900 000) buri mwaka, igahitana ibihumbi magana abiri na mirongo itandatu (260 000) buri mwaka.

Ikintu kihariye kuri kanseri ya porositate, ni uko yibasira Abirabura kurusha uko ifata abazungu, kandi ikaba nke cyane mu bo mu moko yo muri Aziya.

Iyi kanseri ifata Abirabura 225 ku bihumbi ijana (225/100 000), igafata Abazungu 91 ku bihumbi ijana (91/100 000) ndetse n’abo muri Aziya 3 ku bihumbi ijana (3/100 000).

Birumvikana ko mu mpamvu zitera iyi kanseri, uretse ibyago byiyongera uko umuntu agenda akura, hari n’uruhererekane rwo mu muryango ariko hazamo n’imibereho umuntu abamo buri munsi n’aho atuye.

Ibi tubivugira ko Abirabura bo muri Amerika bafatwa cyane n’iyi kanseri kurusha abo muri Afurika.

Ibi bivugwa ko biterwa n’imirire kubwo kurya ibyiganjemo ibinure biva ku nyamaswa, kutarya ibikatsi (fibres) bihagije (ubundi biboneka mu mboga n’imbuto), umubyibuho ukabije n’ibindi. Ubushakashatsi buracyakorwa harebwa ibintu simusiga bikurura kanseri ya prostate.

Gusa muri ibi byose, haba habayeho kwiyongera k’umusemburo ufasha mu myororokere y’umugabo, ukorerwa ahanini mu dusabo tw’intanga ngabo (amabya), undi ugakorwa n’imvuvura ziri hejuru y’impyiko (adrenals).

Iyo uhagaritse ikorwa ry’uyu musemburo, ibyago byo kurwara kanseri ya prostate kimwe n’ubundi bubyimba bwayo birashira.

Uyu musemburo ushobora guhagarikwa hakoreshejwe imiti cyangwa se gukona umugabo, turabigarukaho tuvuga ku mivurire y’iyi kanseri.

Mu Rwanda, nta mibare ibumbiye hamwe y’abarwaye iyi kanseri irashyirwa ahagaragara, ariko tugenda tubabona mu bitaro bitandukanye.

Imibare itangwa n’ishami ry’umuryango w’abibumbye ryita ku buzima yerekana ko kanseri ya prostate iza ku mwanya wa kabiri mu zifata abagabo muri rusange ku Isi.

IGIHE: Ni ibihe bimenyetso byerekana ko umuntu arwaye iyi kanseri?

Dr Rugwizangoga: Prostate ishobora kubyimba bidatewe na kanseri, ahubwo bitewe n’ububyimba butari kanseri. Ububyimba butari kanseri akenshi butangirira hagati muri uru rugingo, ahakijije umuheha usohora inkari n’amasohoro hanze bukawufunga.

Kanseri ya porostate yo itangirira mu mpande z’uru rugingo.Bityo rero, ibimenyetso bya kanseri ya prostate birimo kwangiza cya gice cy’urura runini, umuntu akagira umusarane urimo amaraso.

Harimo kandi kwangiza uruhago, rukaba rwakwifunga maze inkari zigasubira inyuma zikangiza impyiko, abenshi mu barwayi bakaba bicwa n’ukwangirika kw’impyiko.
Kanseri ya prostate kandi igaba amashami mu ngingo za kure, ikaba yibanda cyane ku magufwa cyane cyane ayo mu ruti rw’umugongo.

Hari abarwayi basuzumwamo iyi kanseri bitewe n’uko amagufwa yabo yacagaguwe n’iyi kanseri akenshi bigatera ibice by’umubiri kugira paralizi. Kuri ba barwayi bo muri Tanzania, twasanze abarenga 26 % baragize iki kibazo.

IGIHE: Umuntu ayimarana igihe kingana iki ayirwaye ngo ibone kumuhitana?

Dr Rugwizangoga: Kanseri ya prostate irica, ariko ntabwo yica abantu bose yafashe. Hari ubushakashatsi bwerekanye ko mu bayirwaye bose ishobora kurembya gusa 16%, bamwe muri bo ikaba yabahitana na ho abandi bagapfa bishwe n’ibindi bidafite aho bihuriye na yo.

Nakubwira ko kugeza ubu, iki kibazo cyo kumenya uwo iyo ndwara yahitana kitarabonerwa igisubizo cya burundu.

Hari ibintu bimwe abaganga bagenderaho bagena ubagwa, uhabwa imiti cyangwa se ukurikiranwa nta miti, ariko ibi byose ntibitanga igisubizo cya nyacyo.

Ubushakashatsi burakomeje ngo hamenyekane ibyaranga umuntu koko ugomba kuvurwa, n’uwo bakurikirana atabazwe cyangwa ngo ahabwe imiti. Ibi binaterwa n’uko ubazwe cyangwa agahabwa imiti ashobora kugira ibibazo kurusha utabikorewe.

IGIHE: Umuntu ufite kanseri ya prostate avurwa ate?

Dr Rugwizangoga: Kanseri ya prostate, kimwe n’izindi ishobora kuvurwa igakira, mu gihe yamenyekanye kwa muganga hakiri kare.

Kuyivura hakoreshwa bumwe muri ubu buryo:

Kubaga: gukuramo prostate yose cyangwa kanseri gusa, gukuramo amabya (gukona) kuko twabonye ko uriya musemburo witwa testosterone ariwo ukurura iyi kanseri kandi ugatuma ikura.

Gukoresha imiti irwanya umusemburo Testostérone
Gushiririza aharwaye (radiotherapy)
Gukoresha byombi: kubaga n’imiti

IGIHE: Ese uwarwaye kanseri ya prostate aba atadukanye no gukora imibonano mpuzabitsina?

Dr Rugwizangoga: Umuntu urwaye kanseri ya prostate, kimwe n’izindi kanseri ashobora gukomeza kugira ubuzima busanzwe nk’ubw’abatarwaye, iyo kanseri ye itaragera kure.

Iyo kanseri yageze kure, hari ibintu byinshi bigenda bihinduka, harimo nko kudashobora akazi umuntu asanganywe, kudashobora kurya bisanzwe, kudashobora gukora imibonano mpuzabitsina, yewe no kudashobora kuvuga bigeraho bikaza. Byose biterwa n’imbaraga umuntu agifite.

IGIHE: Ni gute abatarayirwara bayirinda?

Dr Rugwizangoga: Kwirinda indwara bijyana no kumenya ibiyitera.

Twabonye ko bimwe mu bikurura ibyago bya kanseri ya prostate bidashobora guhindurwa, ibyo ni nko gukura, ibara ry’uruhu n’uruhererekane rwo mu muryango.

Ariko hari ibindi umuntu yakwitaho, akagabanya ibyago byo kuyirwara, harimo kugira imirire iboneye (irimo gufata ibikatsi nk’imboga n’imbuto, kwirinda ibinure biva ku nyamaswa), kwirinda umubyibuho ukabije n’ibindi.

Icy’ingenzi na none ni ukugira umuco wo kwisuzumisha umuntu atararwara.
Mu Rwanda hari amahirwe kuko ibigo by’ubwishingizi byose byemeye ko buri mugabo ufite nibura imyaka 55 y’amavuko afite uburenganzira bwo kwisuzumisha prostate kwa muganga atarwaye rimwe mu mwaka.

Minisiteri y’Ubuzima kandi yashyizeho amabwiriza avuga ko igihe cyose umugabo ufite nibura imyaka 55 y’amavuko ageze kwa muganga ku mpamvu izo ari zo zose, agomba kujya asuzumwa n’iyi kanseri.

IGIHE: Murakoze cyane muganga

Dr Rugwizangoga : Murakoze namwe.

Igishushanyo cyerekana Prostate n'ingingo ziyikikije, naho kanseri ya Prostate ikunze gutangirira ©2016 Belson Rugwizangoga

[email protected]


Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Wednesday 28 September 2016
Copyright © 2009 -2014 - IGIHE Ltd - All Rights Reserved