‘Hernie’, indwara ituma abagabo babyimba udusabo tw’intanga

Yanditswe na IGIHE
Kuya 18 Werurwe 2017 saa 11:27
Yasuwe :
0 0

Indwara ya Hernie bakunze kwita imisipa iri mu ziri kugaragara mu Banyarwanda muri iki gihe aho yigaragaza mu buryo butandukanye ku bagore no ku bagabo.

Ni indwara ituma hari ingingo z’umubiri zirimo nk’amara, ziva mu mwnaya wazo zikajya ahandi zitagenewe kuba.

Inzobere z’abaganga mu kuvura iyi ndwara zivuga ko imwe mu mpamvu ziyitera harimo kuba umuntu aterura ibintu biremereye, kurwara inkorora igihe kirekire , ishobora guterwa kandi n’uko mu mwanya w’amara haba hari icyuho bitewe n’uko umuntu yavutse cyangwa izindi mpamvu zitandukanye.

Urwaye iyi ndwara iyo ari igitsinagabo, agaragaza ibimenyetso bitandukanye birimo kugira umuriro, kubyimba udusabo tw’intamba no kugira ububabare butandukanye mu bindi bice by’umubiri.

Ku gitsinagore, uyirwaye arangwa no kubyimba mu mayasha, kugira umuriro n’ibindi bimenyetso bisa n’ibyo ab’igitsibagabo bagaragaza.

Indwara ya ‘hernie’ ikomeje kwibasira abatari bake

Abantu 200 mu bihumbi 100 by’abaturage b’u Rwanda, baba barwaye iyi ndwara mu bice bitandukanye by’igihugu nk’uko bitangazwa n’inzobere z’abanganga bayivura mu bitaro bya CHUK.

Bamwe mu bayirwaye bihutira kujya mu bavuzi gakondo bazi ko barozwe, mu gihe hari n’abandi bavuga ko bagira isoni zo guhita bajya kwa muganga bakivuza magendu.

‘Ubugabo burabyimba nkagira ipfunwe’

Umwe mu bagabo barwaye ‘hernie’ mu Karere ka Kayonza yatangarije IGIHE ko ituma agira ipfunwe iyo ari mu bandi. Ati “Ubugabo burabyimba nkagira ipfunwe iyo ndi nko mu nzira bikansaba gukenyera umupira cyangwa gushaka aho nicara kugeza bubyimbutse”.

Undi mugabo wo mu Karere ka Kicukiro avuga ko ubugabo hari igihe bubyimba n’igitsina kikabyimba bigaherekezwa n’uburibwe ku buryo bituma asiba akazi.

‘Hernie ni indwara itandura’

Dr Faustin Ntirenganya, umuganga ubaga akaba ari na we uhagarariye ishami ribaga muri CHUK, avuga ko abarwaye iyi ndwara bagenda biyongera, mu gihe umubare w’abaganga bayivura ukiri muto.

Yagize ati “Ikibazo gihari ni uko abarwayi bagenda biyongera uko bwije n’uko bucyeye kuruta abaganga babavura. Uburyo buhari bwo kuyivura kugeza uyu munsi ni ukubaga uyirwaye, ariko kandi ishobora kubagwa ikagaruka gusa kuri ubu hari ubundi buryo bugezweho bwo kuyivura igakira burundu.”

Dr Faustin akomeza avuga ko indwara ya hernie itandura cyangwa ngo ikomoke ku ruhererekane rwo mu miryango.

Guhera mu mwaka wa 2012, umuryango ‘Rwanda Legacy of Hope’ washinzwe n’umunyarwanda uba mu Bwongereza, uzana inzobere z’abaganga babaga iyi ndwara ku buntu, bakabaga abarwayi bari hagati ya 150 na 200 mu bitaro bitandukanye by’igihugu. Mu gihe ubusanzwe kubaga iyi ndwara bitwara agera kuri miliyoni ebyiri z’amafaranga y’u Rwanda.

Uburyo bwo kuvura ufite indwara ya Hernie ni ukumubaga

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza