Ibyo wamenya kuri Hemophilia, indwara y’amaraso ishobora gutera ubumuga bukomeye

Yanditswe na Evariste Nsengimana
Kuya 18 Mata 2019 saa 08:40
Yasuwe :
0 0

Hemophilia ni uburwayi bw’amaraso bukunze kwigaragaza igihe umuntu akomeretse, amaraso akavira imbere mu mubiri cyangwa inyuma ariko akanga kuvura ngo arekera aho kuva.

Abahanga mu buzima bwa muntu bagaragaza ko iyi ndwara iterwa no kubura intungamubiri zifasha amaraso kuvura, akenshi ikaba uruhererekane rwo mu muryango kuko bigira uruhare ku kigero cya 70%.

Buri wa 17 Mata Isi yose yizihiza umunsi mpuzamahanga wahariwe ubukangurambaga bwo kumenyekanisha indwara ya Hemophilia.

Umuvugizi wungirije w’Umuryango nyarwanda w’abafite Hemophilia, Murindabyuma Sylvestre, yabwiye IGIHE ko umuntu uyirwaye iyo akomerekeye inyuma ava amaraso ntakame ariko yakomerekera imbere, amaraso akipfundika hagasa n’umukara.

Ati “Iyo ari mu bwonko byo biba ibindi bindi kuko ayo maraso atabasha kuvura arakomeza akava, akagenda yanduza ibindi byumba by’ubwonko kugeza ubwo umuntu ahuma.”

Yavuze ko uretse guhuma, iyo umuntu avira imbere mu bwonko, imitsi y’ubwonko iruha, ntibashe gukomeza gukorana n’ibindi bice by’umubiri.

Murindabyuma ati “Umuntu abona ingingo ze zabaye impfunira, zikabyimba ukagira ngo bamuroze cyangwa yavunitse kandi mu by’ukuri atigeze atsikira…uko umuntu agenda akura niko higaragaza ibimenyetso runaka birimo no kuzasanga yarakunjamye.”

Rushahigi Prince urwaye Hemophilia yabwiye IGIHE ko kubera kutabonera imiti ku gihe, byamuteye ubumuga bw’ingingo ubu akaba agendera ku mbago.

Ati “Ibibazo byinshi bikunda kuba mu ngingo… Njye nk’ubu ngendera ku mbago ariko ni ukubera ko mvunika nta bufasha nabashije guhita mbona.”

Hemophilia ntikira

Murindabyuma ati “Ntabwo ipfa gukira gutyo gusa, si n’uburwayi umuntu yitera ahubwo arabuvukana mu maraso ye abikomora ku turemangingo ababyeyi cyangwa igisekuru cye bafite.”

Umuntu ngo asabwa guhora anywa imiti imworohereza kandi akigengesera yirinda ko hari ikintu cyamukomeretsa ngo ave amaraso.

Umuntu wese nubwo atabona ko ayirwaye ashobora kuba yazabyara umwana uyifite cyangwa se nawe akaba afite ibimenyetso byayo atabizi.

Kubera ubumenyi buke abantu bafite kuri iyi ndwara ngo hari igihe umuntu agaragaza ibimenyetso byayo bagakeka ko yarozwe, bakihutira kumujyana mu bavuzi gakondo nyamara atari byo.

Murindabyuma ati “Akenshi iyo ugiyeyo baguca indasago, uko bazica niko habyimba kuko aho kuvura icyateye indwara aba acyongereye ariko iyo umuntu ashishoje, agaha imbaraga n’agaciro abaganga baragufasha.”

Urubuga Mayo Clinic rugaragaza ko bimwe mu bimenyetso byayo harimo kuvira imbere, mu ngingo nko mu nkokora, mu bujana, mu mavi n’ahandi hakabyimba kandi hasa n’umukara cyane, kubabara ingingo, kuva amaraso ntakame igihe akomeretse cyangwa akingiwe, kuruka bya buri kanya n’ibindi.

Rugaragaza ko inakunda kwibasira abagore batwite, abarwaye Cancer n’izindi ndwara zimunga ubudahangarwa bw’umubiri.

Umuti wayo ubona umugabo ugasiba undi

Murindabyuma yavuze ko nubwo iyi ndwara itavurwa ngo ikire, umuntu asabwa gukomeza kunywa imiti imworohereza ariko ngo irahenze cyane kuko irenza miliyoni 7 Frw ndetse bigasaba kuyitumiza mu mahanga.

Mu Rwanda ibitaro bya Kaminuza bya Kigali nibwo bifite ubushobozi bwo gusuzuma bikemeza niba umuntu arwaye Hemophilia.

Kugeza ubu mu Rwanda nta bushakashatsi burakorwa bugaragaza umubare w’abarwaye Hemophilia ariko abamaze kwihuriza mu muryango w’abayirwaye n’abayirwaje basaga 38 ariko harimo n’abafite abana barenze batatu bayirwaye.

Nta mubare w’abayirwaye ku Isi ugaragara ariko muri Leta Zunze Ubumwe za Amerika bagera ku bihumbi 20. Ku Isi bikekwa ko abayirwaye bagera ku bihumbi 400 ariko ababasha kubona imiti ni 25% gusa.

Umuvugizi wungirije w’Umuryango Nyarwanda w’abafite Hemophilia, Murindabyuma Sylvestre, yatangaje ko iyi ndwara itavurwa ngo ikire
Rushahigi Prince urwaye Hemophilia yabwiye IGIHE ko yamuteye ubumuga
Rushahigi Prince urwaye Hemophilia yamuteye ubumuga

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza