00:00:00 IGIHE NETWORK KN KINYARWANDA EN ENGLISH FR FRANCAIS

Ibyo wamenya kuri Mosquirix, urukingo rwa mbere rwa Malaria rwemejwe na OMS

Yanditswe na Zigiranyirazo Bajecteur
Kuya 8 Ukwakira 2021 saa 11:22
Yasuwe :
0 0

Ishami ry’Umuryango w’Abibumbye ryita ku Buzima (OMS) ryemeje ikoreshwa ry’urukingo rwa mbere rwa Malaria rwiswe RTS,S/AS01 n’izina ry’ubucuruzi rya Mosquirix nyuma y’igihe rwari rumaze rukorerwa igerageza.

Nyuma yo kwemezwa k’uru rukingo, kuri ubu abana bo mu bihugu byo Munsi y’Ubutayu bwa Sahara n’abo mu tundi duce tugaragaramo abarwayi benshi bashobora gutangira kuruhabwa.

Bimwe mu by’ingenzi wamenya kuri uru rukingo nk’uko tubikesha Hindustan Times ni uko rwakozwe na Sosiyete y’Abongereza ya GlaxoSmithKline ariko by’umwihariko rugakorerwa muri Afurika kandi rugakorwa n’abashakashatsi b’Abanyafurika nk’uko byashimangiwe n’umuyobozi Mukuru wa OMS, Tedros Adhanom Ghebreyesus.

Yagize ati “Dutewe ishema cyane n’uko uru rukingo rwakorewe muri Afurika kandi rugakorwa n’abashakashatsi b’Abanyafurika.”

Ikigo cy’u Burayi gishinzwe iby’Imiti cyatangaje ko uru rukingo rushobora guhabwa kuva ku bana bafite ibyumweru bitandatu kugeza ku bafite amezi 17 kandi rukaba rufite ubushobozi bwo kubarinda Malaria hagendewe ku igeragezwa ryarwo ryakozwe kuva mu 2019 mu bihugu nka Kenya, Malawi na Ghana aho hatanzwe dose zigera kuri miliyoni 2.3 ku bana 800.000 bo muri ibyo bihugu cyane ko abicwa n’iyi ndwara benshi ari abari munsi y’imyaka itanu.

Iki kigo cy’u Burayi gishinzwe imiti cyanahishuye ko uru rukingo rushobora gufasha mu kurinda indwara zifata umwijima zirimo na virus itera Hépatite B nubwo ngo abantu badakwiye gukoresha urwo rukingo rwonyine bagamije kwirinda iyo ndwara y’umwijima yo mu bwoko bwa B.

-  Imikoreshereze n’imikorere yarwo

GlaxoSmithKline yari yarakoze uru rukingo mu 1987 ariko impungenge yarwo ikaba kuba kugira ngo umuntu abe akingirwe byuzuye bisaba ko afata dose enye zarwo aho eshatu za mbere afata imwe buri kwezi ku mwana w’amezi atanu, atandatu n’arindwi, indi dose ya nyuma yongera ubwirinzi akayihabwa hejuru y’amezi 17. Aha ho hari n’indi mpungenge y’uko nyuma y’igihe runaka rushobora gutakaza ubushobozi bwo kurinda Malaria.

Uhabwa urukingo rwa Mosquirix, aterwa mililitiro 0.5 mu mikaya yo ku kibero cyangwa ku kaboko hakazirikanwa cyane gusigamo intera y’ukwezi hagati y’urukingo n’urundi kuri eshatu za mbere, dose ya kane igatangwa umwana yamaze kugeza amezi 17.

Abashakashatsi bo mu Kigo cy’u Burayi cy’Imiti bo bavuga ko uru rukingo rukoranye utunyangingo tw’udukoko duto twa plasmodium falciparum dusanzwe dutera Malaria kugira ngo umubiri watewe urukingo uzabashe kwiyubakamo abasirikare bafite ubushobozi bwo guhangana natwo.

Nubwo uru rukingo rufite ubushobozi bwo gukingira Malaria ku kigero cya 30%, byitezwe ko ruzabasha kugabanya ubwandu bw’ayo kuri icyo kigero n’ubundi aho nibura umubare w’abanduraga Malarira uzagabanukaho abagera kuri miliyoni umunani n’impfu zaterwaga nayo zikagabanukaho abagera ku bihumbi 40 buri mwaka.

Uru rukingo ruzakoreshwa by’umwihariko muri Afurika kuko n’ubusanzwe 94% by’ubwandu n’impfu ziterwa n’iyo ndwara bigaragara kuri uwo mugabane aho nko mu 2019 Abanyafurika bagera ku bihumbi 386 bahitanywe na yo mu gihe ku Isi yose muri rusange yishe abagera ku bihumbi 409.

Mu gihe Afurika ari yo ikunze kwibasirwa na Malaria, hari ibihugu bigenda bishimirwa na OMS ku bwo kutarangwamo ubwandu na mba bwayo, aho nko mu 2007 iryo shimwe ryagenewe Leta Zunze Ubumwe z’Abarabu, Maroc na Turkmenistan mu 2010, Armenia mu 2011 mu gihe mu 2016 Sri Lanka na Kyrgyzstan zitabonetsemo umurwayi n’umwe wa Malaria.

Mu 2018 Paraguay na Uzbekistan ni byo bihugu byemejwe na OMS nk’ibitaragaragayemo Malaria, mu gihe Argentine na Algeria zageze kuri uwo muhigo mu 2019 naho muri uyu mwaka bikagerwaho na Salvador.

OMS yemeje ikoreshwa ry’urukingo rwa mbere rwa Malaria rwiswe RTS,S/AS01, rukoresha izina rya Mosquirix

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .