Inzobere mu buvuzi zo muri Amerika zongeye kubaga abarwayi b’umutima mu Rwanda

Yanditswe na Ishimwe Israel
Kuya 10 Werurwe 2017 saa 06:15
Yasuwe :
1 0

Abantu 16 basuzumwe bagasanganwa uburwayi bw’umutima bahawe ubufasha bwo kubagwa ku bufatanye bw’inzobere mu buvuzi zibumbiye mu Muryango w’Abanyamerika wa Team Heart, Minisiteri y’Ubuzima n’Ibitaro byitiriwe Umwami Faisal.

Mu bikorwa ngarukamwaka by’uyu muryango udaharanira inyungu wa Team Heart, watangiye gukorera mu Rwanda mu 2008, umaze kubaga abantu barwaye umutima 150 muri rusange.

Ku nshuro ya 10 y’ibi bikorwa by’iminsi icumi, watangiye kuya 27 Gashyantare, itsinda ry’abaganga b’inzobere mu kubaga umutima rya Team Heart rifite icyicaro mu Mujyi wa Boston muri Leta ya Massachusetts rigizwe n’inzobere 60 zabaze abarwayi 16 bari bafite ikibazo cy’uburwayi bw’umutima ndetse bakomeza no kubitaho umunsi ku wundi; aho barwariye mu Bitaro byitiriwe Umwami Faisal, biheruka guhabwa Ikigo Oshen Health Care Rwanda Ltd.

Umuyobozi wa Team Heart ku Isi, Ceeya Patton Bolman, yatangarije IGIHE ko muri ibi bikorwa ngarukamwaka bakora bishimira ko bagaragaje ko hari icyizere ko indwara y’umutima ishobora kuvurwa igakira mu Rwanda.

Yagize ati “N’ubwo umutima uri mu ndwara zihitana ubuzima bwa benshi atari mu Rwanda gusa ndetse no mu bindi bihugu nka Kenya na Amerika ariko hari uburyo bwo kwirinda.”

Yakomeje agira ati “Mu Rwanda uko icyizere cy’ubuzima cyiyongera niko abarwaye indwara y’umutima bazamuka, ndetse ikaba ariyo mpamvu hakenewe inzobere zo kubitaho. Mu Rwanda ntabwo bigoye cyane n’ubwo nta nzobere zihari, ariko Leta yashyizeho ingamba zituma abantu bakora imyitozo ngororamubiri, bagashishikarizwa kurya ibiryo birimo intungamubiri bibafasha guhangana n’iki kibazo.”

Umuyobozi wa Team Heart ku Isi, Ceeya Patton Bolman, atangaza ko mu myaka icumi bamaze bakorera mu Rwanda bavuye abarwayi bagera ku 150

Team Heart yishimira intambwe iterwa buri munsi ku bijyanye n’ubuvuzi buhabwa abarwaye umutima mu Rwanda ndetse n’uburyo bakomeza gukurikiranwa.

Umuyobozi wa Team Heart atangaza ko intego ya Minisiteri y’Ubuzima, ijyanye no kwisuzumisha bihoraho izafasha kugaragaza abafite ikibazo cy’uburwayi bw’umutima hakiri kare, bakabasha kwitabwaho.

Ceeya ati “Turashaka gukomeza gushyiraho uburyo bwo gufasha abaganga uburyo bwo kuvura indwara z’umutima no kubahugura bihoraho.”

Uwavuwe na Team Heart mu byishimo by’ikirenga

Umwe mu barwayi babazwe umutima, witwa Uwera Béatrice yatangarije IGIHE ko yamenye ko afite ikibazo cy’umutima bitewe n’ ibimenyetso birimo gukorora cyane rimwe na rimwe agacira amaraso, umunaniro mwinshi no guhumeka mu buryo bugoranye.

Yagize ati “Natangiye kugira iki kibazo ntwite, iyo nazamukaga ahantu nagiraga umunaniro mwinshi, naryama nkabura umwuka. Nakomeje kuremba cyane ngiye kubyara ariko nza kubyara neza.”

Yakomeje atangaza ati “ Nkiva mu bitaro namaze ibyumweru bibiri meze nabi, ntashobora no kuryama, njya kwa muganga baransuzuma basanga umutima warabyimbye. Bampa imiti y’igihe gito bahita banyohereza mu Bitaro bya Faisal.”

Uwera utuye mu Murenge wa Kanyinya muri Nyarugenge nyuma yo kubagwa, yatangiye kugarura intege ndetse afite icyizere cy’ejo hazaza.

Yagize ati “Ubu natangiye kugarura imbaraga ndetse nshobora guhumeka neza nta kibazo.”

Uwera Béatrice atangaza ko nyuma yo kubagwa yatangiye kugarura imbaraga

Mu mwaka wa 2008, Minisiteri y’Ubuzima yagiranye amasezerano y’imikoranire n’amatsinda ane y’inzobere zibaga umutima arimo Team Heart, Healing Hearts North West y’Abanyamerika, Chain of Hope ry’Ababiligi na Open Heart International ryo muri Australia. Ibikorwa by’aya matsinda mu Rwanda byatumye kugeza ubu abarwayi b’umutima bagera kuri 460 bamaze kubagwa.

Imikoranire ya Minisiteri y’Ubuzima, Team Heart n’Ibitaro bya Faisal, ituma abantu bakoresha mituweli bamaze gusuzumwa bakoherezwa kubagwa umutima bashobora kwivuza mu buryo busanzwe.

Indwara zituruka ku mutima ziri mu zihitana abantu benshi. Mu 2012, abagera kuri miliyoni 17,5 bahitanwe nayo, abenshi baturuka mu bihugu bikiri mu nzira y’amajyambere.

Iyi ndwara ikunze kwibasira abana bari munsi y’imyaka 5 n’abantu bari hejuru ya 50, iterwa ahanini n’umuvuduko w’amaraso w’igihe kirekire.

Ubushakashatsi bwakozwe n’Ikigo cy’Igihugu cy’Ubuvuzi (RBC) mu 2016, bwagaragaje ko mu bantu basaga ibihumbi 120 barwaye indwara y’umutima, hivuza gusa abasaga ibihumbi bitanu.

Ceeya Patton Bolman ari kumwe na Israel, umwe mu bana babazwe umutima, bakiri kwitabwaho
Dr Ruhamya Nathan inzobere mu buvuzi bw’indwara y’umutima mu Bitaro byitiriwe Umwami Faisal

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza


Warning: mysqli_query(): (HY000/1194): Table 'spip_jobs' is marked as crashed and should be repaired in /home/lex94/public_html/ecrire/req/mysql.php on line 244