Huye: Abarwara Malaria bagabanutseho 98% mu myaka ine ishize

Yanditswe na Prudence Kwizera
Kuya 27 Mutarama 2021 saa 07:44
Yasuwe :
0 0

Imibare y’Ikigo cy’Igihugu cy’Ubuzima, RBC, igaragaza ko mu myaka ine ishize abarwara Malaria bagabanutseho 98% kubera ingamba zitandukanye zagiye zifatwa zigamije kuyihashya.

Byatangajwe kuri uyu wa Gatatu tariki ya 27 Mutarama 2021 n’Umuyobozi wa Porogaramu y’Igihugu yo kurwanya Malaria muri RBC, Dr Mbituyumuremyi Aimable, ubwo yatangizaga ku mugaragaro igikorwa cyo gutera mu nzu z’abaturage umuti wica imibu itera Malaria mu Karere ka Huye.

Yavuze ko mu myaka ine ishize hatangijwe ibikorwa byo gutera uwo muti mu nzu z’abaturage, i Huye Malaria yagabanutse ku kigereranyo cya 98%.

Yagize ati “Mu myaka ya 2016/17, Huye yari mu turere twa mbere twazahajwe na Malaria, twagiraga hafi abarwayi bageze ku bihumbi 100 mu kwezi kumwe. Ubu ngubu imibare duheruka ya vuba yerekana ko abarwara Malaria bari munsi y’ibihumbi bibiri mu kwezi kumwe mu karere kose.”

Dr Mbituyumuremyi yakomeje avuga ko iyo basesenguye basanga byaratewe n’uko abaturage bo mu Karere ka Huye bashyize mu bikorwa ingamba zikomatanyije zirimo kurara mu nzitiramubu, gukuraho ibihuru n’ibidendezi hafi y’urugo, kugira isuku no gutera umuti wica imibu mu nzu.

Bamwe mu baturage bo mu Karere ka Huye babwiye IGIHE ko kubahiriza ingamba zo kwirinda Malaria byatumye iyo ndwara icika mu miryango yabo.

Munyampirwa Juvénal wo mu Murenge wa Tumba avuga ko iwe mu rugo hadaheruka Malaria bitewe n’uko yitaye ku kubahiriza amabwiriza yo kuyikumira.

Ati “Iwanjye haheruka Malaria mu 2006 kuko inama zose batugiriye zo kuyirinda ndazubahiriza. Iwanjye twese turara mu nzitiramibu kandi tukirinda ko hafi y’urugo haza ibihuru bishobora kwihishamo imibu.”

Abaturage bo mu Karere ka Huye baganiriye na IGIHE bose bahuriza ku kwishimira igikorwa cyo kubaterera mu nzu umuti wica imibu itera Malaria kuko bacyitezeho kurandura iyo ndwara burundu.

Umuyobozi wungirije ushinzwe Imibereho Myiza y’Abaturage mu Karere ka Huye, Kankesha Annonciata, yavuze ko igikorwa cyo gutera uwo muti kizamara ibyumweru bitatu aho hazaterwa mu ngo zigera ku bihumbi 88.

Yasabye abaturage gukomeza ubufatanye mu kurandura Malaria hubahirizwa ingamba zafashwe zigamije kuyikumira.

Ati “Turi mu turere tukigaragaramo Malaria, abaturage turabasaba ubufatanye mu kuyirandura burundu kuko mu minsi yashize hari aho wageraga mu rugo umuntu akavuga ngo ntajya arwara Malaria akanga ko bamuterera umuti.”

Umuti usigaye uterwa umara igihe cy’umwaka mu nzu mu gihe uwari usanzwe mu myaka yo hambere wamaraga amezi atandatu gusa.

Usibye gutererwa imiti mu nzu, Abanyarwanda banagirwa inama yo kurara mu nzitiramibu ziteye imiti.

Ubushakashatsi bwa Gatandatu ku bwiyongere n’Ubuzima bw’Abaturage, DHS, bw’umwaka wa 2019-20 bwamuritswe mu ntangiriro z’ukuboza 2020, bwagaragaje ko umubare w’ingo zitunze inzitiramibu nibura imwe mu Rwanda wagabanutse, zigera kuri 66% mu 2020, zivuye kuri 81% mu 2015.

Minisiteri y’ubuzima igaragaza ko abarwayi ba Malariya bavuye kuri 401 ku bantu 1000 mu 2017-2018, bakagera kuri 200 ku bantu 1000 mu 2019-2020.

Abahitanwa na Malariya mu Rwanda bavuye kuri 660 mu mwaka wa 2015/2016 bagera kuri 264 mu 2018/2019.

Igikorwa cyo gutera umuti wica imibu mu nzu z'abaturage cyatangijwe ku mugaragaro kuri uyu wa Gatatu
Mbere yo gutera umuti wica imibu babanza kuwuvanga neza
Umuyobozi wa Porogaramu y’Igihugu yo kurwanya Malaria muri RBC, Dr Mbituyumuremyi Aimable, yavuze ko mu Karere ka Huye Malaria igenda icika
Umuyobozi wungirije ushinzwe Imibereho Myiza y’Abaturage mu Karere ka Huye, Kankesha Annonciata, yasabye abaturage ubufatanye mu kurandura Malaria

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .