Kwamamaza

Huye:Urubyiruko rwibasiwe n’indwara zitandura

Yanditswe kuya 26-08-2016 saa 13:34' na Prudence Kwizera


Ubuyobozi bw’Akarere ka Huye buvuga ko butewe impungenge n’ubuzima bw’abaturage biganjemo urubyiruko bari kwishora mu kunywa ibiyobyabwenge n’inzoga z’inkorano zitemewe n’amategeko, bigatuma bibasirwa n’indwara zitandukanye ziganjemo izitandura.

Ubwo ibitaro by’Akarere ka Huye bya Kabutare byagiranaga ikiganiro n’abanyamakuru kuri uyu wa Kane tariki ya 26 Kanama 2016, hagarutswe ku kibazo cy’ubwiyongere bw’indwara zitandura ziri kwibasira abakiri bato kandi bitari bimenyerewe.

Izi ndwara mu bihe byashize zajyaga zigaragara ku bageze mu zabukuru na bwo bitari cyane, ziganjemo izifata impyiko, ibihaha, umutima, umwijima, Diyabete, n’izindi.

Umuyobozi Mukuru w’ibitaro bya Kabutare, Dr Theonetse Maniragaba yabanje gusobanura ko impamvu bazita indwara zitandura ari uko nta muntu waba ayirwaye ngo ayanduze mugenzi we.

Dr Maniragaba yagize ati “Impamvu zitwa indwara zitandura ni uko nta muntu waba arwaye imwe muri izo ndwara ngo ayanduze mugenzi we, wenda tugereranyije nka Malariya yo ni indwara yandura kuko iyo umuntu ayirwaye umubu ukamuruma, nyuma ukongera ukaruma undi utarwaye uhita umwanduza”.

Yakomeje avuga ko bitewe n’abantu benshi bakomeje kwibasirwa n’izi ndwara, hari gahunda yuko ku bitaro bya Kabutare hagiye gushyirwaho ahantu hihariye hakirirwa abantu bivuza izo ndwara.

Ati “Tugiye gushyiraho ahantu hihariye hakirirwa abantu barwaye izo ndwara zitandura, umuntu akajya aza azi aho ahererwa iyo serivisi nk’uko hari aho abayeyi babyarira cyangwa aho bakirira indembe hihariye”.

Umuyobozi wungirije ushinzwe imibereho myiza y’abaturage mu karere ka Huye, Christine Niwemugeni yavuze ko asanga izi ndwara zitandura ziri kwibasira urubyiruko muri iki gihe hari aho zihuriye n’inyobwa ry’ibiyobyabwenge ndetse n’inzoga z’inkorano zitemwewe n’amategeko.

Yagize ati “Indwara z’umwijima,ibihaha, impyiko, ziri kwiyongera kandi usanga bifitanye isano n’ibyo biyoga abantu banywa kuko umubiri uba warananiwe”.

Uyu muyobozi yakomeje agaragaza ko iki kibazo cy’indwara zitandura ziri kwibasira urubyiruko bagihagurukiye hatangwa inyigisho ku baturage, ndetse avuga ko bagenda bakiganiraho ku nzego zitandukanye.

Niwemugeni yakomeje avuga ko usibye inzoga z’inkorano zitemewe, hari n’ikibazo cy’urubyiruko runywa urumogi n’ibindi bisa narwo, ariko ngo igiteye impungenge kurushaho ni uko byageze no mu mashuri.

Akomeza avuga ko hakwiye kubaho uruhare rwa buri wese ku kwigisha abakiri bato ububi bw’ibiyobyabwenge no guha agaciro ubuzima ndetse no kuburinda, kuko usanga hari ababijyamo batazi ingaruka mbi zabyo bakazisanga byarabagize imbata.

Abakozi b'Ibitaro bya Kabutare mu kianiro n'abanyamakuru
Umuyobozi wungirije ushinzwe imibereho myiza y’abaturage mu karere ka Huye, Christine Niwemugeni
Umuyobozi Mukuru w’ibitaro bya Kabutare, Dr Theonetse Maniragaba

[email protected]


Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Saturday 3 Ukuboza 2016
Copyright © 2009 -2014 - IGIHE Ltd - All Rights Reserved