Ijoro ribara uwariraye, Kemirembe wazahajwe na kanseri y’ibere araburira abagore

Yanditswe na Tombola Felicie
Kuya 11 Mutarama 2018 saa 11:43
Yasuwe :
1 0

Biragoye kuba umuntu utaranyuze mu bihe bigoye ashobora kubyumva no kubisobanura kimwe n’uwabibayemo nk’uko bivugwa ko ‘Ijoro ribara uwariraye’.

Kuvuga kanseri y’ibere ku wayirwaye byumvikana nko kubwirwa ko urupfu ruje mu gihe ku batarayirwara no kwisuzumisha biba ari ikibazo nk’uko Kemirembe Maimuna wayirwaye abitangaza.

Imibare y’Ikigo cy’Igihugu gishinzwe ubuzima RBC igaragaza ko mu bantu 1500 babasha kwisuzumisha kanseri ku mwaka, 13% baba bafite kanseri y’ibere, ibyo bigatuma iyi kanseri n’iy’inkondo y’umura ziza ku isonga mu zigaragara cyane mu banyarwandakazi.

Nubwo indwara zose zitera kwiheba, Kemirembe Maimuna w’imyaka 50 utuye mu Murenge wa Kimironko, Akarere ka Gasabo, avuga ko kubwirwa ko afite kanseri byahwanye no kubwirwa ko agiye gupfa.

Uyu mubyeyi yavuze ko yafashwe na kanseri y’ibere mu mpera za 2013 ubwo yari afite imyaka 45 agatangira kwivuza muri 2014.

Abaganga babuze indwara mu bihe bitandukanye gusa bamuha umuti wo gusigaho,na we kuko atababaraga yishyiramo ko yakize akomeza akazi ke k’ubwarimu.

Asubiye kwivuza yoherejwe mu Bitaro byitiriwe Umwami Faisal basanga ibere ririmo ikibyimba nyuma aza kujya kwivuriza muri Kenya azi ko bazamubaga ikibyimba agahita ataha atungurwa no gusanga arwaye kanseri.

Ati “ Nabaye nk’upfuye naraturikaga nkarira, ngiye kubagwa nsezera k’uwo twari kumwe numva ntari bugaruke.”

Kemirembe avuga ko yamaze umwaka yivuza, uretse kubagwa no gushiririza kanseri ubu akaba afite imiti anywa azahagarika nyuma y’imyaka itanu.

Icyo Kemirembe abwira abagore

Kemirembe asaba bagenzi be kwita ku buzima bwabo kandi bagakunda kwisuzumisha hakiri kare kuko n’iyo basanganywe indwara amahirwe yo gukira aba agihari.

Yagize ati “Mfite icyo mbwira igitsina gore, be guhuga ngo bibagirwe ubuzima bwabo kuko uko kanseri itinda ni ko amahirwe yo gukira ayoyoka. Be kurindira kumva ko barwaye ahubwo bakunde kwisuzumisha.”

Uyu mubyeyumi ngo yiyemeje gutanga umusanzu wo kubwira abantu ububi bwa kanseri haba mu muganda, mu mugoroba w’ababyeyi n’ahandi hose abonye uko abasha kuvuga.

Ati “Iki ni ikibazo gifitwe na benshi ariko abanyarwandakazi dukunze guceceka, ukaba utaburira mugenzi wawe ngo ibyo wanyuzemo bye kuzamubaho. Ndabagira inama yo kwita ku mirire, siporo ndetse no guhora bisuzuma ubwabo bakamenya niba nta mpinduka yabaye ku mabere yabo.”

Avuga ko atari benshi bashobora kubona ubuvuzi bwa kanseri y’ibere bitewe n’abaganga bake ndetse n’ubushobozi bw’amafaranga ko icyo abagore bakwiriye gukora ari ukwirinda.

Kanseri y’ibere ishbora gukira iyo imenyekanye hakiri kare

Umwarimu muri Kaminuza y’u Rwanda mu Ishami ry’Ubuvuzi unakorera mu bitaro bya Kaminuza bya Kigali (CHUK), Dr. Belson Rugwizangoga, yabwiye IGIHE ko kanseri y’ibere iterwa n’imikurire irengeje urugero kandi ntagenzurwa y’uturemangingo-fatizo two mu ibere.

Iyo kanseri y’ibere idahise ivurwa, irakura, ikangiza ibice bitandukanye by’ibere, imikaya n’imbavu ndetse ikaba yajya mu ngingo za kure nk’ibihaha, umwijima, ubwonko n’ahandi inyuze mu nturugunyu (amasazi) ziba mu kwaha.

Dr Belson akomeza avuga ko kanseri y’ibere ari yo yibasira abagore kurusha izindi zose ku isi, mu Rwanda mu barwaye iyi kanseri 25% bari munsi y’imyaka 45 y’amavuko, abagera kuri 50% bari hagati ya 45 na 60, na ho 25% barengeje 60.

Avuga kandi ko n’abagabo bashobora gufatwa na kanseri y’ibere bakaba bagira ibyago byinshi ko ikwira vuba mu mubiri, kurenza uko bigaragara ku bagore.

Kanseri y’ibere ngo ishobora gukira cyane cyane iyo umurwayi yisuzumishije hakiri kare ndetse n’iyo bigaragara ko yageze kure cyane ntibibuza ko umurwayi afashwa.

Gupima kanseri bikorerwa mu bitaro bikuru bya leta (CHUK, CHUB, King Faisal na Kanombe) n’ibitaro by’Akarere bya Butaro ndetse n’ibyigenga birimo Ibitaro by’Inkuru Nziza i Gikondo.

Hariho na gahunda y’igihugu isaba buri mugore ufite imyaka 40 kwisuzumisha rimwe mu mwaka ngo amenye uko ahagaze nubwo yaba nta burwayi yiyumvamo, bakareba ko nta kanseri y’ibere cyangwa inkondo y’umura yaba ihari.

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza