Guhara ibitotsi, umuti ushobora kuvura indwara y’agahinda gakabije

Yanditswe na Habimana Jean Baptiste
Kuya 17 Ukwakira 2017 saa 09:50
Yasuwe :
0 0

Agahinda gakabije ni indwara yo mu mutwe ishobora guterwa n’ibintu bibabaje umuntu yanyuzemo nko gupfusha, guhohoterwa ku kazi, kutabana neza n’abo mu muryango, n’ibindi bigoye kwihanganirwa.

Ku isi abantu basaga miliyoni 350 barwaye indwara y’agahinda gakabije, mu gihe mu Rwanda ubushakashatsi bwakozwe mu 2009 ku bijyanye n’ihungabana, bwagaragaje ko Abanyarwanda bagera kuri 26.1% bafite ihungabana, muri bo abasaga 53.93% bakaba barwaye indwara y’agahinda gakabije.

Agahinda gakabije gashobora kuva ku gufata ibiyobyabwenge cyangwa inzoga mu buryo bwangiza ubuzima umuntu akaba imbata yabyo, akenshi usanga bibyaye no kwiyahura. Nibura 90% by’abiyahura ku isi baba bafite indwara zo mu mutwe; muri bo 60% baba bafite agahinda gakabije.

Ubushakashatsi buherutse gushyirwa hanze bwagaragaje ko guhara ibitotsi bishobora kuvura agahinda gakabije ku barenga icya kabiri cy’abafite iyi ndwara.

Abantu bakunda kumara igihe bataryamye, cyangwa abibuza ibitotsi bagaragaje impinduka zo gukira uburwayi bw’agahinda gakabije, zitandukana ugereranyije n’abatarabikoze.

Kaminuza ya Pennsylvania yigisha ibijyanye n’ubuvuzi yakoze inyigo igaragaza ko iyo umurwayi asinziriye, indwara y’agahinda gakabije ihita igaruka mu buryo bwihuse.

Guhara ibitotsi bisa n’aho bigabanya agahinda gakabije ku kigero cya 50%, hatitawe ku bintu bitandukanye birimo uko umuntu yafashwe, niba umurwayi afata cyangwa adafata imiti ivura iyi ndwara y’agahinda gakabije, nkuko bigaragara mu nyigo yakozwe n’abahanga.

Dr Philip Gehrman, wagize uruhare muri ubu bushakashatsi, yavuze ko bitangaje ku kuba guhara ibitotsi bishobora kuvura indwara y’agahinda gakabije.

Abahanga mu bya siyansi, ntibazi neza ikigero n’uburyo guhara ibitotsi byahangana n’indwara y’agahinda gakabije.

Daily Mail yagaragaje ko raporo ya mbere kuri iyi ngingo yakozwe mu kinyejana cya 19. Kuva mu mwaka wa 1990, inyigo zirenga 75 zakozwe ku buryo bwo kuvura agahinda gakabije hakoreshejwe uburyo bwo kwibuza ibitotsi, gusa ariko nta sesengura ryimbitse ryakozwe, ikaba ariyo mpamvu nta mwanzuro wafashwe.

Raporo yasohotse mu kinyamakuru “Journal of Clinical Psychiatry” yagaragaje ko icya kabiri cy’abarwayi bakoreweho iyi nyigo, abatarashoboye kuryama igihe kirekire byabakijije indwara y’agahinda gakabije.

Nubwo bigaragara ko guhara ibitotsi ku ruhande rumwe bishobora kuvura indwara y’agahinda gakabije, iyo umuntu abyibujije igihe kinini bishobora kumuviramo ibibazo birimo ibyo mu mutwe, indwara z’umutima, ibitekerezo byo kwiyahura cyangwa ubu burwayi bukiyongera aho kugabanuka.

Uburyo umuntu asinzira n’igihe amara asinziriye bigirana isano n’iyi ndwara y’agahinda gakabije, uretse ko biba bigoye kubigaragaza. Ubushakashatsi bugaragaza ko abantu bafite agahinda gakabije bibasirwa n’indwara yo kubura ibitotsi inshuro icumi kurusha abasinzira neza.

Inyigo yakozwe yagaragaje ko guhara ibitotsi bikozwe igihe kinini byiyongera ku gufata imiti cyangwa ubundi buryo bwo guhangana n’indwara y’agahinda gakabije, byongerera umurwayi igihe kinini.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza