Kwamamaza

Global Fund n’imiryango nterankunga mu rugamba rwo kurandura indwara z’ibyorezo

Yanditswe kuya 19-09-2016 saa 13:24' na Niyonsenga Schadrack


Imiryango yigenga ndetse n’indi mishinga nterankunga ikorana na Global Fund yatangiye ibikorwa byo gukusanya inkunga mu rwego rwo kurwanya indwara z’ibyorezo nka Sida, igituntu, na malariya zikomeje kwibasira umubare w’abatari bake ku Isi.

Mu myaka itatu iri imbere, umushinga wa Global Fund uzaba ukoresha ingengo y’imari ingana na miliyoni 250 z’amadolari ya Amerika, binyuze mu nkunga izatangwa n’abafatanyabikorwa batandukanye.

Itangazo ryashyizwe ahagaragara mu nama y’iminsi ibiri y’Umushinga Global Fund yabereye muri Canada yari igamije kwereka abanyamuryango bawo ibikorwa bishya bigiye kwitabwaho mu myaka iri imbere yasojwe ku wa Gatandatu ushize.

The NewTimes itangaza ko muri iyi nama abayobozi baturutse mu bihugu bitandukanye byo ku Isi bahamagajwe ngo bagaragaze gahunda zabo mu gukomeza guhashya ibyorezo byugarije isi birimo Sida, Malariya, n’Igituntu.

Minisitiri ushinzwe iterambere Mpuzamahanga muri Canada, Marie-Claude Bibeau yahamagariye abafatanyabikorwa batandukanye kwihuza bagakorera hamwe muri iki gihe gishya umuryango wa Global Fund utangiye gukora impinduka.

Yagize ati “Nidukorana n’abaterankunga bacu tuzaba duteye intambwe ikomeye mu gufasha abakene n’abababaye batuye ku isi. Mu gihe turi gutangira imikorere ivuguruye, Canada yiteguye gukorana n’abafatanyabikorwa mu buryo bukomeye duharanira uburenganzira bwa muntu. Twiteguye gukorana bya hafi n’abafatanyabikorwa kugera ku rwego ruhanitse mu kwimakaza uburenganzira bw’ikiremwamuntu, uburinganire, ndetse no kurangiza ibyorezo byose bitarenze mu mwaka wa 2030.”

Imwe mu miryango yateye inkunga ibikorwa bya Global Fund

Umuryango washinzwe na Bono afatanyije na Bobby Shriver, ukora ishoramari ndetse n’ibikorwa byo kurwanya Sida muri Afurika(RED) wemeye gutera ibikorwa bya Global Fund inkunga ya miliyoni 100 z’amadolari mu myaka itatu iri imbere.

Umuyobozi wa RED, Deborah Dugan yagize ati “Hamwe n’abafatanyabikorwa ba RED twiyemeje gukaza umurego kurenza uko twakoraga mu gukomeza guhashya icyorezo cya Sida. Iyi ntego twihaye igaragaza ko imigambi yacu n’abafatanyabikorwa dufite itandukanye n’iyo mu myaka yashize ndetse n’uruhare abikorera bafite muri uru rugamba.”

Undi muryango watanze inkunga ni uwa Comic Relief ukorera mu Bwongereza wiyemeje kuzatanga miliyoni 12.75 z’amadolari ya Amerika.

Umuyobozi w’uyu muryango, Kevin Cahill yatangaje ko aya mafaranga bayakuye mu bukangurambaga baherutse gukorera mu Bwongereza na Amerika bugamije gushishikariza abantu guhugukira guhashya ibyorezo bihitana abatagira ingano.

Yagize ati “Comic Relief yiyemeje kurwanya SIDA, Igituntu na Malariya.Nshimiye abantu bose bateye inkunga ibikorwa by’ubukangurambaga twakoreye mu Bwongereza na Amerika kandi twiyemeje kuzasohoza uyu mugambi twihaye.”

Umuryango Mpuzamahanga wita ku buzima wa Fullerton Health Foundation watanze inkunga ya miliyoni 7.5 z’amadorali ya Amerika mu myaka itatu iri imbere.

Umuyobozi w’uyu muryango akaba ari nawe wawushinze, David Sin yagize ati “ Abafatanyabikorwa mu ishoramari nabo bakwiye kugira uruhare mu gufasha umuryango w’abatuye isi, bashyigikira ibikorwa byo guhashya ibyorezo biyibasiye no guharanira imibereho myiza y’abaturage. Twishimiye kandi twiteguye gukora ibyo byose hamwe na Global Fund.”

Imiryango myinshi itandukanye irimo Coca – cola, SAP, Munich RE n’abandi batandukanye bagaragarije Global fund ko biteguye gutanga inkunga n’amahugurwa atandukanye mu kwita ku batuye isi.

Itorero ry’Abametodisite ku Isi ku bufatanye na Global Fund ryiyemeje gutanga miliyoni umunani z’amadorali ya Amerika mu gihe cy’imyaka itatu.

Raporo iherutse gusohorwa n’umuryango wa Global Fund yagaragaje ko kuva mu 2002, yerekanye ko umubare w’abaturage ku mwaka bicwa n’ibyorezo bya SIDA, Malariya n’Igituntu wagendaga ugabanuka.

Igaragaza ko abagera kuri miliyoni 20 bari barwaye bimwe muri ibi byorezo bitaweho ndetse ko mu mpera z’uyu mwaka bashobora kuzaba babaye miliyoni 22 bamaze guhabwa ubufasha.

U Rwanda ruri mu Ihuriro ry’Abayobozi b’ibihugu bya Afurika rishinzwe kurwanya Malariya (African Leaders Malaria Alliance (ALMA) ryashinzwe mu mwaka wa 2009 mu rwego rwo gufasha umushinga wa Global Fund kurandura iyi ndwara.

Abakuru b’ibihugu 49 bagize iri huriro bafite intego yo gukorera hamwe ku buryo mu mwaka wa 2030 bazaba bamaze guhashya burundu icyorezo cya Malariya.

Mu ijambo, umuyobozi w’Ihuriro rya ALMA, Joy Phumaphi yagejeje ku bitabiriye inama y’ivugurura rya Global Fund ku nshuro ya mirongo itanu yagaragaje ko afitiye icyizere gikomeye gahunda y’abakuru b’ibihugu bya Afurika yo guhashya ibi byorezo bitatu bizonga uyu mugabane.

Yagize ati “Abayobozi ku Isi yose bongeye kwemera gufasha Global Fund guhangana n’ibyorezo byibasira abatuye Isi. Ubwo ikorana neza n’abafatanyabikorwa mu guhashya ibi byorezo kandi ibihugu bya Afurika bikaba byariyemeje gukoresha imwe mu mitungo yabyo bihashya ibi byorezo biragaragara ko turi kwegera ku iherezo.”

Phumaphi yanagarutse ku Rwanda nk’igihugu cyagaragaje imbaraga zikomeye mu guhangana na malariya, igituntu ndetse na Sida.

Ati “Dushimye cyane u Rwanda ku bwa gahunda nziza no kugaragaza ubwitange mu rugamba rwo guhangana na SIDA, Igituntu na Malariya.”

Kugeza ubu ku Isi habarurwa abantu miliyoni 9.2 bafata imiti igabanya ubukana bwa Sida, miliyoni 15.1 bo bafata imiti y’Igituntu, inzitiramibu miliyoni 659 nizo zatanzwe muri gahunda yo kurwanya malariya, na ho abandi miliyoni 146 ni bo Global Fund yabashije kurinda ibi byorezo byose.

Global Fund n'indi miryango nterankunga mu rugamba rwo guhashya indwara z'ibyorezi

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Monday 26 September 2016
Copyright © 2009 -2014 - IGIHE Ltd - All Rights Reserved