Gutura hafi y’imihanda igendwa cyane bishobora gutera uburwayi bwo kwibagirwa

Yanditswe na Mukaneza M.Ange
Kuya 5 Mutarama 2017 saa 06:32
Yasuwe : XX
0

Mu gihe Isi ihangayikishijwe n’uburyo indwara yo kwibagirwa no kudatekereza neza igenda yiyongera, ubushakashatsi bwakorewe muri Canada bwagaragaje ko gutura hafi y’imihanda inyurwamo n’ibinyabiziga byinshi biri mu biyitera.

Imibare y’Ishami rya Loni rishinzwe Ubuzima (WHO) igaragaza ko kugeza ubu abantu bagera kuri miliyoni 50 ku Isi bafite ubu burwayi bwo mu mutwe buzwi nka ‘Dementia.’

Hari impungenge ko iyi ndwara itarabonerwa umuti, mu 2050 izaba ifitwe n’abagera kuri miliyoni 150 ku Isi.

Ubushakashatsi bwakorewe ku bantu bagera kuri miliyoni ebyiri batuye mu Ntara ya Ontario, aho bakurikiranwe kuva mu 2001 kugeza mu 2012 bwagaragaje ko 10% by’abarwaye dementia basanzwe batuye muri metero 50 uvuye ku mihanda igendwa cyane.

Nk’uko bigaragara ku rubuga The Lancet, mu gihe cyose ubushakashatsi bwamaze, hagaragaye abantu 243 611 barwaye ‘dementia’, bakaba bari biganjemo abaturiye imihanda inyuramo imodoka nyinshi aho bari hagati ya 7-11%.

Dr Hong Chen, wari mu itsinda ryakoze ubu bushakashatsi yavuze ko mu mpamvu zituma abaturiye imihanda minini bandura iyi ndwara harimo urusaku rw’ibinyabiziga, ivumbi, imyuka ihumanye ituruka ku modoka, ibikoresho bitandukanye bikoze amapine n’ibindi.

Nubwo bigoye kwemeza neza ko guturira imihanda biri mu bitera ‘dementia’, abahanga mu by’ubuzima bavuga ko ibyavuye muri ubu bushakashatsi ari ingenzi cyane kuko ari ikimenyetso ko kuba ahantu hari umwuka uhumanye byangiza ubuzima bw’abantu.

Umuyobozi w’Ikigo cya Kaminuza ya Nottingham gikora ubushakashatsi kuri Dementia, Prof Tom Dening yavuze ko bishoboka cyane ko imyuka ihumanye ituruka ku binyabiziga ishobora kugenda yangiza ubwonko gahoro kugeza ubwo umuntu arwaye iyi ndwara.

Ubusanzwe mu bikunze gutera indwara ya ‘Dementia’ harimo kubura vitamin ya B12; kwangirika kw’imiyoboro ijyana amaraso ku bwonko, guhungabana ku mutwe bitewe n’impanuka cyangwa kuba wakubitwaho ikintu n’ibindi.

Mu bimenyetso biranga urwaye ‘Dementia’ harimo kwibagirwa, kunanirwa kuvuga, gutekereza no kwifatira icyemezo, kugira ubwoba bwinshi, kunanirwa gukoresha kimwe mu bice by’umubiri, guhangayika cyane, kurakazwa n’ubusa n’ibindi.

Abantu batuye hafi y'imihanda igendwa cyane bakunze guhura n'uburwayi bwo kwibagirwa

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza